02/06/2026
Nga Zvërneci në mbarë Shqipërinë: Turizmi i betonit nuk është turizëm, është shkatërrim
Ngjarjet e ditëve të fundit në Portonovo të Zvërnecit dhe në Lagunën e Nartës janë një këmbanë e fortë alarmi që po bie për të gjithë ne. Pamjet e dhunës, mungesa e transparencës dhe nisja e punimeve për resorte gjigante në mes të një zone të mbrojtur ekologjike nuk janë thjesht një problem lokal i banorëve vendas. Ky është një sulm direkt ndaj asaj që e bën Shqipërinë unike: natyrës së saj të egër dhe pacënueshmërisë së komuniteteve tona.
Fatkeqësisht, rasti i Zvërnecit nuk është një ngjarje e izoluar, por vazhdimësia e një modeli të gabuar zhvillimi që po përsëritet frikshëm në çdo cep të vendit. Ne kemi parë se si projekte si Green Coast në Palasë tjetërsuan plotësisht vijën bregdetare, duke zëvendësuar peizazhin natyror me mure betoni të paarritshme për qytetarët e thjeshtë. Kemi parë se si projekti i "Manastiri Resort" u shtri brenda kufijve të Parkut Kombëtar të Butrintit në Sarandë, duke privatizuar dhe cenuar një hapësirë që mbrohet nga UNESCO e që u përket të gjithë shqiptarëve. Nga veriu në jug, perlat tona natyrore po copëtohen në emër të një "modernizimi" që në fakt është vetëm betonizim.
Kush përfiton realisht nga këto investime miliardere? Përvoja e deritanishme tregon se komuniteti lokal nxirret jashtë loje. Banorëve u bllokohet aksesi në pronat e tyre, u tjetërsohet brezi i rërës dhe u shkatërrohet mundësia për të zhvilluar një ekonomi të qëndrueshme familjare. Fitimet e këtyre resorteve përfundojnë në xhepat e një oligarkie investitorësh, ndërsa zonave lokale u mbetet vetëm dëmi mjedisor, humbja e identitetit dhe zero përfitim real ekonomik.
Nëse qëndrojmë duarkryq dhe bëjmë sikur kjo nuk na përket, radha shumë shpejt do na vijë edhe neve, këtu në Gjirokastër. Do të të vijë edhe ty, në pragun e shtëpisë tënde, në lagjen tënde historike, apo në fshatin që viziton çdo fundjavë. Asnjë kala guri dhe asnjë luginë e egër nuk është e sigurt përpara babëzisë së betonit nëse nuk reagojmë sot.
Experience Gjirokastra mban një qëndrim prerë dhe të ashpër kundër çdo ndërhyrjeje betonizuese që po gëlltit trashëgiminë, natyrën dhe historinë e këtij vendi. Ne refuzojmë të heshtim përpara një modeli turizmi që vret autenticitetin për të ndërtuar hotele me pesë yje mbi habitate të shkatërruara. Ndërtimet e papërgjegjshme në zona të mbrojtura duhet të ndalohen menjëherë. Zhvillimi i vërtetë bëhet duke fuqizuar njerëzit e thjeshtë, duke ruajtur traditën dhe duke mbrojtur çdo pëllëmbë të natyrës sonë.
Natyra dhe trashëgimia nuk janë mallra në sh*tje për blerësin më të fuqishëm. Ngri zërin, mbro atë që na takon të gjithëve. REAGO!!!!
Mbështetje totale për banorët e Zvërnecit dhe çdo komunitet që sot po ngre zërin për të mbrojtur të ardhmen e Shqipërisë!
