03/10/2024
Құрметті Түркістан қаласының тұрғындары мен қала қонақтары!
Сіздерді Түркістан төрінде «Өнерлі өлке» облыстық өнер фестивалі аясында 4-5 қазан күндері өтетін Отырар ауданының мәдени күндеріне шақырамыз!
4 қазан күні, сағат 10:30-да «Киелі Отырардан – қасиетті Түркістанға» рухани керуен көші Түркістан қаласына келеді
– сағат 11:00-де Этноауылда «Отырар – өнерлі орда» атты Отырар өнерпаздарының концерттік бағдарламасы басталса, «Ұлттық қолөнер – бабалар мұрасы» тақырыбындағы қолөнер шеберлерінің көрмесі мен «Сырлы бояулар сыр шертеді» атты қылқалам шеберлерінің көрмесін тамашалай аласыздар. Көшпенділер мәдениетімен танысып, қазақ халқының тұрмыстық әдет-ғұрпы көріністеріне куә боласыздар.
– сағат 12:30-дан бастап «Ұлы дала дәстүрі» айдарымен халқымыздың салт-дәстүрінен көріністер қойылып, ауыл шаруашылығы өнімдері мен аудан тарихынан сыр шертетін көрме назарларыңызға ұсынылады.
– сағат 15:00-де «Алтыбақан» жастар ойын-сауығы өтеді.
Ал кешкі сағат 18:00-де «Керуен сарай» кешенінде республикамызға белгілі өнерпаздардың қатысуымен «Өнерлі өлке – Түркістан» атты аудан өнерпаздарының гала концерті өтеді. Кеш қонақтары – сатира сардарлары Уәлибек Әбдірайымов пен Жүсіп Ақшора, «Алтын домбыра» иегері Бекарыс Шойбеков пен айтыс ақтаңгері Анар Жаппарқұлова және ән өнерінің жұлдыздары Хадиша Шалабаева, Берік Сексенбек, Ермахан Әшіров. Кешті белгілі журналист Қайырхан Мәулен мен Гүлімқұлжа Сейтқазы жүргізеді.
5 қазан күні сағат 10:00-ден бастап Этноауылда қолөнер бұйымдары мен сурет көрмелері, 11:00-де көше театры қойылымдары көпшілік назарына ұсынылады. «Ұлттық ойын – ұлттың игілігі» айдарымен ұлттық спорт ойындары түрлерінен сайыс өтіп, жеңімпаздар марапатталады.
Осынау шарада өнерпаздардың өнері мен ұлттық құндылықтарымызды жаңғыруына куә болып, рухани сусындап қайтуға шақырамыз.
Келіңіздер, көріңіздер!
