Kholoudmoneim

27/07/2025

21/01/2024

ازيكوا عاملين ايه وحشتوني ❤️✨

اظن بقي في الجو ده مش محتاجين غير طبق عدس وشويه جرجير وبصل اخضر يفتحوا النفس جنبه اكله جميله بتدفي في الشتاء وبتمد الجسم بكم كبير من الطاقه❤️ بس ياتري ايه حكايته 👀
العدس من اكتر الاكلات الشعبيه في مصر والمصريين موقفوش عند شوربه العدس اللي بدفينا في الشتا وبس لا ده طبخوا العدس الاصفر مع الرز (كشري اسكندراني) ، ده غير طبعا العدس الاسود من اهم المكونات الاساسيه في طبق الكشري وبرغم من رخص ثمنه وانه ناس كتير بتعتبره من الاكلات الفقيره الا انه محدش يقدر ينكر قيمته الغذائيه العاليه اللي بتساوي القيمه الغذائية الموجوده في اللحوم .
العدس من ققدم المحاصيل الزراعية اللي انزرعت في مصر من اكتر من ٦٠٠٠سنه ده خلي المؤرخ اليوناني هيرودوت يقول ان العدس كان من الوجبات الاساسية اللي كان بيتناولها بناة الاهرام. ده غير أنه من اول الوصفات المكتوبة في مصر وصفه (هريس العدس) وبيرجع تاريخها للقرن الثالث الميلادي ولقينها مكتوبة علي قطعة من ورق البردي باللغة اليونانية .
وفي العصور الوسطي اتذكر في كتاب (نهايه الرُتبة في طلب الحِسبة)مهنه طباخي العدس من ضمن المهن والحرف الموجوده في العصر ده ، وفي نفس الفتره كمان هنلاقي في كتاب (كنز الفوائد في تنويع الموائد) في القرن ال١٤ اتذكر طرق كتير لطبخ العدس .
كل ده واكتر كمان بيبين لنا قد ايه العدس كان وجبه اساسيه ومهمه في حياه المصريين علي مر العصور لحد انهارده

بس كده 🩵✨

اكتبولي في الكومنتات بتحبوا تاكلوا العدس ازاي❤️✨

27/10/2023

مدوا تغطية شبكات الاتصالات والإنترنت لغزة
Telecom Egypt Vodafone Egypt Etisalat Egypt
Orange Egy - Nile city
الناس بتموووووووو-ت

انسخوها عندكم
ومنشنوا المصرية للاتصالات

20/10/2023

كانت وستظل فلسطين 🇵🇸✨

15/10/2023

08/07/2023

ازيكوا عاملين ايه ❤️✨
وانت راجع من الشغل في الجو الحر ده بيبقي كل تفكيرك امتي هوصل البيت واقعد استمتع بهواء المروحة والتكيف وبتبقي المروحة والتكيف في الوقت ده اهم حاجه في حياتك ده يمكن كمان بتجري عليها اول ما توصل قبل ما تسلم علي اهل بيتك حتي 😅👀 ولكن هل سالت نفسك قبل كده ياتري مين صاحب اختراع المروحة ده 🧐وياتري لو مكنش اختراعها كنا عملنا ايه في الحر ده 🥵😳

الحكايه بتبدأ سنه ١٨٨٢ لما قرر مهندس امريكي عنده ٢٢سنة اسمه (سكايلر سكاتس ويلر ) انه يخترع مروحة كهربائية بتعتمد في استخدمها علي الكهرباء بدل من المرواح اللي بتحتاج جهد بشري وبالفعل اخترع مروحة سطح مكتب بتتكون من شفرتين بدون غطاء واقي وبتشتغل بمحرك كهربائي وتم تسويق المروحة من خلال شركه (Crocker and Curtis electric motor ) .
(ويلر )واصل عمله كمهندس كهرباء في شركة (LEEE) وفي سنه ١٩٠٧ بقي رئيس الشركة ✨وتم إسناد فكرة تطوير المروحة الكهربائية ل(فيليب ديهل ) ده كان مهاجر الماني خسر كل ممتلكاته في حريق شيكاغو سنه ١٨٧١ لكنه حصل علي حصص في الساحل الشرقي واشتغل في شركة (singer sewing machine) ، نرجع لموضوعنا طورها ازاي بقي ركب لها غطاء واقي وخلها ٤ شفرات لكن الموضوع موقفش عند هنا هو قرر انه ياخد محرك ماكينة خياطة وركبلها شفرات مروحة وعلقها في السقف وهنا كانت بداية اختراع مروحة السقف ويقال انه حصل فيها علي براءة اختراع .
الموضوع بدأ ينتشر ويتطور اكتر مع الوقت والسنين وبدأت شركه (Westing house )سنه١٩١٠ انها تروج لمروحة كهربائية للاستخدام المنزلي وكمان موفرة للطاقة ،وفي سنه ١٩٣٤بدأت شركة (Vent-Axia) البريطانيه انها تروج عن مرواح بنوافذ مستقلة مصنوعه من البلاستيك بدل المعدن ، وفي سنه ١٩٣٧تم تطوير صفح بلاستيكي جديد لطلاء شفرات المروحة عشان تكون اكثر هدوء واقل عرضه للتأكل والتلف .
بس كده دي كانت حكايتنا انهاردة 🩵✨

