28/03/2021
لعنة الفراعنة تنزل بكل ثقلها على مصر المحروسة وتعاقب العالم كله بكل قوة, الكلام اللي هقوله ده ممكن يبان انه تخريف وجنون رسمي, بس انا هحكي وهعرض عليك بعض الحقايق وانت اربطها زي ما تحب او حتى انكرها, بس لازم تعرف ان العالم اللي احنا عايشين فيه ده فيه من العجايب والغرايب اللي يخليك تتجنن حرفيا..
ايه الجنان اللي بيحصل في مصر ده, وكأنها لعنة الفراعنة بتحلق بجناحيها على سماء مصرنا, خود عندك..
لأول مرة في التاريخ تغلق قناة السويس بسبب علق سفينة بها وتتسبب في اغلاق القناة, وكل يوم مصر بتخسر 15 مليون دولار, وفيه كلام بيقول ان الاقتصاد العالمي نفسه بيخسر 50 مليار دولار زمش عارفين يحركوها من تلت ايام واكتر..
حادثة مروعة في سوهاج بعدها بساعات بس, قطر يخبط في قطر من الخلف ويتسبب في موت اكتر من ثلاثين انسان على أقل تقدير واصابة العشرات
سقوط بناية جسر السويس بعدها بساعات على اهله وتسبب في موت خمسة اشخاص واصابة البعض
سقوط كوبري ترسا اللي تحت الانشاء وانهياره على السيارات والمواطنين وجاري انتشال الجثامين بعد ساعات بس من الحوادث دي
كل ده بقا بيتزامن مع تحضيرات لنقل مومياوات ملوك مصر القديمة من المتحف القديم للمتحف الجديد..
وكل الأماكن دي كانت اماكن لمعيشة القدماء المصريين..
قبل ما تقول عليا مجنون خود الجنان الأكبر...
الكاتب الكبير أنيس منصور أجزم بوجود لعنة الفراعنة بل وقال ان غرق سفينة تيتانيك كان بسبب مومياء فرعونية كانت عليها..
لما اتفتحت مقبرة الملك توت عنخ آمون سنة 1924 واللي بعدها بدأ يطلع علينا لفظ لعنة الفراعنة بسبب ان كل اللي كانوا هناك ماتوا بطرق غريبة..
ممول البعثة مات بالحمى بعد ما وصلت درجة حرارته ل40 د
بعدها مات رجل الصناعة الانجليزي "جول وود" اللي زار موقع المقبرة وبعد الزيارة مات في بريطانيا بالحمى..
بعدها مات المتخصص في الاشعة السينية واللي اول من قطع الخيوط حول المومياء الملكية
وبيؤكد كتاب لعنة الفراعنة انه مع حلول عام 1929 كان قد مات 22 شخص لهم علاقة بالمقبرة بين عمال وعلماء وغيره
عايز جنان تاني, خود عندك..
كتاب قديم ومغمور بيتكلم عن لعنات الفراعنة,بيقول ان المصريين القدماء كانوا بارعين جدا في السحر, وان مصر القديمة كانت أرض السحر , حتى ان الملوك كانوا بيخافوا من غزو مصر لان بها سحر عظيم..
وقال الكتاب ان فيه ساحرة قديمة كانت بترسم على سور كبير شكل جنود كتير اووي لما جيش يهاجم مصر, ولما كانت بتقطع راس اي رسمة من الصور دي كان في المقابل بيموت جندي من جيش العدو بسبب السحر ده..
نيجي للقرآن العظيم واللي ذكر قصة فرعون وذكر كمان قوة السحر اللي وصل ليها القوم دول..
حتى لما سيدنا موسى حول عصا لثعبان واخرج يده بيضاء فرعون قال ده سحر, مع انها معجزة عظيمة, وده ان يدل فيدل ان كان عنده سحرة كبار جدا جدا..
طيب خود عندك الكلام ده اللي انا مش مصدقه بس هعرضهولك..
بتوع الطاقة والفلك بيقولوا
" القمر بيقابل عطارد كوكب النقل والمواصلات, بجانب ان القمر في تربيع مع المريخ الكوكب الاحمر المدمر الغاضب, وان المريخ لما بيربع عطارد بيكون غير مناسب لأي سفر " ده كلامهم مش كلامي..
طيب خود دي كمان "
وَأَتْبَعْنَٰهُمْ فِى هَٰذِهِ ٱلدُّنْيَا لَعْنَةً ۖ وَيَوْمَ ٱلْقِيَٰمَةِ هُم مِّنَ ٱلْمَقْبُوحِينَ ...
الاية دي اتذكرت بعد ما ما اتذكر ان ربنا غرق في فرعون اصلا..
يا ترى ايه هي اللعنة دي المتبوعة معاهم في الدنيا, هل ذكرهم في الانجيل والقرآن, ام انها كمان لعنة على مقابرهم واجسادهم, خاصة ان ربنا ذكر هنا بصيغة الجمع وقال "واتبعناهم" يعني مش فرعون لوحده..
والحقيقة ان بينا وبين المصريين القدماء فجوة زمنية غريبة, مش عارفين نوصل لحد انهاردة لأسرار عنهم كتير جدا, منها السحر واللي ربنا ذكره في قرءانه..
متنساش السحر هو اللي حرق شقة في بور سعيد
السحر اللي بيدمر بيوت ويقتل اناس ويجنن اخرون
السحر اللي ربنا قال عنه "ومن شر النفاثات في العقد"
فما بالك بسحر المصريين القدماء نفسه..
التفسير التاني واللي انا بقوله..
انها اخر العلامات الصغرى للقيامة, وهي كثرة القتل, فلا يدري المقتول فيما قُتل, زي الناس اللي بتموت بسبب تسيب واستهتار اي مسئول..
ده اللي قدرت اجمعه حاليا من المعلومات ولو فيه جديد هكتب لكم, متنساش تكتب وجهة نظرك او اي معلومة عندك في الموضوع ده مهما كانت صغيرة.. هنتظر تعليقاتكم....................... صفحة ارواح واشباح
