30/08/2026
《香港D月餅會encore,一次過試食近20間香港傳統手工月餅》仁利,大歡喜,八仙,美其香,卓越and more… 試食地點上環81年歷史傳統冰室!!!
上年有幾個參加者好鍾意呢個活動要求今年encore，好難得可以一次過可以淺嚐試哂10幾間香港知名月餅，不同口味款式全部都試到；由經典嘅蛋黃白蓮蓉同伍仁月金腿月，再到較少食嘅柴火豆沙月、鴨膶月、雞油月、杬仁月、酥皮月、芋泥月、十八黃大月餅，唔駛睇人食評，自己親身食完就知邊間最啱你口味，用真實試食活動去了解香港製造、各間香港老餅家嘅歷史同故事、傳統月餅盒設計、月餅製作包裝及味演變過程
這次活動主題是希望集結所有本地香港傳統手工製月餅HK Mooncakes Assemble(大部份都係只有一間店的傳統老字號)，希望透過呢個活動同大家互相交流和認識香港其實仲有好多老餅家，而且佢地仲係用人手製作傳統風味的月餅
Threads上面成日有人講香港仲有乜香港製造？ 以下20幾間本地餅店老字號，全部都係香港手做月餅，你又食過幾多間？
《新界》
*粉嶺仁利餅家 - 柴火豆沙月 (已有人準備)
*粉嶺協香麵飽西餅 - 蛋黃白蓮蓉月餅（上水廣德隆醬園 )
*青衣大歡喜餅家 - 鴨膶月/ 雞油月/杬仁月 (已有人準備)
*元朗大同餅家 - 伍仁月
*元朗錦田勝發餅家 - 伍仁金腿月
*上水興發餅家 - 筒裝豆沙蓮蓉月
*西貢陳福榮餅家 - 酥皮蛋黃蓮蓉月
荃灣泰興餅店 鴛鴦皮奶黃 (傳統皮+曲奇皮）
《九龍》
*長沙灣美其香餅家 - 十八黃白蓮蓉月餅
*深水埗八仙餅家 - 十全十美大月餅
*深水埗生隆餅家 - 陳皮豆沙月
深水埗均香餅家 - 開心果酥皮月
太子奇趣餅家 - 雙黃豆沙月
旺角奇香餅家 - 四黃蓮蓉月
《港島》
*中環蓮香老餅家 - 紅蓮蓉月
*上環曾記餅家 - 酥皮芋泥月
*西環卓越食品餅店 - 金華火腿月
灣仔ABC餅店 山東棗泥月餅 （全香港唯一全人手製造嘅山東月餅）（今年重點介紹）
離島
大澳美珍中西餅食 - 五仁金腿 /豆蓉 （今年重點介紹）
《後補名單》
太子嘉美麵包餅店
上環喜利餅店
灣仔快樂麵麭
西營盤華爾登餅店
灣仔百事吉餅店
沙田漢和麵飽西餅
元朗寶城餅店
打*號為上年月餅會1.0試食過的月餅
今年月餅會另一大驚喜係場地會移師到《上環華樂冰室》舉行，無錯就係上環果間長期排長龍好多韓國靚女遊客去嘅舊式冰室，香港唯一一間1940年代開業到而家仲現存嘅老字號冰室（檀島唔計冰室)，喺一間81年歷史嘅傳統冰室食月餅，再配埋一杯我最愛嘅熱檸茶，絕對係一個獨特難忘嘅體驗，當日仲會分享華樂冰室嘅歷史同故事，由老闆娘親身分享點解華樂嘅熱檸茶特別好飲，呢個活動配搭好難得，有可能只此一次
================
《香港啲月餅會 - 傳統手工月餅交流試食分享會》
時間：9月19星期六，下午3:45，約1.5小時
地點：華樂冰室 （上環東街16號地下)
名額：15人
《報名方法》
同上年一樣，不收報名費，每人只需要準備上面列表中你最容易買到嘅老餅店月餅一盒，現場只需要分享你兩個月餅，就可以一齊分享試哂10幾種唔同餅店口味嘅月餅
請留言你可以帶邊幾間月餅，請俾三個方案，到時會再安排你負責邊間餅店避免全部人都買同一間，咁樣先可以夾到更多唔同嘅月餅過黎一齊試
作為青衣街坊，當日會帶涌美村名物大歡喜餅家鴨膶月餅黎迎戰，有人已經訂左粉嶺仁利，最難嗰兩間已經有人負責，其他大部份都係市區大家都容易買得到
備註：記得果日lunch唔好食咁飽，到時每人會每個月餅切8分1俾大家互相淺嚐，上年經驗都食到好飽
#香港啲月餅會 #傳統月餅
===============
以上全部都是幾十年的歷史的香港老餅店，至於榮華、恆香、美心、奇華四大連鎖餅店就不用了，因為呢四間月餅都非常易買同好多人都食過，今次集中傳統小店餅家老字號
以下為確認無賣月餅之老餅店
北角雅園餅店
鯉魚門年香園
鯉魚門瑞香園
鯉魚門勝園餅家
