27/08/2026
Í dag var haldin uppskeruhátíð í litla ALDIN garðinum okkar.
Í bland við sólskin og gott veður var boðið upp á smakk á góðgæti úr garðinum, örerindi og tónlistarflutning.
Hjartans þakkir fyrir komuna! Og takk öll sem lögðuð ykkar að mörkum!
Hjördís Sigurðardóttir ávarpaði gesti og er hér erindi hennar.
,Ágætu gestir, velkomin!
Hugmyndin um vorið, vorið og líka sumarið halda okkur á lífi hér á landi, sameinar okkur og hughreystir 🌞🌳
Veðurguðirnir blessuðu okkur í dag en við þurftum að fresta þessari hátið einu sinni vegna óvðursspár. Erfitt er að skipuleggja samkomur utandyra hérlendis, það vitum við öll!
Hversu yndislegt er að vera hér umvafinn trjágróðri og fuglasöng, finna skjól í trjánum og finna beð með ýmiskonar matjurtum. Og eiga samverustund.
ALDIN Biodome – þróunarverkefni sem ég hef unnið að í 11 ár núna - á að byggja hér á þessari lóð. Skipulag er tilbúið fyrir fagurlagaðar gróðurhvelfingar hér, fylltar af matjurtum og trjám. ALDIN mun bjóða fólki að upplifa vor allan ársins hring. Þar verður boðið upp á margskonar upplifun fyrir sál og líkama.
Þegar ég var í meistaranámi í Hollandi sótti ég áfanga sem mér fannst afar áhugaverður, "human geography" eða mannvistarlandafræði. En í henni er fjallað um samband manns og umhverfis, og hvernig gagnvirk áhrif eru þar á milli. Athyglisverður fannst mér munurinn á þeirri skilgreiningu sem felst í "rými eða svæði" annars vegar og "stað" hins vegar. Við tölum ekki um svæði sem stað fyrr en við höfum komið þangað og upplifað eitthvað þar. Nú getið þið sagt að þið hafið komið á staðinn þar sem ALDIN á að byggjast, og hugrenningatengslin verða góð full af góðum minningum.
Þessi litli tilraungarður og þessi viðburður er örlítið sýnishorn af því sem við getum gert hér. Við höfum starfrækt hér tilraungarð í 6 ár núna – eitt ár hvíldum við garðinn en það var í fyrra og því fór mikil vinna í að ná niðurlögum á illgresi hér í vor.
Fyrst reyndum við að lengja ræktunartíma í báða enda og hraða vexti matjurta og trjá með því að hita upp jarðveginn með bakvatni frá hitaveitukerfi nærliggjandi hverfis sem annars fer í fráveitu. Við fengum frábærar niðurstöður úr tilrauninni – allt að fjórum sinnum meira magn og margfalt hraðari vöxtur ýmissa tegunda. Þegar Veitur ákváðu að rukka himinháa reikninga fyrir þetta vatn sem ennþá er látið renna í fráveitu svo ég best veit, ákváðum við að hætta þeirri tilraun og framkvæma tilraun sem hefur að markmiði sjálfbærar ræktunaraðferðir og endurnýtingu með áherslu á að mynda samfélag um garðinn. Margt heppnaðist vel – einkum að fá fyrirtæki, sérfræðinga og félagastarfsemi til að leggja okkur lið, og fjölskylda mín átti hér margar góðar stundir. Það var alltaf ætlunin að enda árið með samkomu sem þessari og leyfa styrktaraðilum að skína og segja frá sér og tengingu við okkur. Hjartans þakkir til ykkar allra sem komu að þessu starfi.
Nútíma samfélag er frábært á margan hátt með alla sína tækni og möguleika. En hraðinn er mikill og við getum bara ýtt á takka og allt gerist fyrir einhverja töfra. Þessi lífstíll hefur þó það í för með sér að við erum að tapa tengslunum við náttúruna finnum fyrir meiri einmannleika og tilgangsleysi. Það að rækta eitthvað á lífrænan hátt gefur manni góða tilfinningu fyrir verðmæti og tíma.
Fyrir mig persónulega hefur garðurinn í sumar verið geðræktargarður, hingað hef ég komið og unnið og notið núvitundar. Hvílt mig á skjánum og rýni í tölur og stafi.
ALDIN hugmyndafræðin eflir sjálfbærni, nærir líkama og sál og fræðir gegnum skilningarvitin. Allt þetta er það sem framtíðarsamfélög um heim allan þurfa. Við ætlum að byrja hér og stækka svo og stækka.
