14/07/2026
بالاکوٹ میں 8 اکتوبر 2005 کے ہولناک زلزلے کے دوران لاپتا ہونے والے پانچ سالہ بچے کی باقیات اکیس برس بعد دریافت ہوئیں۔
یہ واقعہ بالاکوٹ کے گراں ڈھیری کے محلہ خواجہ خیلی کا ہے، جہاں زلزلے کے دن گم ہو جانے والے بچے جمال شفیق کا کوئی سراغ نہیں مل سکا تھا۔ حال ہی میں اسی جگہ پر گھر کی دوبارہ تعمیر کے لیے زمین کھودی جا رہی تھی کہ کھدائی کے دوران بچے کے کپڑے سامنے آئے۔ اس کے بعد مزید مٹی ہٹانے پر بچے کی باقیات بھی مل گئیں۔
بچے کے والد، قاری شفیق الرحمن، نے بتایا کہ سانحے کے فوراً بعد کئی دنوں تک ملبے میں تلاش جاری رکھی گئی مگر کچھ ہاتھ نہ آیا۔ اب برسوں بعد جب باقیات ملیں تو انہیں باقاعدہ نکال کر نمازِ جنازہ ادا کی گئی اور قریب کے قبرستان میں تدفین کر دی گئی۔
انہوں نے مزید کہا کہ بیٹے کی گمشدگی کے بعد کے یہ اکیس سال انتہائی اذیت اور بے چینی میں گزرے، تاہم اب باقیات کی بازیابی اور تدفین کے بعد انہیں دل کا سکون نصیب ہوا ہے۔
