03/12/2025
Abşeronda 20 noyabr – Ümumdünya Uşaq hüquqları Günü qeyd edilib.
Abşeron rayonunda “Konstitusiya və Suverenlik ili” çərçivəsində “Uşaq hüquqları günü və hüquqi müdafiə” mövzusunda geniş tərkibli tədbir keçirilib. Tədbir iştirakçıları əvvəlcə Ümummilli Lider Heydər Əliyevin Xırdalan şəhərində ucalan abidəsini ziyarət edib, önünə gül dəstələri düzərək əziz xatirəsini dərin ehtiramla yad ediblər. Daha sonra Heydər Əliyev Mərkəzinin foyesində uşaqlara həsr olunan sərgiyə baxış keçirilib. Ulu Öndər Heydər Əliyevin və vətənimizin bütövlüyü uğrunda şahidlik zirvəsinə ucalan qəhrəmanlarımızın əziz xatirəsi bir dəqiqəlik sükutla yad edilib.
Tədbirdə Abşeron RİH başçısının müavini Gülnar Rəhimova çıxış edərək tədbirin əhəmiyyətindən və zərurətindən danışıb. O qeyd edib ki, əsası Ümummilli Lider Heydər Əliyev tərəfindən qoyulan uşaq-gənclər siyasəti Azərbaycan dövlət siyasətinin prioritet sahələrindən birinə çevrilib. Ölkəmizdə uşaqların hüquqların dövlət səviyyəsində qorunduğunu qeyd edən G.Rəhimova vurğulayıb ki, bu gün də bu siyasət Azərbaycan Respublikasının Prezidenti, cənab İlham Əliyev tərəfindən uğurla davam etdirilir. Uşaqların sosial durumlarının yaxşılaşdırılması, onların təhsil sahəsində inkişafının təmin edilməsi istiqamətində Heydər Əliyev Fondu tərəfindən çoxsaylı layihələr həyata keçirildiyini qeyd edən G.Rəhimova bildirib ki, Birinci Vitse-Prezident Mehriban xanım Əliyeva və Heydər Əliyev Fondunun Vitse-prezidenti Leyla xanım Əliyeva tərəfindən bu istiqamətdə çoxsaylı təşəbbüslər irəli sürülüb və bunlardan Azərbaycan övladları faydalanmışdır.
Sonra Abşeron RİH-nin Hüquq şöbəsinin müdiri, RİH yanında UHMK-nın sədri Rəşad Qubatov geniş məruzə ilə çıxış edib. O bildirib ki, hər bir xalqın, dövlətin ən böyük və qiymətli sərvəti uşaqlardır. Qeyd edilib ki, Azərbaycanda uşaq hüquqlarının müdafiəsinin tarixi 100 ildən də çoxdur. Hələ XX əsrin əvvəllərində uşaq hüquqlarının qorunması ilə bağlı dövrün maarifpərvər və xeyriyyəçiləri, sahibkarları və onların həyat yoldaşları tərəfindən bir sıra mühüm addımlar atılmışdı.
Bundan sonra panel müzakirələr başlayıb. Bu zaman Baş Prokurorluğun CTKİ idarəsinin böyük prokuroru Elşad Ağayev, DİN-in Baş İT İdarəsinin YYÇ-lə profilaktik işin təşkili şöbəsinin rəis müavini İmran Əliyev, Ailə, Qadın və Uşaq Problemləri üzrə Dövlət Komitəsinin Uşaq şöbəsinin müdiri Cəmilə Bağırova, Ombudsman Aparatının Uşaq hüquqlarının müdafiəsi sektorunun müdiri Nigar Ağayeva, Mediasiya Şurasının İdarə Heyətinin üzvü Sima Yaqubova, Azərbaycan Uşaqlar Birliyinin sədri Kəmalə Ağazadə çıxış edərək uşaq hüquqları istiqamətində görülən işlərdən, uşaq hüquqlarının təmin olunması və mövcud vəziyyət, hüquqi baza və müasir yanaşmalar, dövlət və ictimai qurumların dəstək mexanizmləri, risk qrupunda olan uşaqların qorunması istiqamətində fəaliyyət, kibertəhlükəsizlik və uşaqların müdafiəsi üçün qabaqlayıcı tədbirlər, məktəb psixoloqları və sosial işçilərin rolu mövzuları ətrafında danışıb, iştirakçıların suallarını cavablandırıblar.
Sonra Abşeron RİH yanında İctimai Şuranın sərdi, Vətən Müharibəsi şəhidi Elçin Həsənlinin anası Xatirə İsmayılova çıxış edərək bildirib ki, ölkəmizin hər yerində olduğu kimi, Abşeron rayonunda da şəhidlərdən bizə əmanət qalan övladlarına, ümumilikdə qəhrəmanlarımızın ailələrinə çox böyük diqqət və qayğı göstərilir. Onlar həyatlarının hər bir anlarında dövlətin himayəsini, diqqətini hiss edirlər. O, bütün bunlara görə şəhid ailələri və övladları adından Müzəffər Ali Baş Komandan, Azərbaycan Respublikasının Prezidenti İlham Əliyevə və Birinci Vitse-prezident Mehriban xanım Əliyevaya təşəkkürlərini bildirib.
