Lənkəran şəhər Heydər Əliyev Mərkəzi

13/08/2026

Lənkəranda “Gənclər Azərbaycanın sabahıdır” adlı tədbir keçirildi

Lənkəran şəhər Heydər Əliyev Mərkəzinin, Lənkəran Mərkəzləşdirilmiş Kitabxana Sisteminin (MKS) və Gənclərin İnkişaf və Karyera Mərkəzinin (GİKM) Lənkəran-Astara regional nümayəndəliyinin birgə təşkilatçılığı ilə 12 Avqust – Beynəlxalq Gənclər Gününə həsr olunmuş “Gənclər Azərbaycanın sabahıdır” adlı tədbir keçirildi.

Tədbir Azərbaycan xalqının Ümummilli Lideri Heydər Əliyevin və Azərbaycanın azadlığı, müstəqilliyi və suverenliyi uğrunda canlarından keçmiş şəhidlərin əziz xatirəsinin bir dəqiqəlik sükutla yad edilməsi ilə başladı.

Tədbiri giriş sözü ilə Lənkəran şəhər Heydər Əliyev Mərkəzinin baş fond mühafizi Aygün Əkbərova açaraq Beynəlxalq Gənclər Gününün əhəmiyyətindən, gənclərin ölkənin ictimai həyatında fəal iştirakının vacibliyindən söz açıb. Eləcə də o, prezident İlham Əliyevin rəhbərliyi ilə ölkəmizdə gənclərə göstərilən diqqət və qayğıdan, onların təhsil, elm, mədəniyyət və digər sahələrdə inkişafı üçün yaradılan imkanlardan danışıb.

Daha sonra Lənkəran MKS-nin Kitabişləmə şöbəsinin müdiri Aytən Hüseynova, GİKM-in Lənkəran-Astara regional nümayəndəliyinin rəhbəri Famil Məmmədov, tanınmış ziyalı, rejissor və qiraətçi Cəfər Fətullayev, Lənkəran MKS-nin Boladı kənd 1 saylı kitabxana filialının müdiri Könül İsmayılova çıxış ediblər.

Çıxışlar zamanı gənclərin milli-mənəvi dəyərlərə bağlı, savadlı, vətənpərvər və cəmiyyətə fayda verən şəxsiyyət kimi formalaşmasının vacibliyi vurğulanıb.

Tədbir çərçivəsində müxtəlif tədbirlərdə fəal iştirak edən, ictimai-mədəni fəallığı ilə seçilən bir qrup gənc 12 Avqust – Beynəlxalq Gənclər Günü münasibətilə fəxri fərmanlarla təltif olundu.

Sonda tədbir iştirakçıları xatirə şəkli çəkdiriblər.

02/08/2026

1 Avqust – Azərbaycan Əlifbası və Azərbaycan Dili Günü münasibətilə oxu saatı keçirildi

1 avqust 2026-cı il tarixində Azərbaycan Əlifbası və Azərbaycan Dili Günü münasibətilə Lənkəran şəhər Heydər Əliyev Mərkəzinin elektron kitabxanasında yeniyetmə və gənclərin iştirakı ilə oxu saatı təşkil olundu.

Tədbirdə iştirakçılara bildirildi ki, 1 Avqust – Azərbaycan Əlifbası və Azərbaycan Dili Günü Ümummilli Lider Heydər Əliyevin 9 avqust 2001-ci il tarixli Fərmanı ilə təsis edilmişdir. Bu günün məqsədi Azərbaycan dilinin dövlət dili kimi qorunmasını, inkişaf etdirilməsini və gələcək nəsillərə düzgün şəkildə ötürülməsini təşviq etməkdir.

Qeyd olundu ki, Ümummilli Lider Heydər Əliyev ana dilimizin inkişafına və dövlət dili kimi möhkəmləndirilməsinə daim xüsusi diqqət yetirmişdir.

Daha sonra iştirakçılar kitablarla tanış oldular. müxtəlif əsərlərdən parçalar oxudular.

Tədbir iştirakçılar tərəfindən maraqla qarşılandı.

01/08/2026

1 Avqust – Azərbaycan Əlifbası və Azərbaycan Dili Günüdür.

Dil xalqın yaddaşı, mədəniyyəti və kimliyidir. Onu yaşadan hər gün doğma dildə sevə-sevə danışan insanlardır.

Bu gün Azərbaycan dili bayramını birlikdə qeyd edirik. Bayramınız mübarək!

31/07/2026

“Şəhərsalma və Memarlıq İli” çərçivəsində YAP-ın Lənkəran və Salyan rayon təşkilatlarının fəallarının görüşü keçirilib

29 iyul 2026-cı il tarixində “Şəhərsalma və Memarlıq İli” çərçivəsində Yeni Azərbaycan Partiyasının (YAP) Lənkəran rayon təşkilatının sədri İqbal Əmənullayev, YAP Salyan rayon təşkilatının sədri Elmar Əhmədov, hər iki rayon təşkilatının əməkdaşları və fəalları Lənkəran şəhər Heydər Əliyev Mərkəzini ziyarət etdilər.

