09/04/2024
الباجي مات ، و قبلو السبوعي … فوشيكة توه فالخمسينات و سليمان الأبيض فالستينات …
أمي فضيلة فالثمانين ، و دلندة الطرنكوشة المزيانة في أربعيناتها… كيفنا..
بالشوية بالشوية ، جيل الثمانينات قاعدين نودعو في صغر تعدى يجري كالرمش قدام عينينا ، برموزو و شخصايتو و مسلسلاتو و عاداتو ، جيل غريب جاء بين زوز أجيال متناقضين ، في حقبة تاريخية مش مفهومة، بين البساطة و التعقيد ، بين العلم و الدوا العربي ، بين اللعب في البطاحي و الfree fire , بين الكتب و اليوتوب…
البيس و الزربوط تنساو ، و super mario في الأتاري ، ولات référence متاع تاريخ سحيق ضاع و تنسى…
و ماعدش فما Rai Uno بالفرشيطة ، ولا كسكسي نهار الأحد ، و البوصاع و المشماش ولى يتشرى ماعادش يتسرق من شجر الجيران..
الخوال و العمام ماعادش يروحو من فرانسا يجيبولنا الشكلاطة العزيزة الغالية ، خاطر كل شي موجود فالmagasin…
و البسطاجي ماعادش يجيب في الأخبار و جوابات الحب، ولى يجيب كان في الفاتورات…
جيل الثمانينات ، جيل مازال مش مستوعب الي هو كبر، مازالنا صغار و نحلمو و نلونو فالسماء بألف لون ..
مازلنا صغار واحلين في بدونات adultes ..
مازالنا ماعملناش الtransition بين طفولة مشات من غير رجعة ، و adulthood ماناش حاضرين ليها…
نحنا جيل الحب ، و الورد الأحمر ، و الoffre متاع الميساجات مال8 ل8 ..
جيل الmessage image و النوكيا 1100 …
جيل غريب معبي موزيكا و فن و أحلام ، يحب تونس و يكرها ، يحبها تتقدم كيما أمريكيا ، اما يقطع في اول هجة حتى على فلوكة في قلب بحر غدار هز منا الغالين…
و تستمر الحياة بحلوها و مرها و إلى ربك الرجعى...
وإن شاء الله غدوة خير..
