13/04/2021
როგორ გადავადგილდეთ ტოსკანაში მოგზაურობისას 🚗🚅🚐
ტოსკანის რეგიონი საშუალო სიდიდის რეგიონებს მიეკუთვნება და კომუნიკაციის თვალსაზრისით საკმაოდ განვითარებულია. საზოგადოებრივი ტრანსპორტი აქ საკმაოდ გამართულად მუშაობს, განსხვავებით იტალიის სამხრეთ რეგიონებისგან. თუმცა, ცენტრალურ ტოსკანაში არის ადგილები, სადაც მოხვედრა განსაკუთრებით კომფორტულია მანქანით, მაშინ როდესაც საზოგადოებრივი ტრანსპორტით შესაძლოა საკმაოდ დიდი დრო დაგჭირდეთ.
თუ მხოლოდ ტოსკანას შედარებით დიდი ქალაქების მონახულება გაქვთ დაგეგმილი, როგორებიცაა Firenze, Pisa, Lucca, Arezzo, Siena და Livorno, მათ შორის გადაადგილებას თავისუფლად შეძლებთ მატარებლით. ეს გადაადგილების ყველაზე სწრაფი და ეკონომიური საშუალებაა. მატარებლის სადგურები თითქმის ყველა ქალაქში ცენტრალურ ნაწილში ან მის მიმდებარე ტერიტორიაზეა, რაც მგზავრობას კიდევ უფრო მოსახერხებელს ხდის.
იმ შემთხვევაში, თუკი სადგური ქალაქის ცენტრიდან მოშორებით მდებარეობს (მაგალითად, როგორც Siena-ში), სადგურის წინ აუცილებლად იპოვნით ავტობუსის გაჩერებას და ავტობუსს, რომლიც ქალაქის ცენტრამდე მიგიყვანთ.
როგორც წინა პოსტშიც გითხარით, მატარებლის ბილეთების შეძენა შეგიძლიათ როგორც ონლაინ www.trenitalia.com -ზე, ასევე სადგურის სალაროებშიც.
ტოსკანის დიდ ქალაქებში მატარებლით მოგზაურობის პლიუსებს შორის პირველ ადგილას აუცილებლად უნდა დავასახელოთ პარკინგის ძებნისათვის დაზოგილი დრო (იმ შემთხვევაში თუ მანქანით მოგზაურობთ) და საპარკინგო გადასახადის ეკონომია.
ტოსკანაში და ზოგადად იტალიაში, განსაკუთრებით დიდ ქალაქებში, ქალაქის ცენტრში პარკირება დღის ნებისმიერ მონაკვეთში ფაქტიურად შეუძლებელია. თუკი გაგიმართლათ და მანქანის გასაჩერებელი ადგილი იპოვეთ, მოგიწევთ პარკირების ერთ საათში 1,60 ევროდან 4,00 ევრომდე გადაიხადოთ (ფასი დამოკიდებულია ცენტრთან სიახლოვეზე). ამასთან, არაფრით ხართ დაზღვეული, რომ პარკინგზე დატოვებულ თქვენი მანქანა ისეთივე მთელი დაგხვდებათ, როგორიც დატოვებისას.
თემიდან ოდნავ გადავუხვევ და გეტყვით, რომ იტალიაში, განსაკუთრებით დიდ ქალაქებში, ხალხმრავალი ადგილების მონახულებისას შესაძლოა ვინმემ თქვენი ჩანთიდან საფულის, ან თქვენი ჯიბიდან - ტელეფონის ამოღება ისე მოახერხოს, რომ თქვენ ვერც ვერაფერი შენიშნოთ. ამიტომ ასეთ ადგილებში განსაკუთრებით ყურადღებით ყოფნას გირჩევთ ❗❗❗
საკითხი არ იცვლება ავტობუსით მგზავრობისას. აქ ავტობუსებში აუცილებლად შეხვდებით საპატიო ადგილას გამოკრულ აბრას, რომელიც მოგიწოდებთ სიფრთხილისა და ყურადღებისაკენ, ჯიბის ქურდობისგან თავის დაცვის მიზნით.
თუ დიდ ქალაქებთან ერთად ცენტრალური (კონტინენტური) ტოსკანის მონახულებასაც გადაწყვეტთ, მანქანის დაქირავება თქვენს მოგზაურობას მეტად კომფორტულს, თუმცა შედარებით ძვირადღირებულს გახდის.
ისეთი ადგილების მოსანახულებლად, როგორებიცაა San Gimignano, Cortona, Chianti, Val d'Orcia საზოგადოებრივი ტრანსპორტით სარგებლობისას აუცილებლად მოგიწევთ ურბანული ან ექსტრაურბანული ავტობუსით მგზავრობა, რომლებიც მხოლოდ დადგენილი გრაფიკით მოძრაობენ და ძირითადად ხალხით არიან სავსე.
მაგალითად, San Gimignano-ში მოსახვედრად მატარებლით Poggibonsi San Gimignano-ს სადგურზე უნდა ჩახვიდეთ და შემდეგ ურბანული ავტობუსით 25 წუთი იმგზავროთ. ფლორენციიდან გამგზავრების შემთხვევაში, ეს დაახლოებით 1,5-2 საათს წაგართმევთ. მაშინ როდესაც მანქანით გამგზავრებისას სულ რაღაც 50 წუთში San Gimignano-ში აღმოჩნდებით.
Chianti- სა და Val d'Orcia-ს ტერიტორიებზე სამოგზაუროდ მანქანა შეუცვლელად რეკომენდირებულია. სხვა შემთხვევაში თქვენი მგზავრობა მეტად ხანგრძლივი, დამღლელი და არაკომფორტული იქნება.
