18/08/2025
جی سی سی میں مقیم غیرملکیوں کے لیے "کویت" کا "آن ارائیول ویزا"، فیملی ویزا پانچ منٹ میں
بدھ 13 اگست 2025 18:17
کویت نے سیاحت کے فروغ کے لیے جی سی سی ملکوں میں مقیم غیرملکیوں کو آن آرائیول انٹری ویزے کی سہولت دینے کا اعلان کیا ہے۔
جی سی سی میں شامل ممالک سعودی عرب، عمان، قطر، امارات، اور بحرین میں مقیم غیرملکی اقامہ ہولڈرز کو اب آن آرائیول سیاحتی ویزے پر کویت میں داخلے کی اجازت ہو گی۔
کویتی میڈیا کے مطابق اس سے قبل جی سی سی میں مقیم اقامہ ہولڈرز کو کویت کا سفر کرنے سے قبل ای ویزا حاصل کرنے کی ضرورت تھی۔
کویت انٹرنیشنل ایئرپورٹ کی ویب سائٹ پر بتایا گیا کہ جی سی سی کے رہائشیوں (عراقی شہریوں کے علاوہ) کو ایئرپورٹ کے ویزا کاونٹر سے سیاحتی ویزا جاری کیا جائے گا جس کی مدت تین 3 ماہ ہو گی۔
مسافروں کے لیے آن آرائیول ویزے کے لیے ڈاکٹر، انجینیئر، ٹیچر، جج، کنسلٹنٹ، پبلک پراسیکیوشن کے ممبران، یونیورسٹی ٹیچر، صحافی، پریس اینڈ میڈیا سٹاف، پائلٹ، سسٹم اینا لسٹ، فارماسسٹ، کمپیوٹر پروگرامر، منیجر، بزنس مین، ڈپلومیٹک کورپس اور یونیورسٹی گریجویٹ شامل ہیں۔
مسافروں کے پاس پاسپورٹ اور کویت کے سفر کی تاریخ سے چھ 6 ماہ سے زیادہ کے لیے کارآمد اقامہ ہونا چاہیے۔ ریٹرن ٹکٹ موجود ہو۔
یاد رہے کہ کویت نے جولائی 2025 میں ایک ای ویزا پلیٹ فارم شروع کیا ہے۔ سیاحتی، فیملی، بزنس اورڈپلومیٹک ویزے جاری کیے جاتے ہیں۔
علاوہ ازیں کویتی وزارت داخلہ میں الیکڑانک سروسز کے ڈائریکٹر نے کہا ہے کہ کویت میں مقیم تمام تارکین اب اپنی فیملی کو وزٹ ویزے پر لا سکتے، اس کے لیے سیلری کی شرط ختم کر دی گئی ہے۔ نئے ضوابط کے تحت اہلیہ، بچوں اور والدین کے علاوہ قریبی رشتے داوں کو بھی بلایا جا سکے گا۔
فیملی اور دیگر ویزے آن لائن حاصل کیے جا سکتے ہیں۔ درخواست مکمل ہونے پر صرف پانچ 5 منٹ میں ویزا جاری کر دیا جائے گا۔
https://www.arabtimesonline.com/news/full-list-revealed-eligible-gcc-expats-for-a-kuwait-tourist-visa/
