13/07/2025
كل صيف نسمعو نفس الاسطوانة: صفحات على فايسبوك و راديوات خاصة (واضح توجهها) تهبط في تصاور وفيديوات وتعمل في ربطات غريبة باش تشوّه صورة غار الملح .
آخرها فيديو مصوّر مع 9 متاع الصباح، البحر فيه شوية هيجان ومعاه تعليق مفبرك يقول:
"غار الملح بحرها فارغ ،يخوّف، والسبب الجشع متاع الكراء والميليشيات المحتلة للشط".
📍 نحب نجاوبو بوضوح:
🔹 أولاً، حالة البحر في الفيديو؟
– البحر كان هايج شوية وهذا طبيعي ومرتبط بحالة الطقس وين الريح كانت قوية (جنوبية شرقية أو ما يعرف بالشلوق) وتقلّبت الحالة الجوية في برشة مناطق مش غار الملح وحدها.
– البحر يبدأ يعمّر من نص النهار مش مع 10متاع صباح واللي يعرف شط غار الملح يعرف هالحكاية.
– الشمس في الفيديو باين موقعها من الشرق والظل مازال طويل يعني حتى التوقيت متاع التصوير يخدم على رواية مزيّفة.
🔹 ثانياً، شنوّة علاقة "جشع الكراء" و"الميليشيات" بحالة البحر؟!
الربط هذا سخيف وفيه نيّة واضحة للتشويه.
– في غار الملح الشط كبير وطويل وفمّا بلايص عمومية، نظيفة ومنظمة، تدخل تقعد فيها وتستمتع بنهارك بلاش فرنك.
– وفمّا بلايص بخدمات متوسطة وفمّا مناطق راقية للي يحب كابان وصحن حوت وغلة. هذا تنوّع موش جشع.
🔹 ثالثاً، بحر غار الملح هذا الصيف أعطانا أكبر دليل على نظافتو وبيئتو الحيّة:
– السلاحف البحرية جات تبيض في الشط.
– والناس اللي تعرف شنوّة تعني سلحفاة بحرية تعرف إنها ما تعيش كان في بيئة آمنة ونظيفة.
– وزيد هي تاكل قناديل البحر يعني وجودها يعاون حتى في راحة المصطافين.
⚠️ شنوّة تعمل بعض الصفحات؟
– تصور البحر مع هيجان طبيعي فجراً،
– تحط تعليق درامي فيه ربطات كاذبة،
– وتخلي الناس تصدق إنو الشط مهجور بسبب "الكراء" و"الميليشيات"،
– في حين إنو الحقيقة أبسط: حالة طقس مؤقتة، وتوقيت تصوير قبل ما يبدأ النشاط في الشط.
📸 وإحنا توّا؟ نهبطو تصاور من بحر غار الملح والناس تعوم، شايخة، والجو نظيف… ونخليو البحر يردّ بالصورة، خير من ألف كلمة.