Qonaqlar Heydər Əliyev Mərkəzində Ulu Öndər Heydər Əliyevin büstü önünə gül dəstələri qoyaraq əziz xatirəsini dərin ehtiramla yad ediblər.

Daha sonra Mərkəzdə Ulu Öndər Heydər Əliyevin həyat və siyasi fəaliyyətini əks etdirən eksponatlarla yaxından tanış olublar.

Ziyarətdən sonra “Gənc fəallar arasında operativ məlumat mübadiləsi və peşəkar əlaqələrin qurulması” mövzusunda görüş YAP Lənkəran rayon təşkilatında davam etdirilib.

Əvvəlcə Ümummilli Lider Heydər Əliyevin və Vətən uğrunda canlarından keçmiş şəhidlərin əziz xatirəsi bir dəqiqəlik sükutla yad edilib.

Çıxış edənlər bu cür görüşlərin gənclərin həm peşəkar, həm də şəxsi inkişafına töhfə verdiyini, onların yeni bilik və bacarıqlar əldə etməsinə, gələcək birgə fəaliyyət üçün möhkəm əlaqələr qurmasına əlverişli şərait yaratdığını bildirdilər.

Qeyd olunub ki, “Şəhərsalma və Memarlıq İli” çərçivəsində təşkil olunan görüş gənclərin milli memarlıq irsi, müasir şəhərsalma prinsipləri və şəhər mühitinin qorunmasına məsuliyyətli yanaşma ruhunda maarifləndirilməsi baxımından mühüm əhəmiyyət kəsb edir.

Eyni zamanda, partiyanın strateji hədəfləri və gələcək əməkdaşlıq perspektivləri ətrafında geniş fikir mübadiləsi aparılıb.

Tədbir xatirə şəkillərinin çəkilməsi ilə başa çatıb.

22/07/2026

22 iyul Azərbaycanda Milli Mətbuat Günüdür

21/07/2026

Lənkəran şəhər Heydər Əliyev Mərkəzinin rəsm kursunun tələbələrinin növbəti uğuru

17–18 iyul tarixlərində Lənkəran şəhər Heydər Əliyev Mərkəzində fəaliyyət göstərən rəsm kursunun tələbələri İsmayılzadə Arzu, Nəsirova Ləman, Əsgərzadə Aytac və Ağazadə Mədinə universitetlərin "Təsviri sənət müəllimliyi" və kolleclərin "Dizayn" ixtisasları üzrə keçirilən qabiliyyət imtahanında yüksək nəticə göstərərək 9 qiymət alıblar.

Tələbələrimizin hər birini təbrik edir, gələcək təhsillərində uğurlar arzulayırıq.

15/07/2026

Lənkərada "Ulu Öndərin İşığında" adlı tədbir keçirilib

14 iyul 2026 cı il tarixində Lənkəran şəhər Heydər Əliyev Mərkəzinin və
Lənkəran Mərkəzləşdirilmiş Kitabxana Sisteminin birgə təşkilatçılığı ilə Ümummilli Lider Heydər Əliyevin Azərbaycanda siyasi hakimiyyətə gəlişinin 57-ci ildönümünə həsr olunmuş "Ulu Öndərin İşığında" adlı tədbir keçirildi.

Tədbir başlamazdan əvvəl Ümummilli Lider Heydər Əliyevin və Vətənimizin ərazi bütövlüyü uğrunda canlarını fəda etmiş şəhidlərimizin əziz xatirəsi bir dəqiqəlik sükutla yad edilib.

Tədbiri giriş sözü ilə açan Lənkəran şəhər Heydər Əliyev Mərkəzinin baş fond mühafizi Aygün Əkbərova Ümummilli Lider Heydər Əliyevin xalqımız və dövlətimiz qarşısındakı misilsiz xidmətlərindən, onun zəngin siyasi irsindən və Azərbaycanın inkişafında oynadığı tarixi roldan ətraflı bəhs etdi.

Daha sonra çıxış edən Lənkəran MKS-in Uşaq şöbəsinin müdir əvəzi Kəmalə Məmmədova kitabxanalarda Ümummilli Lider Heydər Əliyevin irsinin daim təbliğ olunduğunu, bu istiqamətdə mütəmadi olaraq kitab sərgilərinin, tədbirlərin, görüşlərin və maarifləndirici layihələrin təşkil edildiyini bildirdi.

Tədbirdə çıxış edən Azərbaycanın Milli Qəhrəmanı Əsgər Əliyevin atası Hacı Ələkbər Əliyev, qabaqcıl təhsil işçisi, "Qızıl Qələm Media" mükafatı laureatı Südabə Babayeva və gənc yazar Aynur İsmayıl Ümummilli Lider Heydər Əliyevin Azərbaycan dövlətçiliyinin möhkəmləndirilməsi, milli-mənəvi dəyərlərin qorunması və gənclərin vətənpərvərlik ruhunda yetişdirilməsi istiqamətində gördüyü əvəzsiz xidmətlərdən danışdılar.

