Halla og Hrannar á göngu um Kaupmannahöfn

11/10/2026

KØDBYEN ( #70). Í Kjöthverfinu á Vesturbrú hefur átt sér stað merkileg umbreyting. Ein sú ótrúlegasta í sögu Kaupmannahafnar. Í rúma öld voru hér slátrarar og slátrun, nautgripir og grísir, umfangsmikil matvælaframleiðsla. Nú veitingastaðir, barir, list, menning, skólastarf, sérverslanir, gallerí, skapandi atvinnulíf. Í sömu húsunum. Skoðum Brúnu, Gráu og Hvítu kjöthverfin, rótgróið iðnaðarsvæði sem varð að einu vinsælasta hverfi borgarinnar.

06/09/2026

NORÐURHÖFN ( #69), Nordhavn, er hafnarmannvirki, reist með landfyllingum undir Fríhöfn Kaupmannahafnar sem opnaði 1894. Var blómlegt iðnaðarsvæði í tæpa öld, svo breyttust aðstæður, lokaði endanlega árið 2014. Árið 2009 var gert skipulag um „nýja“ Norðurhöfn, sjálfbæran 5-mínútna bæ; metró, innkaup og náttúra í 5 mín fjarlægð, hvaðan sem er, fótgangandi. Á sólríkum sumardegi fyrir stuttu kíktum við í heimsókn og bjóðum ykkur með ...

10/08/2026

VEITINGASTAÐIR ( #68) í Kóngsins København eru tæplega átta þúsund, þegar allt er talið til. Í miðbænum einum eru 600 með borð utandyra. Framboðið gríðarlegt. Á liðnum 23 árum hefur Kaupmannahöfn tekið stökkbreytingu í flestu sem tengist matargerð, orðin ein helsta matar- eða „gourmet“ borg heims. Við ætlum í veitingastaðatúr og kíkja á nokkra af okkar uppáhalds, og nokkra aðra líka, allir velkomnir með 🙂

06/08/2026

Alls eru „göngurnar“ okkar á fb orðnar 67 á rúmum tíu árum, sú fyrsta í febrúar 2016. Göngurnar voru og eru til gamans gerðar, nýtast okkur til að fræðast um umhverfið. Hvergi nærri hætt, sú næsta er í vinnslu og birtist innan tíðar.

Við erum þakklát fyrir afar góð viðbrögð, það er hvetjandi að vita til þess að margir fylgjast með og lesa og skoða það sem við birtum. Takk fyrir það

En þar sem ekki er auðvelt að finna gamlar göngur á fb-síðunni höfum við tekið saman yfirlit á heimasíðu Jónshúss, þar má finna allar göngurnar 67.

Í febrúar 2016 gengum við hjónin á slóðir Jóns Sigurðssonar. Vorum nýflutt í Jónshús og fannst viðgeigandi að kynna okkur aðstæður sjálfstæðishetjunnar. Settum myndir á facebook og skrifuðum smá texta. Jónsgöngurnar urðu alls þrjár. 

12/07/2026

KIRKJURNAR Í KAUPMANNAHÖFN ( #67) eru margar, merkilegar og sinna margvíslegum hlutverkum. Sunnudag síðla í júní klifruðum við upp á járnhestana og héldum í kirkjurúnt um København. En þar sem kirkjur borgarinnar eru vel á annað hundrað náðum við ekki öllum. 35 komust á blað. Reyndar eru sumar kirkjurnar ekki lengur kirkjur, bara fyrrverandi kirkjur. Flottar byggingar engu að síður. Við bjóðum alla velkomna á kirkjumyndarúnt ... 🚴‍♀️ ⛪️📷

07/06/2026

DUBLIN & BELFAST 26 ( #66). Fyrstu helgina í maí brugðum við okkur, ásamt góðum vinum, til Írlands, fyrst til Dublin í Írska Lýðveldinu, svo til Belfast á Norður Írlandi. Frábært ferðalag, mögnuð saga á báðum stöðum, miklar þjáningar í margar aldir og allt fram á okkar daga, aðallega af völdum Breta. Írar einstaklega vinalegir að heimsækja, borgirnar báðar lifandi og skemmtilegar. Skrifuðum stutta ferðamyndasögu og bjóðum ykkur til Írlands ... I🇨🇮

03/05/2026

SPÍTALAR Í KAUPMANNAHÖFN ( #65) eru mögnuð mannvirki með miklar sögur. Í byrjun apríl skoðuðum við tvo þeirra. Báðir eins og lítil þorp, hálf falin í borginni. Einkennast af glæsilegurm arkítektúr og miklum pælingum. Sá fyrri er Kommunehospitalet sem kalla má Borgarspítalann á íslensku, frá 1863, sá seinni er Sjúkrahúsið á Bispebjerg sem opnaði hálfri öld síðar, árið 1913. Við bjóðum ykkur á spítalarúnt í sólinni ... 🌞

26/04/2026

Sunnudagur í apríl 🌼 gönguferð um Kastellet 🌼🥰