01/04/2023
វត្ថុយក្សមួយចំនួន កំពុងមានវត្ដមាននៅទីតាំងភូមិខ្ញុំ នៃព្រឹត្ដិការណ៍អង្គរសង្ក្រាន្ដ ឆ្នាំ២០២៣នេះ
គិតមកទល់ពេលនេះ វត្ថុយក្សមួយចំនួន កំពុងមានវត្ដមាននៅទីតាំងភូមិខ្ញុំ នៃព្រឹត្ដិការណ៍អង្គរសង្ក្រាន្ដ ដែលស្ថិតនៅខាងជើងប្រាសាទបាយ័ន រួមមាន៖ ចាប៉ីដងវែងយក្ស , កន្ត្រងប្រហុកយក្ស , មួកស្លឹកត្នោតយក្ស , សំបុកនិងពងមាន់យក្ស , ខ្មុកយក្ស , អង្រុតយក្ស និងបំពង់ទឹកត្នោតយក្ស ។
ជាមួយនឹងការតាំងបង្ហាញវត្ថុយក្សនេះ មានមគ្គុទេសក៍ទេសចរណ៍មួយចំនួន នៅខេត្ដសៀមាប បានសម្ដែងការរីករាយ និងពេញចិត្ដជាខ្លាំង ហើយតាមរយៈស្នារដៃសិល្បៈវប្បធម៌ខ្មែរដ៍អស្ចារ្យ ក្នុងព្រឹត្ដិការណ៍អង្គរសង្ក្រាន្ដឆ្នាំ២០២៣នេះ ពិតជាធ្វើឱ្យប្រជាពលរដ្ឋខ្មែរ ក៍ដូចភ្ញៀវទេសចរអន្ដរជាតិ មានការស្ងប់ស្ងែងនៅពេលពួកគាត់ទៅទស្សនាកម្សាន្តនៅពិធីចូលឆ្នាំថ្មីប្រពៃណីខ្មែរ ហើយសង្ឃឹមថា កូនខ្មែរនឹងកាន់តែស្គាល់ច្បាស់នូវវប្បធម៌ដូនតារបស់ខ្លួន ។
មហាព្រឹត្ដិការណ៍អង្គរសង្ក្រាន្ដ នឹងប្រព្រឹតទៅក្រោមប្រធានបទ «ក្ដីស្រមៃ និងក្ដីសង្ឃឹម» អង្គរសង្ក្រាន្តនឹងវិលត្រឡប់មកសារជាថ្មី ស្របពេលខួប១០ឆ្នាំ ដែលនឹងនាំមកនូវទិដ្ឋភាពដ៏សប្បាយរីករាយ ក៏ដូចជាការរំលឹកឡើងវិញនូវព្រឹត្តិការណ៍សំខាន់ៗ ដែលបានបំបែកកំណត់ត្រាជាប្រវត្តិសាស្ត្រលើពិភពលោក ។
អត្ថបទ និង រូបថត ៖ លោក ឈិត សាវី
កែសម្រួល ៖ លោក លីវ សាន្ត