متنسوش تابعوني علي الانستجرام ✨
https://instagram.com/kholoudmoneim96?igshid=13vxxmeiae72z

08/06/2023

مصر بعيون المستشرقين🩵✨
سوق الحرير بحي الغورية بالقاهرة ل(ديڤيد روبرتس)

06/06/2023

ازيكوا عاملين ايه ❤️✨

لو لسه مقرأتش البوست اللي قبل ده روح بسرعه اقراه وتعالي اقراء ده بعديه عشان تفهم الاحداث ماشيه ازاي.
يلا بينا نبدأ✨
وقفنا المره اللي فاتت لما قامت الحرب الاهليه مابين بين انصار وخصوم قيصر نكمل بقي

كليوباترا قررت انها مش هيبقي لها اي موقف في النزاع ده وهتلتزم الحياد لحد ما تشوف الدنيا رايحه علي فين ، انتهت الحرب بانتصار انصار قيصر(أنطونيوس/أوكتافيوس/لبيدوس )سنه ٤٢ق.م وانتهي نظام الجمهورية وبدأ نظام جديد قرره أوكتافيوس يعتمد النظام علي شخص الامبراطور عرف بإسم (المواطن الاول )، وانطونيوس اتولي تنظيم الولايات الشرقية ، واول حاجه عملها انه استدعي كليوباترا عشان تجيله في طرسوس سنه ٤١ق.م عشان يحاسبها علي موقفها السلبي وقت الحرب لكن كليوباترا بررت موقفها بكل ذكاء واقنعته كمان انه يكون حليف لها وده كان سبب تقويه علاقتهم اللي استمرت اكتر من ١٢سنه ، طبعا العلاقه دي اثرت بالسلب علي شعبيته في روما وده خلي أوكتافيوس يستغل الوضع وسيطر علي الولايات الغربيه لنفسه ،وبدأت ترجع طموحات كليوباترا من تاني في السيطره علي العالم الروماني لدرجة انها شجعت انطونيوس انه يدخل حرب ضد أوكتافيوس .

واللي خلي الصراع مابينهم امر لابد منه هو لما انتصر انطونيوس في حملته في ارمينيا سنه ٣٤ق.م شجعته كليوباترا انه يحتفل في الاسكندرية بالانتصار اللي حققه بدل ما يحتفل في روما ودي كانت بمثابه رساله واضحه للشعب الروماني ان الاسكندرية هتحل محل روما قريب ،الموضوع موقفش هنا ده انطونيوس وهب لابناء كليوباترا سواء اولاده منها او ابنها من قيصر الولايات الرومانيه المعروفة باسم (الهبات السكندرية) وطبعا وجود انطونيس في الشرق بشكل دائم كان سبب في ضعف موقفه اكتر وهنا استغل أوكتافيوس الفرصه وقلب الراي العام ضد انطونيوس اكتر ، وسحب سلطه انطونيوس العليا وابطل انتخابه قنصل عام ٣١ق.م ، أوكتافيوس كان ذكي جدا خد طابع القومية لحربه ضد انطونيس وقال ان الحرب دي ضد الملكة الشرقيه اللي بتهدد اسقرار الشعب الروماني واقسم السناتو وسكان روما له بالولاء والطاعة.

