18/10/2022
الغردقه هى تانى اكبر مدينه مصريه بتطل على البحر الاحمر بعد مدينة السويس.
الغردقه كانت فى الاصل قريه صغيره بيرتاح فيها صيادين السمك من الجزيره العربيه و اتأسست كمدينه فى القرن العشرين و ابتدت تتوسع من سنة 1980 فى عهد الرئيس حسنى مبارك و اتبنى فيها مطار حديث و مرافق و بنيه تحتيه و قدرت تجذب مستثمرين اجانب و مصريين و اتبنت فيها اعداد كبيره من الاوتيلات و بقت المدينه مصيف للمصريين و منتجع سياحى للاجانب و بقت الحركه السياحيه للمدينه من أهم مصادر العملات الاجنبيه لمصر و سوق للعماله المصريه خاصة للمصريين من الصعيد.
اتطور مطار الغردقه و اتوسع و بقت بتوصله طيارات من القاهره و اسكندريه و طيارات شارتر سياحيه من نواحى اوروبا و غيرها.
الغردقه طولها حوالى 36 كم على ساحل البحر الاحمر و عدد سكانها حوالى 240.000 انسان. و المدينه متقسمه على 3 اقسام ، " الدهار " و ده الجزء القديم من المدينه و فيه الاسواق و البازارات و المكاتب الحكوميه و البوسته العموميه و محطة الأوتوبيسات اللى بتوصل للقاهره رحلات الغردقة
و المدن المصريه التانيه. و " سقاله " و ده مركز المدينه و بيجتازه طريق الشيراتون ( طريق الفندق ) اللى فيه اوتيلات من كل المستويات و النوعيات و مطاعم و محلات تجاريه وفى الجزء ده اتبنت منطقة " المارينا " اللى بترسى فيها اليخوت و اتحولت لمنطقه سياحيه حديثه فيها مطاعم مستواها راقى. الجزء التالت هو " الممشى " و ده احدث جزء فى المدينه و فيه اعداد كبيره من الأوتيلات و المطاعم و المحلات.
