09/03/2025
🫶 Seguimos percorrendo o GDR Ulla, Tambre, Mandeo de hórreo en hórreo! Porque temos a sorte de contar con moitos elementos deste patrimonio etnográfico no noso territorio.
Nos Concellos de Touro e O Pino abunda unha tipoloxía específica de hórreos, de planta cuadrangular, moi ancho en relación á lonxitude, e a miúdo cun espazo inferior pechado para ampliar a capacidade de almacenaxe. Son coñecidos como "hórreas", como un dos protagonistas da publicación da semana pasada, no Concello de Vilasantar.
🔷 Un exemplo é o hórreo de Outeiro, na parroquia de Loxo, no Concello de Touro. No ano 2017 foi catalogado como BIC. Tamén neste municipio, na parroquia de Beseño, na casa rural A Pena de Augasantas, atopamos outro espléndido exemplo deste tipo de construción.
🔶 No Concello do Pino paramos na parroquia de Santo Estevo de Medín, onde podemos visitar o hórreo da Casa Grande da Torre, que comparte o tamaño e proporcións cos anteriores, pero co espazo inferior aberto. A continuación, desprazámonos ata O Pedrouzo para contemplar a fermosa hórrea da casa parroquial de Santaia de Arca; e recomendamos visitar a igrexa, de estilo neoclásico e fermosamente ornamentada no interior.
♦️ Agora desprazámonos ao Concello de Boimorto para visitar dous hórreos ben curiosos. O primeiro é o do Hotel Pazo de Bieite, que é de dous corpos, pouco habitual na contorna. É dicir, o interior está dividido en dúas partes, aínda que por fóra non se aprecie. Finalmente, achegámonos a Ribadiso de Mella, na parroquia de Boimorto, onde atopamos un longuísimo hórreo ben conservado ao pé da estrada.
Cal é o teu hórreo favorito? Nós non podemos elixir, encántannos todos! 🤩
