Shehsawaar Travel & Tours

31/08/2023

عبدالشکور دادرس چي يو نوم وتئ قانونپوه او د موجوده نظام د ملاتړو څخه دئ وائي چي،" زه محمود شاه حبيبي پيژنم، هغه يو پر وطن مئين او د ملکي هوانوردئ ډير مسلکي ځوان دئ، دی وائي چي محمود شاه حبيبي لا تر اوسه جرم هم نه دئ معلوم، اما که نظام يو مجرم هم بندي کړي بايد په لسو ورځو کي يي دوسيه محکمې ته محول سي او د کورنئ سره د تماس او ملاقات اجازه ورکړل سي، خو محمود شاه حبيبي تر کال واوښته اما حکومت حتا د کور سره د ټيليفوني تماس اجازه نه ورکوي".

Tamoor Shah Habibi

Local business

21/08/2023

د افغانستان د هوايي چلند ادارې پخوانی عمومي مشر محمود شاه حبیبي له تېر یو کال راهیسې ورک دی چې کورنۍ یې وايي، د طالبانو حکومت نیولی دی.

د محمود شاه ورور تیمور شاه حبیبي ادعا کوي، چې ورور یې د ۲۰۲۲ کال د اګست پر لسمه د کور له مخې چې د کابل په شیرپور سیمه کې دی، د طالبانو لخوا نیول شوی او زنداني دی.

د محمود شاه کورنۍ وايي، د نوموړي د نیولو لامل معلوم نه دی. بي بي سي د ښاغلي حبیبي د نیولو موضوع په کابل کې د طالبانو حکومت له امنیتي ادارو سره شریکه کړه خو هغوی په دې اړه ځواب نه کوي.

د ښاغلي حبیبي په خبره له محمود شاه سره یې موټر چلوونکی هم نیولی و چې شاوخوا له دریو میاشتو وروسته خوشی شوی.

کورنۍ یې ادعا کوي، چې د حبیبي له نیولو وروسته طالبان یې په کور ورننوتلو او اسناد یې لټول.

دوی وايي، د محمود شاه حبیبي "لپ ټاپ، کتابونه او ان د مېرمنې لپټاپ یې چې یوه ډاکټره ده ورنه وړي دي."

تیمور شاه حبیبي وايي، د طالبانو یو شمېر لوړپوړو چارواکو، وزیرانو او ان د ریس الوزرا مرستیال ملا عبدالغني برادر سره یې لیدلي او د خپل ورور په اړه یې د معلوماتو تر لاسه کولو کې مرسته غوښتې ده.

ښاغلی حبیبي زیاتوي چې چارواکو ورسره ښه رویه او نرمې خبرې کړې دي، خو تر دې دمه یې هیڅ ډول مرسته او رسمي معلومات نه دي ترلاسه کړي.

تیمور شاه وايي، پر افغانستان د طالبانو له واکمنېدو دوه کاله مخکې محمود شاه له حکومتي دندې لاس په سر شوی و او خپله یوه شخصي کاروبار یې کاوه.

د ښاغلي حبیبي کورنۍ وايي، باید د افغانستان اوسني واکمن د هغه د برخه لیک په اړه معلومات ورکړي.

مور یې د محمود شاه حبیبي په اړه خپل بل زوی تیمور شاه ته په یوه غږیز پیغام کې ویلي:

"هره شپه لمونځونه کوم ختمونه کوم تر سهاره وېښه یم زړه مې نه صبریږي. خدای خبر چې ژوندی به وي او کنه به وي"

د محمود شاه حبیبي مور وايي، ناروغه ده او د خپل زوی ورکېدل یې لا ځوروي. دا وايي ټوله هیله دا ده، چې د خپل ځوان زوی له برخه لیکه خبره شي.

Tamoor Shah Habibi

Local business

15/08/2023

د افغانستان اسلامی امارت جلالتمآب آمر ته!

د افغانستان د هواي چلند د خپلواکي ادارې دپخوانی عمومی رئیس محمود شاه حبیبي دپلار پرانیستی لیک!