ავტობუსით (როგორც ურბანული, ასევე ექსტრაურბანული) მგზავრობისას ყველა გაჩერებაზე აუცილებლად იპოვნით პატარა საინფორმაციო დაფას, გადაადგილების დროებითა და მიმართულებებით. ყურადღება მიაქციეთ ფერებს, რომლითაც ავტობუსის გაჩერებაზე გავლის დროა გამოყოფილი. ყვითელი ფერით მონიშნულია არასამუშაო და სადღესასწაულო დღეები, ხოლო ცისფრით - სამუშაო დღეები (შაბათის ჩათვლით).
თუ ავტობუსი მითითებულ დროს არ გამოჩნდა, შეგიძიათ ივარაუდოთ, რომ გაფიცვაა - იტალიაში ძალიან უყვართ გაფიცვები, განსაკუთრებით საზოგდოებრივი ტრანსპორტის კომპანიების თანამშრომლებს. ამ შემთხვევაში ინფორმაციის გადამოწმება სატრანსპორტო კომპანიის საიტზე შეგიძლიათ. კომპანიის დასახელებას, რომელიც ზონას ემსახურება, საინფორმაციო დაფაზე იპოვნით. აქვე გეტყვით, რომ ბევრი კომპანია ისეთ სადღესასწაულო დღეებში, როგორებიცაა შობა და აღდგომა, სერვისს არ ანხორციელებს. ამიტომ, თუ ამ დღეებში ტოსკანაში მოხვდებით, ეცადეთ თქვენი დღე საზ. ტრანსპორტის გამოყენების გარეშე დაგეგმოთ.
ავტობუსის ბილეთის შეძენა შეგიძლიათ Tabaccheria-ებსა (თამბაქოს სარეალიზაციო პუნქტი) და ავტოსადგურებში. ასევე, ავტობუსის მძღოლთანაც, თუმცა ბორტზე ბილეთის შეძენისას გაორმაგებული ფასის გადახდა მოგიწევთ.
ისევე როგორც მატარებლით მგზავრობისას, ავტობუსით მგზავრობისასაც აუცილებელია ბილეთის დატიმბვრა ბორტზე არსებულ სპეციალურ აპარატში. დაუტიმბრავი ბილეთით მგზავრობისთვის, კონტროლის შემთხვევაში აუცილებლად დაგაჯარიმებენ.
ავტომანქანით მოგზაურობის მსურველებს ავტომანქანის დაქირავება დიდ ქალაქებში შეგიძლიათ, სადაც აეროპორტის ან ცენტრალური სადგურის მიმდებარე ტერიტორიაზე არაერთ ავტო-გაქირავების კომპანიას იპოვნით. ავტომანქანის დაქირავება შესაძლებელია როგორც ადგილზე, ასევე წინასწარ, კომპანიის საიტიდან.
მანქანის დაქირავების ფასი დღიურად 15,00 ევროდან იწყება და დამოკიდებულია ავტომანქანის მოდელზე, გამოშვების წელზე და ა.შ. კონტრაქტის გასაფორმებლად აუცილებლად დაგჭირდებათ პირადობის დამადსტურებელი დოკუმენტი, მართვის მოწმობა და საკრედიტო ბარათი. კონტრაქტის გაფორმებისას თითქმის ყველა კომპანია ითხოვს საგარანტიო თანხის დაბლოკვას საკრედიტო ბარათზე, შესაძლო დაზიანებების ან საგზაო შემთხვევების ხარჯების დასაფარად. საგარანტიო თანხის ოდენობაც ცვალებადია ავტომანქანის მოდელის მიხედვით.
ავტომანქანის დაქირავებას შეძლებთ საიტების www.avis.it , www.europcar.it და www.hertz.it-ის გამოყენებით.
თუკი ავტომანქანის დაქირავება ძვირი სიამოვნება გეჩვენებათ, მაგრამ ცენტრალური ტოსკანის მონახულება თქვენი ოცნებაა, რა თქმა უნდა, უარის თქმა არ ღირს და გამოსავალიც ყოველთვის მოიძებნება 😉
ამ შემთხვევაში, გირჩევთ დაგეგმოთ ერთ დღიანი გიდირებული ტური თქვენთვის სასურველი მიმართულებით.
მე ტურის დაჯავშნას https://www.viator.com/ -ზე გირჩევდით - არჩევანი მრავალფეროვანია და მოიცავს როგორ სავიზიტო, ისე ღვინის და კულინარიულ ტურებს. ფასები ყველაზე ხელმისაწვდომია და სერვისი ფანტასტიური.
და ბოლოს, ტოსკანა ის ადგილია, სადაც მიუხედავად იმისა, როგორ გადაწყვეტთ თქვენი მოგზაურობის დაგეგმვას, აქ გატარებული დღეები აუცილებლად იქნება დღეები, რომლებიც არასოდეს დაგავიწყდებათ 💞
მიუხედავად იმისა, იმოგზაურებთ მარტო თუ მეგობრებთან ერთად, საზოგადოებრივი ტრანსპორტით თუ მანქანით, შეძლებთ, შეაგროვოთ დაუვიწყარი მომენტები და სუნთქვისშემკვრელი შეგრძნებები. წამები, როდესაც მოგინდებათ, რომ დრო გააჩეროთ და გარემო, რომელიც მეტია ვიდრე მონუმენტები, ისტორიული ძეგლები და პეიზაჟები, სამუდამოდ შეინახოთ თქვენი ყველაზე მზიანი მოგონებების ზარდახშაში☺️🌞💞
