24/10/2026
കൊല്ലത്ത് രണ്ട് പോക്സോ കേസുകളില്‍ റിമാൻഡിലായ മദ്രസാ അധ്യാപകനെതിരെ വീണ്ടും പോക്സോ കേസ്; ഇമ്പിച്ചിക്കോയ ഉപദ്രവിച്ചത് എട്ടും ഒൻപതും വയസ്സുള്ള കുട്ടികളെ; അശ്ലീല വീഡിയോ കാണിച്ചും പീഡനം
കൊല്ലം കടയ്‌ക്കല്‍ ഊന്നൻകല്ല് സ്വദേശി ഇമ്പിച്ചിക്കോയയ്‌ക്കെതിരെയാണ് മൂന്നാമത്തെ കേസ് രജിസ്റ്റർ ചെയ്തത്.
മദ്രസയില്‍ പഠിക്കാനെത്തിയ എട്ടും ഒൻപതും വയസ്സുള്ള കുട്ടികള്‍ക്കെതിരെ ലൈംഗികാതിക്രമം നടത്തുകയും അശ്ലീല വീഡിയോകള്‍ കാണിക്കുകയും ചെയ്ത കേസുകളിലാണ് ഇയാള്‍ നിലവില്‍ റിമാൻഡില്‍ കഴിയുന്നത്. ചൈല്‍ഡ് ലൈനിന്റെ സഹായത്തോടെ കൂടുതല്‍ കുട്ടികളെ കൗണ്‍സിലിങ്ങിന് വിധേയമാക്കിയപ്പോഴാണ് പുതിയ കേസിനാസ്പദമായ വിവരം പുറത്തുവന്നത്.
ഏഴ് വയസ്സുള്ള കുട്ടിയെ അശ്ലീല വീഡിയോ കാണിച്ചതായി കുട്ടി മൊഴി നല്‍കിയതിനെ തുടർന്നാണ് പുതിയ കേസ് രജിസ്റ്റർ ചെയ്തത്. തുടർന്ന് കടയ്‌ക്കല്‍ പൊലീസ് ജയിലിലെത്തി ഇമ്പിച്ചിക്കോയയുടെ അറസ്റ്റ് രേഖപ്പെടുത്തി. കോടതിയില്‍നിന്ന് കസ്റ്റഡിയില്‍ വാങ്ങിയ പ്രതിയെ സംഭവം നടന്ന സ്ഥലത്തെത്തിച്ച്‌ തെളിവെടുപ്പും പൂർത്തിയാക്കി..