وقامت معركه (اكتيوم )٣١ق.م وكليوباترا نزلت مع أنطونيوس ميدان المعركه لكن ده كان له تأثيره السلبي لان قوات أنطونيوس اضيقوا من حاجه زي كده وقالوا انها لازم ترجع مصر لكنها رفضت ، ،ده غير كمان سوء اختيار مكان المعركه وسوء توزيع الجنود كل ده خلي نتيجه المعركه تكون في صالح أوكتافيوس لانه قدر ببساطه انه يستغل حاله الضعف دي ومنع وصول الإمدادات عنهم ده غير تفوق قواته عليهم ، نزل أوكتافيوس في سوريا عشان يستعد انه يزحف لمصر وخلال الفتره دي حاول الطرفين انهم يوصلوا لأتفاق لكن ده محصلش ،ووصل أوكتافيوس للاسكندرية ولما راح عند مدينه الرمل خلد انتصاره في المعركه واطلق عليها اسم (مدينه النصر) مما ترتب عليه أنتحار أنطونيوس سنه ٣٠ق.م
ومكنش قدام كليوباترا غير حلين ملهمش تالت يأما تُساق ذليلة في موكب نصر أوكتافيوس في شوارع روما او الموت فاختارت انها تنتحر لكن حتي في موتها اختارت طريقه ذكية وفريدة من نوعها عشان تفضل في ذكري التاريخ واختارت لدغة الحيه واختارت الأفعي(الحية المقدسة في مصر السفلي) ولبست التاج المزدوج (العقاب رمز مصر العليا،والحيه رمز مصر السفلي )وده لوصفها فرعون لمصر وسيدة القطرين ولدغه الحيه بوصفها إله الشمس وماتت كليوباترا ١٠ اغسطس عم ٣٠ق.م

الحقيقة ان كليوباترا مكنتش مصريه الدم وكانت اصولها مقدونية يونانيه لكنها كانت مصريه الروح وبرغم ان الرومان وضعوا كليوباترا في صورة العاهرة الا انها مكنتش كده خالص بالعكس دي اساءة لها ولتاريخها فبرغم من عيوبها الا انها كانت امرأة ذكية واثبتت انها خصم قوي للرومان وكانوا خايفين منها فعلا وكانت كليوباترا في نظر الشرقيين روح المقاومة ضد الرومان فكان كل اهتمامها هو المحافظة علي استقلال مصر وضمان العرش لابنائها .
وبس كده خلصت حكايتنا ❤️✨

متنسوش تتبعوني علي الانستجرام ❤️
https://instagram.com/kholoudmoneim96?igshid=13vxxmeiae72z

03/06/2023

ازيكوا عاملين ايه✨❤️

(لم يخشي الرومان الا من شخصين أحداهما هانيبال والآخر إمراة)

جملة قالها واحد من اهم المؤرخين عن واحده من اهم واعظم الملكات اللي حكمت مصر وهي كليوباترا السابعة تفتكروا ليه قال عنها كده 🤔
حكايتنا بتبدأ في أواخر عصر البطالمه بالتحديد اثناء فترة من فترات التدخل المسلح الروماني لمصر اللي كانت في الوقت ده ضعيفه جدا بعد ماخسرت ممتلكاتها الخارجية لدرجة انه كان في جيش روماني موجود في الاسكندرية من كتر ما كانت الاحوال في مصر في أسوء حالاتها حرفيا ومفيش حد يدافع عنها والامور بايظة خالص،

هنا بدأت تظهر كليوباترا السابعه بنت عندها ١٨سنه لو هنتكلم علي ملامحها فهي مش بالجمال الصارخ ولكنها تحمل الملامح المقدونية والاغريقية فكانت بشرتها بيضاء مفيهاش جدال دي نهائي .

