26/05/2026
晶晶 係今朝清晨同BASE所有朋友團聚喇,前幾日都可以勉強抱住企喺度餵佢食嘢,近呢三日就唔食嘢淨係飲葡萄糖水同埋粥水,絕大部分時間都係喺睡眠倉休息瞓覺,琴日中午開始就進入彌留狀態,夜晚九點鐘餵粥水嘅時候都勉強可以自己吞到,但係睇隻眼就已經係冇神啦,尋晚十一點嘅時候我就同佢做咗最後道別咁佢好安靜咁瞓覺,今朝七點去睇佢嘅時候就發現已經走咗喇,只係得返頭部同埋大髀內側有少少微暖,估計應該係五點左右離開。
晶晶 喺BASE唔多16年,佢兩個女松松同波波同埋其他朋友都畀佢先走一步,而家終於大團聚喇,BASE 20年,亦都係時候寫上一個句號,20年經歷嘅嘢太多,不過唔打算將啲嘢再講一次再寫一次,一切都係心裏面,呢個都係最後一個有關BASE嘅post,多謝喱20年曾經幫過我哋嘅朋友,同埋曾經畀機會我哋幫過嘅狗狗,無論係我哋自己或者出面嘅,都係一個好好嘅經歷,由即時起唔再需要贊助畀BASE,再一次多謝曾經贊助或者支持過我哋無論係金錢或者物資嘅朋友,而且有好幾位係每個月都有固定嘅支持,真係非常感謝。
SunTravel 當然會維持正常服務,繼續為大家提供專業有溫度有性價比嘅服務,多謝大家。