06/06/2026
2025–2026 оны хичээлийн жил Жуков салбарын хувьд амжилт бүтээл, бахархал дүүрэн жил байлаа.
Нэгүүн сургалтын төвийн гурав дахь салбар болон үүд хаалгаа нээснээс хойших хоёр дахь хичээлийн жил маань хайр асгарч, эрдэм ундарсан, инээд цалгисан сайхан жил болон өнгөрлөө. Энэ бүхнийг бүтээлцсэн эрхэм багш нар, итгэл хүлээлгэсэн эцэг эхчүүд, хичээнгүй шавь нартаа чин сэтгэлийн талархал илэрхийлье.
Энэ жил манай сурагчид анх удаа олон улсын TOEFL шалгалтад хүч сорин оролцож, бахархам амжилтын эзэд болсон билээ.
Junior TOEFL шалгалтад өндөр оноо авч, чансаагаа ахиулсан Цэлмэг, Лхагвадулам нартаа халуун баяр хүргэе.
Мөн Primary TOEFL шалгалтаа амжилттай өгч, шаардлагатай оноогоо бүрэн хангасан Ану, Тэмүгэ, Санчир, Цэлмүүн нартаа баяр хүргэе. Анхны шалгалтаараа гайхалтай өндөр оноо авсан Эрдэнэсайхан, Дэнзэндаваа, Анужин, Мандуул нартаа ч мөн халуун алга ташилтыг өргөе. Та нарын минь хичээл зүтгэл ирээдүйн том амжилтын эхлэл байх болтугай.
Энэ жил анх удаа зохион байгуулагдсан Oxford Discover академик ангиудын олимпиадад оролцож, хоёрдугаар байр эзлэн мэдлэг чадвараа гайхуулсан Төгс-Эрдэнэ хүүдээ баяр хүргэе.
Мөн хүүхдүүдийн унших чадвар, тууштай занг сорьсон "Reading Masters" тэмцээнд эцсээ хүртэл бууж өгөлгүй өрсөлдөж, хоёрдугаар байрт шалгарсан Шинэсанаа багштай Нэг өдөр Нэг номын анги болон Дөлгөөн багштай хосолмол ангийн сурагчдаараа маш ихээр бахархаж байнаа.
Хоёр дахь жилдээ зохион байгуулагдсан "Spelling Bee" тэмцээнд 15-аас дээш ном судалсан сурагчид өрсөлддөг хэдий ч өөрсдийгөө зоригтойгоор сорин оролцсон, дөнгөж 12-р номоо үзэж буй шавь нараараа багш нь бахархаад ханашгүй. Тэр дундаа эцсийн шат хүртэл шалгарч, хоёрдугаар байрт орсон авьяаслаг Бүжинлхамдаа эрдмийн дээдийг хүсэн ерөөе.
Мөн "Үлгэрийн Цаг" хөтөлбөрийн бяцхан сурагчдын дунд зохион байгуулсан Уран уншлагын тэмцээнд тэргүүн байр эзэлсэн Мандухай багшийн энхрий дөрвөн шавьд халуун баяр хүргэе. Тэдний цангинасан хоолой, гялалзсан нүд, зориг дүүрэн оролдлого энэ жилийн маань шигтгээ нь байлаа.
Ийнхүү нэгэн хичээлийн жил амжилтын дурсамж, бахархлын мөчүүдээр дүүрэн өндөрлөж байна. Өнөөдрийн жижиг алхам бүр маргаашийн том амжилтын суурь болдгийн гэрч нь та бүхэн байлаа.
Ирэх хичээлийн жилд маань амжилт бүхэн улам дэлгэрч, хүүхэд бүрийн хүсэл мөрөөдөл жигүүрлэн, эргээд дурсахад сэтгэл тэнүүн, инээмсэглэл дүүрэн сайхан хичээлийн жил болох болтугай.
Эрхэм сурагчид, эцэг эхчүүд, багш нартаа зуны нарлаг өдрүүдийн халуун мэндийг хүргэж, аз жаргал, амжилт бүтээлийн ерөөлийг өргөн дэвшүүлье.
Жич: Бид зуны богино хугацааны элсэлтүүдээ үргэлжлүүлэн авч байгаа бөгөөд шинэ хичээлийн жилийн үндсэн элсэлт наймдугаар сарын дундаас эхлэх болно.
