07/06/2026
-အနာဂတ်သို့ဆုတ်ခွာခြင်း-
ပိုင်စိုးဝေ
သွေးရူးသွေးတန်းတွေ
ငါ့ဆီက မမျှော်လင့်ပါနဲ့တော့
မင်းနှလုံးသားဆီအရောက်လာဖို့အတွက်
အခက်ခဲဆုံးလမ်းကို ရွေးချယ်ခဲ့သမို့
ငါဟာ
စစ်သူကြီးဟန်နီဘောလည်းဟုတ်ရဲ့။
မစိုက်ပျိုးရသေးတဲ့
မျိုးစေ့တွေကိုစောင့်ရှောက်သလိုမျိုး
ဘဝရဲ့တန်ဖိုးတွေကို သယ်ဆောင်ပြီး
ငါဂောာက်လာခဲ့ရ။
အမှန်တရားရဲ့နောက်
ဒုတိယမြောက်ကျဆုံးသူဟာ ငါပါ။
ဒိုင်နိုဆောတွေ
ဘာကြောင့်မျိုးတုံးခဲ့ရတယ်ဆိုတာကို
လူတွေ အငြင်းပွားနေသလိုမျိုးပေါ့လေ
ကမ္ဘာမြေပေါ်က
မသိမှုအားလုံးကိုတင်စားဖို့
ငါ့ကို မွေးဖွားခဲ့သတဲ့။
တကယ့်ကို
ပါးပါးလွှာလွှာလေးလွဲချော်ခဲ့တာပါ
ဒါနဲ့ပဲ တို့တဘဝလုံးဝေးခဲ့ကြရ။
အနာဂတ်ဟာ
ဘယ်တော့မှ ငါ့ဆီကိုရောက်မလာနိုင်တော့ဘူး
ငါ့အချစ်ဟာ
လူ့သမိုင်းရဲ့ ဘယ်လိုခေတ်မျိုးမှာမှ
အစားထိုးမရတဲ့ ကောင်းကင်ဆန်မှုနဲ့ပါ။
စက်ဝိုင်းလိုပျံသန်းနေတဲ့
အချိန်တွေရဲ့လောင်ကျွမ်းမှုထဲ
မရေရာတဲ့ဘဝတွေကိုပေးဆပ်ရင်း
မင်းနဲ့ငါ ဝေးကြရပြီလား။
မခိုင်မာတဲ့ထိပ်ဖျားပေါ်မှာ ပြောင်းပြန်လှန်ပြီးစိုက်ထားတဲ့
ပိရမစ်ကြီးတခုလို
တဘိုင်းဘိုင်းလဲကျ
သုညကို စက်ဝိုင်းနဲ့လွဲမှားခဲ့သူပါ။
ဇာတ်သိမ်းခန်းမှာတော့
ပင်လယ်ကမ်းခြေအတုတခုမှာ
ရမ်ပုလင်းအစစ်တလုံးကို
မော့သောက်ပစ်လိုက်ရဲ့။ ။
#ပိုင်စိုးဝေ