ښاغلې! اسلام علیکم ورحمت الله و برکاته،

زه احمدالله حبیبی چی د داؤد خان د وخت د اردو منصبداریم او فعلاً د سن په اتیایمه لسیزه کی قرار لرم د الله تعالی څخه راضی یم چی د شوروی په مقابل کی یی دلومړنیو مدافعینو څخه وګرځولم، دا چی بې وروره او بې کسه وم او زما د نه موجودیت په نتیجه کی به مي اولاد بې سرپرسته پاته کیدئ نو مي د نبی اکرم علیه صلات و سلام د سنتو مطابق په ۱۳۶۰ ه ق کی هجرت وکړ تر څو حد اقل خپل اولاد د تعلیم په اسلحه پیاوړی کړم، الله تعالی می دا ارمان پوره کړچی لله الحمد درې سره زامن می په عصري او تخنیکی علومو کی د ماسټرئ تر کچی او دینی علومو کی تر فرض عین تر حد اضافه لوستي دي. د تیر امارت په وخت کی بیرته وطن ته راستون شوم او د یوه عادي وګړي په شکل می ژوند ته ادامه ورکړه، نه می بیرته خپل منصب ته مراجعه وکړه او نه هم تقاعد یا بل دولتی امتیاز ته چی نافضه قوانینو می حق را تثبیت کړٍئ هم وو.

محمودشاه حبیبی مي کشر زوی دی، د خپل لیاقت او استعداد پر اساس یی په کال ۱۳۹۰ کی د ملل متحد د هوانوردی په اداره کی چی ( ایکاو ICAO ) نومیږی د اداري مدیر په حیث د ازاد رقابت د لاري وظیفه تر لاسه کړه. د ملکی هوانوردی/هوائي چلند سره یی دهغه دفتر څخه علاقه او مینه سوه او په داغه بخش کی یی دوې ماسټرئ واخیستې او دومره مسلکی او تخنیکی کادر وګرځیدئ چی نړیوالو ادارو د کار پیشنهادونه ورته کول اما ده دا غوره وګڼل چی په دې بخش کی د وطن خدمت وکړی. د ټرانسپورټ او هوانوردی په وزارت کی یی لمړی د سلاکار او بیا کله چی د یوې خپلواکي ادارې په تشکیل کی منظور سوه د معین او بیا د عمومي رئيس په توګه دنده تر سره کړه. زه دا په ډاډ سره ویلای سم چی دده په کچه په ملکی هوانوردئ او د فضاء د کنټرول په مسلک کی په ټول افغانستان کی ساری نیسته.

محمود شاه حبیبی د جمهوریت د پرځیدو څخه دوه کاله مخکی د خپل دولتی مقام او چوکئ څخه جلاوالی اختیار کړ او په یوه خصوصی مخابراتی شرکت کی یی دنده پیل کړه. خو دا چی د هوایی چلند مسلکی کادر او ډیر لیوال وو نو ددې بخش د نورو کادرونو، خصوصی سکتور متشبثینو او نورو ملی شخصیتونو په ملاتړ او ملګرتیا یی د وزارت عدلیی څخه په رسمی جواز د افغانستان دهوایی چلند د ملاتړ ټولنه ایجاد کړه او په دې برخه کی یی د هیواد دې سکتور ته افتخاري خدمت شروع کړ. د امارت په راتګ سره او د هغه وروسته په هیواد کی پاته وو او بیا یی هم کوښښ کاوه چی د نړیوالو بندیزونو او د هیواد د اقتصاد د رکود په بهیر کي د هیواد هوایی میدانونه او هوایی شرکتونه خپل خدمات عرضه کړي، تر څوهیوادوال یی عاجلو طبی موادو ته لاسرسئ ولري او د هیواد خواخوږي وکولای سي د هوایی لارو تګ راتګ وکړي.

دی نه وو خبر چی دده د ښه نیت نتیجه به دی داسي د بلا په خوله کی ورکي، پوره یو کال تر مخه د محرم الحرام پر دولسمه د ۱۴۰۱ کال د اسد پر نولسمه او د 2022 کال ا ګست د میاشتی پر لسمه، محمود شاه حبیبی د خپل موټروان او موټر سره د کور د مخه چی د شیرپور مسجد جامع مخته یی په یوه بلاک کی دغه اپارتمان په کرایه نیولی وو ونیوئ. وروسته یی دده د اپارتمان دروازه ورماته کړه او کور ته د امارت مجاهدین ورننوتل چی د یوازي تورسري او درو وړو ماشومانو څخه پرته په کور کی نور څوک نه وه، دده لپ ټاپ کمپیوټر، کتابونه، الیکترنیکی وسایل د میرمنی کمپیوټر او بعضی کتابونه یی چی هغه هم یوه ډاکټره ده د خپل ځان سره یووړه. په عین وخت کی یی دده د هغه شرکت څخه چی دی کار پکښی کوي نهویشت نفره کارمندان هم ګرفتاره کړه او یووړل سوه. کله چی موږ پوښتنه وکړه دا راته ثابته سوه چی دده سره یی د (ای سی جی ACG ) شرکت یودیرش کارمندان نیولي دي او نامعلوم ځای ته وړل سوي دي. چی ددرو هفتو په جریان کی اوه ویشت نفره په داسی شکل را ایله سوه چی سترګي یی تړل سوي وې او د کابل پر مختلفو واټونو یی د موټرانو څخه کښته کړي وه مګر دده او موټروان سره یی دوه نور د شرکت انجنیران تر درینیمو میاشتو پوری ورک وه چی په دې موده کي و موټروان او دوو انجینرانو ته د خپلو کورونو سره د ټیلیفونی تماس اجازه ورکړل سوه خو ده دا حق هم تر لاسه نکړئ. ددرونیمو میاشتو وروسته دده موټروان او یو بل انجنیئر هم په هغه پخوانی شکل را خوشی سول اما نن د یوه کال په تیریدو سره دده هیڅ احوال نه راکول کیږي.

