07/05/2025
UHAW NGA DANAW.
Isip mga yanung lumolupyo sa katilingban, duna tay katungod sa pagpili og mga lideres nga gusto natung ibutang sa posisyon. Responsibilidad sa matag magpipili ang pagsusì og pag-ila-ila sa mga kandidato kung sila duna bay igong kahibalo, eksperyensya, panan-awon og gugma alang sa katawhan—nga magmahimo nilang kwalipikado og angayan nga pilion sa moabutay nga bugnong lugaynon.
Walay makabuot sa matag usa kung kinsa ang ilang bulitan sa balota. Apan, gikinahanglan natung buksan og dili sirad-an ang atung kasing-kasing og alimpatakan.Paminawon, hunahunaon og dawaton ang ilang gihanyag nga kaugmaon. Kay matud pa: "Ang lungsod nga nasayud maoy makahatag ug kusog sa demokrasya. Apan, ang lungsod nga mapasagaron maoy makapukan sa atong kagawasan." —Atty. Reuben Canoy. Busa, atung sayran! Arun diha-diha dayun, kita makadesisyon kung kinsa man gyud ang angay padumalaon.
Sa nilabayng mga katuigan, daghan ang wala nahatagan og igong pagtagad partikularminte ang lake para sa turismo og bisan pa ang mga katawhang naglibot niini. Hisayran nga dako ang potensyal ang naghulat apan nagpabiling nasirad-an. Nagpabiling potensyal lamang.
Sa pagkahimugso sa lungsod sa Lakewood 47 ka tuig ang nilabay, uhaw ta sa pamunuan sa mga lider nga dunay tinuod nga pagbati og dakong panan-awon alang sa katawhan. Mga lider nga mamahimong tulay paingon unta sa kalambuan nga dugay na natung gipangandoy og gihinam-hinam. Apan, ngano mang nagpabiling nagkamang ang pamatigayon sa atung lungsod? Ngano man nga dili nato mabati ang pag-uswag? Ang paglambo? Nagdayak sa kalisod! Daw dakong haw-ang og kanunay kulang?
Pila nalang ka tulogan, adlaw na usab sa piniliay—adlaw na usab nga gihatagan tag chansa! Hinaot og unta, giyahan kita sa kinahitas-an sa pagbulit sa atung mga baluta. Hinaot og unta kita mismo ang mulaban sa atung kaugalingong gbhenwa. Hinaot og unta, pinaagi sa atung pagpili, mahaw-as ta sa pagkalumos. Hinaot og unta sa saktong mga tawo natu ipiyal ang atung lungsod. Hinaot og unta, dili na magpabiling uhaw ang Danaw!