Tədbirin sonunda iştirakçılar Lənkəran şəhər Heydər Əliyev Mərkəzində yerləşən Heydər Əliyevin xatirə muzeyini ziyarət edərək Ümummilli Liderin həyat və fəaliyyətini əks etdirən eksponatlarla yaxından tanış oldular

14/07/2026

12/07/2026

Lənkəranda Tovuz döyüşlərinin 6-cı ildönümü qeyd olunub

Lənkəran şəhər Heydər Əliyev Mərkəzinin və Lənkəran Mərkəzləşdirilmiş Kitabxana Sisteminin birgə təşkilatçılığı ilə Tovuz döyüşlərinin 6-cı ildönümünə həsr olunmuş "Tovuz döyüşləri – Zəfərin başlanğıcı" adlı anım tədbiri keçirilib.

Tədbir iştirakçıları əvvəlcə Ümummilli Lider Heydər Əliyevin, eləcə də Vətənimizin müstəqilliyi, suverenliyi və ərazi bütövlüyü uğrunda canlarından keçmiş bütün şəhidlərimizin əziz xatirəsini bir dəqiqəlik sükutla yad edib, daha sonra Azərbaycan Respublikasının Dövlət Himnini səsləndiriblər.

Tədbirdə Lənkəran şəhər Heydər Əliyev Mərkəzinin əməkdaşı Həmidə Məmmədli, Lənkəran Mərkəzləşdirilmiş Kitabxana Sisteminin Boladı kənd 1 nömrəli kitabxana filialının müdiri Könül İsmayılova, Azərbaycan Respublikasının Müharibə, Əmək və Silahlı Qüvvələri Veteranları Şurasının Lənkəran rayon şöbəsinin sədri, Lənkəran Şəhər İcra Hakimiyyəti yanında İctimai Şuranın sədri, "Lənkəran" qəzetinin redaktoru Əlimərdan Əliyev, "Qarabağ" ordenli şəhid Orxan Quluzadənin anası Fatma Quliyeva, Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin Lənkəran rayonu üzrə baş mütəxəssisi, Vətən müharibəsi qazisi Rauf Salayev, "General qızı" romanının müəllifi, Lənkəran Dövlət Universitetinin tələbəsi Aynur İsmayıl çıxış edərək Tovuz döyüşlərinin tarixi əhəmiyyətindən, qəhrəman oğullarımızın göstərdiyi şücaətdən, Vətən sevgisinin və milli birliyin önəmindən danışıblar.

Çıxışlarda vurğulanıb ki, Tovuz döyüşləri Azərbaycan xalqının qəhrəmanlıq salnaməsində xüsusi yer tutur və 44 günlük Vətən müharibəsində qazanılan möhtəşəm Zəfərə aparan yolun başlanğıcı olub.

Tədbirin bədii hissəsində Lənkəran Mərkəzləşdirilmiş Kitabxana Sisteminin Uşaq şöbəsinin müdiri Kəmalə Məmmədova və Lənkəran şəhər 10 nömrəli tam orta məktəbin məzunu Səbinə Əzimova Vətənə və şəhidlərə həsr olunmuş vətənpərvərlik mövzusunda şeirlər səsləndiriblər.

Sonda Tovuz döyüşləri qəhrəmanlarının əziz xatirəsinin xalqımız tərəfindən daim dərin ehtiramla yad ediləcəyi bir daha vurğulanıb.

30/06/2026

Lənkəran şəhər Heydər Əliyev Mərkəzində abituriyentlər üçün təsviri sənət və dizayn üzrə hazırlıq təlimi keçirilib

28 iyun 2026-cı il tarixində Lənkəran şəhər Heydər Əliyev Mərkəzinin təşkilatçılığı ilə gənclərin asudə vaxtının səmərəli təşkili məqsədilə bu il təsviri sənət və dizayn ixtisasları üzrə sənəd vermiş abituriyentlər üçün hazırlıq təlimi keçirilib.

Təlimin əsas məqsədi qabiliyyət imtahanlarına hazırlaşan abituriyentlərə dəstək göstərmək, onların peşəkar bacarıqlarını təkmilləşdirmək və imtahan öncəsi psixoloji hazırlıqlarını gücləndirmək olub.

Qeyd edək ki, Lənkəran şəhər Heydər Əliyev Mərkəzində gənclərin peşəkar inkişafına dəstək göstərilməsi, yaradıcılıq potensialının üzə çıxarılması və asudə vaxtlarının səmərəli təşkili məqsədilə bu kimi maarifləndirici layihələr mütəmadi olaraq həyata keçirilir.