نرجع بقي لموضوعنا كليوباترا كانت شخصية طموحه وجمالها كان في ذكائها وحسن تصرفها في اصعب الامور ، كانت مثقفة ومطلعه علي مجالات كتير وكانت مقربه منها العلماء وكانت بتتكلم باكتر من٧لغات وكانت الوحيده في عائلتها اللي بتتكلم اللغة المصريه القديمة وده عشان تبقي قريبه من الشعب بالقدر الكافي وكل ده بقي كان عكس شخصية أخوها بطليموس ال١٣ وكان عمره ١٢سنه واللي كان له اوصياء في القصر بيتحكموا فيه ، هنا قررت كليوباترا ان الكلام ده مينفعش وانها لازم تكون المتصرف الاول في امور القصر وحكم مصر وده دخلها في صدام مع اخوها ورجال القصر انتهي بأنها هربت للحدود الشرقية وهناك حاولت تجمع جيش من الاعراب وتستعد انها تزحف للاسكندرية بجيشها ،اخوها كمان جهز جيشه وناوي يواجهها .
علي الجانب الاخر اي شئ كان بيحصل في روما مصر بتتأثر بيه خصوصا بعد موت بطليموس ال١٢(الزمار) اللي هو والد كليوباترا ، فكان في صراع بين أعظم القادة الرومان وقتها (بومبي/يوليوس قيصر)وكان مصير العالم الروماني كله معلق علي نتيجة الحرب الاهلية اللي دارت بينهم سنه٤٩ق.م، (السناتو )كمان اعلن ان قيصر عدو الشعب لكن الصراع انتهي بهزيمه بومبي في معركة (فرسالوس)٤٨ق. م ،وهرب لمصر علي امل انهم يساعدوه ويردوا الجميل وافضاله علي الزمار اللي المفروض اولاده عارفينها كويس لكن ده محصلش واول ما وصل منطقة (بلوزيوم )قائد جيش بطليموس١٣ قتله لان بطليموس خاف لو قدمله المساعده انه يدخل في مشاكل هو مش قدها مع قيصر ، علي عكس توقعات بطليموس ١٣ بقي قيصر لما وصل الاسكندرية سنه ٤٨ق.م اول ما عرف بموت بومبي زعل جدًا ،وعرف بالخلاف الواقع مابين الملك بطليموس ١٣ واخته الملكه كليوباترا السابعة فقرر انه يحكم ما بينهم فجيه بطليموس وجت كليوباترا لكن بطريقه مختلفه شويه دخلت عن طريق البحر ملفوفة في سجاده يحملها راجل وكان المقصود من الطريقه دي انها تلفت انتباه قيصر لها فيستمع لها وتقنعه برائيها ؛ كليوباترا كانت ذكية جدا فمبتعملش اي خطوه وخلاص الا وهي عارفه هي عايزه من وراها ايه وبالفعل ده اللي حصل انبهر قيصر بيها وبجمالها وبذكائها وثقافتها وبقي حليف لها وقال ان وصيه ابوهم تتنفذ ان بطليموس وكليوباترا يحكموا سوي ويتجوزوا واختهم ارسينوي لها قبرص. وبكده الامور تهدأ في مصر ، لكن اوصياء بطليموس معجبهمش الكلام خالص وقالوا زي ما خلصنا علي بومبي نخلص علي قيصر وقامت حرب الاسكندرية و كان من اعظم خسايرها حريق مكتبة الاسكندرية وانهزم الجيش البطلمي امام قيصر اللي استولي بشكل رسمي علي الإسكندرية وهرب بطليموس ال١٣ومات غريق و أرسينوي اتسجنت لمقاومتها للرومان وبكده كليوباترا اصبحت ملكة علي مصر مع اخوها الاصغر بطليموس ١٤ وساب قيصر معها قوات لحمايتها ودعمها قبل رجوعه لروما .
في سنه ٤٧ق. م وضعت كليوباترا طفلها من قيصر وفي سنه٤٦ق.م راحت كليوباترا مع ابنها لزيارة قيصر في روما قيصر استقبلها استقبال ملوش مثيل واقام لها تمثال ذهب في معبد الالهه(فينوس)،،وزي ما المصريين كانوا مش بيحبوا قيصر ، الرومان علي الناحية التانية كمان كانوا كارهين كليوباترا وده بسبب خوفهم انه يحول روما لمملكة شرقية وتكون كليوباترا ملكتها ، كليوباترا فعلا كانت بتطمح لده 👀
الرومان من خوفهم من الفكرة دي خلاهم يدبروا مؤامرة لقتل قيصر ٤٤ق.م وهنا عرفت كليوباترا ان روما مش المكان الامان لها فهربت من هناك ورجعت الإسكندرية.
وفي فجر يوم اغتيال قيصر قامت الحرب الاهليه مابين بين انصاره وخصومه

حكايتنا لسه مخلصتش هنقف كده لحد انهارده عشان البوست بقي طويل جدا وهنكمله كمان يومين وهنعرف ياتري ايه كانت نتيجه الحرب دي وموقف كليوباترا منها وباقي تفاصيل الحكايه ✨👀

متنسوش تتابعوني علي الانستجرام ❤️
https://instagram.com/kholoudmoneim96?igshid=13vxxmeiae72z

27/05/2023

مساءكم جميل ❤️✨

كلنا عارفين الجامع الأزهر لكن كنت تعرف قبل كده ان الجامع الأزهر كان اسمه (جامع القاهرة) لكنه في عهد (العزيز بالله )اتسمي(بالجامع الأزهر )وده نسبةً الي القصور الزاهرة اللي أنشأها ، واتقال كمان انه اتسمي بالأزهر لما سيكون له من شأن كبير في إزدهار العلوم ونسبة كمان لفاطمة الزهراء ✨
بس كده❤️

متنسوش تتابعوني علي الانستجرام🌸
https://instagram.com/kholoudmoneim96?igshid=13vxxmeiae72z

25/05/2023

تعالو نعرف حكايه تمثال نهضة مصر سوي ❤️✨

ومتنسوش تتابعوني علي الانستجرام ❤️
https://instagram.com/kholoudmoneim96?igshid=13vxxmeiae72z