ستاسی جلالتماَب فرمان موجود دئ چی په هغه کی د امارت ځواکونو ته واضح هدایات ورکړل سوي دي چی باید د چاپې یا ګرفتارئ پر وخت ځواکونه خپل ځان معرفی کړي چی د کوم ارګانه څخه راغلي دي او بیا د ډیرو نورو اسانتیاوو او د بندیانو د شرعی حقوقو تر څنګ مو دا هدایات هم ورکړي دي چي بندي باید حد اقل درې ځله په یوه میاشت کي د خپلي کورنئ سره وویني، اما په ډیر تاْسف سره چی ستاسي ددې فرمان څخه ښکاره سرغړونه کیږي.

اوس به راسو دده د قید دلیل ته، داچي تر اوسه د امارت د ډیرو چارواکو سره مو ولیدل او د کابینی د ډیرو وزیرانو پوري مو خپل ږغ ورساوه خو هیڅ یوه مسؤل کس قانع کونکئ جواب نه راته درلودئ، نه یی ګناه راته معلومولائ سوائ او نه یی د کومي محکمې فیصله. زموږ یوازینئ معلوماتی منبع هغه را خلاص سوي بندیان وه چي دداغه شرکت څخه په تړلو سترګو وړل سوي وه او بیا په هغسی تړولو سترګو خوشی سوي وه. هغو ته د تحقیق په جریان کی ویل سوي وه چي ددوئ شرکت د بهرنیانو سره لاس لري او د بهرنیانو سره یی کومک کړئ دئ چی د کابل پر یوه سیمه باندي هوایی برید وکړي چی شاید په هغه کي کوم بهرنئ میلمه په نښه سوئ دئ.

که واقعاً داغه تور وي خو دا ډیر بي بنیاده او د حقیقت څخه لیري دئ، ځکه د هغه واقعې څخه درې میاشتی مخکي محمود شاه حبیبی زه او خپله مور د تداوئ د پاره خارج ته راوستو او درینیمی میاشتی زموږ په چوپړ کي وو او د هغه واقعې وروسته د څو ورځو لپاره کابل ته ولاړئ تر څو ځینی کارونه سر ته ورسوي او بیرته زموږ د تداوئ د تکمیل د پاره راسي او موږ ټول بیرته خپل کور ته ستانه کړي.
اوس چه یو کال تیریږي مونږ نه تلفوني او نه هم مخامخ تماس ورسره لرو. دده یو کال په زندان کي تیریدل پرته له هیڅ رقم فا میلي تماس څخه نه یوازي دده لپاره یوه کړیدلې جزاء ده بلکه دټول فا میل لپاره د دوامداره سزا باعث ګرځیدلۍ ده. سپین ږیرئ پلار او سپین سري عمر خوړلي موریی دډیري ژړا له خاطره ممکن سترګي او نور ژوند له لاسه ورکړي. خانمه او معصوم اولادیی شپه او ورځ په ژړا دده دخلاصون او یا اقلاً دتماس پخاطر شپي او ورځي تیروي، لنډه دا چی ټول فامیل، دوستان او قریبان په پریشانه دي.

زه دده د پلار په صفت دا ډاډ او اطمینان لرم چی زما زوئ به هیڅکله د وطن او هیواد سودا ونکړي او نه به د وطن د دښمنانو سره لاس یو کړي، ولي چي دئ په داغسي روحیه روزل سوئ دئ او که کوم ثبوت یا شاهد په دې هکله موجود وي باید د محکمې د لاري موضوع څیړل سوې وائ. ستاسي درانه حضور ته مو دا لیک وړاندي کی او اوس دپاک الله په امید او ستاسي د مهربانی او انسان دوستی په انتظار ناست یو چه ستاسو قوانین او مرحمت و مونږ ته څنګه جواب راکوي. ستاسو د مهربانی په هیله.

Tamoor Shah Habibi