30/06/2025
آپ میں سے بہت سے لوگ اب تک اس بات پر الجھن میں ہوں گے کہ سانحہ سوات آخر ہوا کیسے؟ یہ کیسے ممکن ہوا کہ ایک دم اتنا زیادہ پانی آ گیا کہ متاثرہ خاندان کو جان بچانے کا موقع تک نہ ملا؟ تو آئیے، اس تصویر کو دیکھ کر آپ کو اندازہ ہوگا کہ پانی کس طرح اچانک جائے وقوعہ تک پہنچا۔
آپ نے یقیناً دیکھا ہوگا کہ ہر شہر یا علاقے میں ایک قبضہ مافیا ضرور ہوتا ہے، جو عموماً حکومتی سرپرستی میں شاملات کی زمینوں، خاص طور پر دریا اور ندی نالوں کی زمینوں پر قبضہ کر لیتا ہے۔ یہ مافیا اپنی ناجائز طور پر حاصل کردہ زمینوں کو بچانے کے لیے دریا کا قدرتی راستہ روک کر اس کا رخ موڑ دیتا ہے۔ مگر قدرت جب ان تجاوزات کے خلاف اپنا انتقامی وار کرتی ہے، تو نقصان عام انسانوں کا ہوتا ہے—جانوں کا بھی اور مال کا بھی۔
سوات میں بھی کچھ ایسا ہی ہوا۔ بائی پاس روڈ پر جب کاروبار بڑھنے لگا اور زمینوں کی قیمتیں آسمان کو چھونے لگیں، تو قبضہ مافیا نے حکومتی پشت پناہی سے “مینگورہ شہر کو بچانے” کے نام پر دریا کے قدرتی بہاؤ پر کچے بند باندھ کر اس کا رخ تبدیل کر دیا، اور یوں ناجائز زمینوں پر قبضے شروع ہو گئے۔
اس تصویر میں سرخ دائرے سے نشان زدہ جگہ وہ ہے جہاں وہ بدقسمت خاندان ناشتہ کر رہا تھا، جبکہ کچی دیوار وہ ہے جسے بنا کر دریا کا رخ دوسری طرف موڑا گیا تھا۔ بارشوں کے بعد جب دریا میں پانی کی سطح بلند ہوئی تو وہ دیوار ٹوٹ گئی، اور چند لمحوں میں ہی پانی اس خاندان کے گرد بہنے لگا اور وہ المناک سانحہ پیش آ گیا۔
افسوس کی بات یہ ہے کہ اب ضلعی انتظامیہ غریب ہوٹل مالکان کی تجاوزات تو گرا رہی ہے، لیکن ان سرکاری افسران کے خلاف کبھی تحقیقات نہیں کرے گی جنہوں نے رشوت لے کر ان تجاوزات کی اجازت دی۔ حکومت بھی کبھی ان بیوروکریٹس کے خلاف کارروائی نہیں کرے گی جنہوں نے بحرین، مدین اور کالام جیسے علاقوں میں کروڑوں روپے رشوت لے کر دریا کی زمین پر ہوٹل تعمیر کرنے کی اجازت دی—وہ ہوٹل جو ہر چند سال بعد دریا کا بہاو روک کر سیلاب کی تباہ کاریوں کا باعث بنتے ہیں.
Fact from the wall of razi
