16/09/2026
هي ليه الناس بقت تصرفاتها غريبة موخراً ؟
السؤال ده بيتسأل من معظمنا لما بنتابع أخبار الفترة الحالية و تشوف الناس اللي بتظهر على صفحة وزارة الداخلية و تقعد تسأل نفسك.. " هو الموضوع بيكبر؟" و ليه فئة السرسجية و مفتعلين المشاكل و قضايا العنف بتزيد يوم عن يوم؟
ما تقنعنيش ان ده معدل طبيعي لكن السوشيال ميديا هي اللي مكبرة الموضوع... لا ده مش معدل طبيعي و هتلاحظ ان كل ما نرجع بالزمن لورا هتلاقي المعدل ده بيقل و يكاد يكون منعدم
بس انا دايماً أحب ابص من بعيد و أحلل الموقف.. اينعم انا راجل رحال و بحب استكشف الأماكن بس برضة بحب استكشف الناس يمكن اتعلم درس يفيدني و ينفعني فى مستقبلي
و عشان كدة انا هسأل سؤال مختلف ماحدش فكر يسأله
" هي الناس دي بقت كدة بأختيارها و لا هي اتولدت كدة ؟"
ماحدش بيتولد بلطجي ولا سايس و بيفرض اتاوه ولا فيه بنت اتولدت بتنشر فيديوهات خادشة للحياء على المنصات المختلفة
قصدك ايه يا علي؟
قصدك تقول ان فيه حاجة بتحصل للناس تخليها تفقد صوابها ؟
بصراحة اه و بتفرق بين الشخص الجاهل و المتعلم
كل ما كان الشخص جاهل كل ما كانت درجة فقدانه لصوابه أسهل و اسرع ... ولما قرأت قصة " طاعون الرقص " اتأكدت من وجهة نظري و دي قصة حقيقة حصلت بالفعل و لو ما تعرفهاش فخليني احكيهالك الأول و بعدين نكمل كلامنا
أنا مش من النوع اللي بيحب يقول " حضر كوباية القهوة أو الشاي او مشروبك المفضل و تعالى كمل قراءة "
بس بجد انا عايزك تكون قاعد فى وضعية مريحة و مسترخي عشان عايزك تستمع بقراءة كل حرف جاي و أسف لو هاطول عليك شوية بس مش هاتندم والله
أهلاً بيكم فى القصة الأولى من سلسلة
" أغرب قصص التاريخ البشري "
في يوم صيفي حر سنة 1518، وتحديداً في مدينة ستراسبورغ، خرجت ست اسمها فراو تروفي من بيتها للشارع، وفجأة بدأت ترقص! من غير أي مزيكا، من غير مناسبة، ومن غير حتى ما تبتسم.. رقص هستيري، رجليها بتتحرك بحركات عنيفة وكأن فيه قوة غامضة متملكة منها. الناس في الأول افتكروها بتهزر ، بس الساعات عدت، والشمس غربت، وهي لسه بترقص وعرقها مغرقها، ووشها باين عليه الرعب والوجع مش الفرحة خالص.
لامؤخذا تطلع فين ستراسبورغ دي يا علوة ؟
المدينة دي موجودة دلوقتي في شرق فرنسا، على الحدود المباشرة مع ألمانيا (يفصل بينها وبين ألمانيا نهر الراين). لكن أيام قصتنا سنة 1518، كانت المدينة جزءاً من "الإمبراطورية الرومانية المقدسة"
المهم ان الست فضلت ترقص ليومين كاملين لحد ما رجليها جابت دم واغمى عليها من الإجهاد.. بس الغريب إن الكابوس ده ما وقفش عندها. في خلال أسبوع واحد، كان فيه أكتر من 30 شخص نزلوا الشارع ويرقصوا معاها بنفس الهستيريا! وبنهاية الشهر، الرقم وصل لأكتر من 400 شخص.. رجالة وستات وأطفال، الشوارع اتملت ناس بترقص بدون توقف، مش عارفين يمسكوا نفسهم ولا يوقفوا جسمهم.
الأطباء والسلطات وقتها اتجننوا، وما لقوش تفسير غير إن ده "دم سخن" في الجسم ومحتاج يخرج بالرقص الزائد! وبدلاً ما يعالجوهم أو يحاولوا يهدوهم، أخدوا أغرب قرار ممكن تتخيله: بنوا منصات خشبية في وسط المدينة، وأجروا عازفين وموسيقيين محترفين عشان يعزفوا ليل نهار، وجابوا كمان ناس تشجعهم عشان "يسرّعوا شفائهم"!
النتيجة كانت مرعبة؛ الناس بقت تقع ميتة في الشارع من السكتات القلبية والإجهاد الشديد وهم لسه بيتحركوا.. الرصيف بقى مليان دم وأجساد هامدة، والمزيكا شغالة في الخلفية! لما السلطات أدركت حجم الكارثة، قفلوا المسارح الخشبية ونقلوا الباقيين لمزار ديني، وأجبروهم يلبسوا جزم حمرا مع رش مية مقدسة لحد ما الهستيريا بدأت تهدا وتختفي.
الظاهرة دي اتسجلت رسمياً في وثائق العصور الوسطى باسم "طاعون الرقص عام 1518"، ولحد النهاردة العلماء بيرجحوا إنها كانت حالة هستيريا جماعية بسبب المجاعة والفقر الشديد، بس بتفضل القصة دي واحدة من أغرب الأحداث اللي شهدتها البشرية.
اصل الناس ما كانتش بترقص وهي مبسوطة؛ دول كانوا بيصرخوا وبيستغيثوا وعيونهم ثابته وكأنهم في حالة تنويم مغناطيسي. الأطباء وسكان المدينة كانوا شايفين رجليهم بتنزف ومفاصلهم بتنخلع من الحركة العنيفة، وفيه ناس بدأت تموت فعلياً بسكتات قلبية وأزمات نفسية وإجهاد شديد (وصلت أحياناً لـ 15 حالة وفاة في اليوم في ذروة الأزمة حسب بعض المؤرخين).
لما الأطباء والمسؤولين ما فهموش الحالة، قالوا إن السبب هو "الدم السخن"، والحل إنهم يخلوا المرضى يرقصوا أكتر عشان يطلعوا الطاقة دي ويشفى جسمهم وده أدى لزيادة عدد المصابين لأن الموسيقى والزحمة شجعت ناس أكتر يدخلوا في حالة الهستيريا!
لما أدركوا إن الحل ده بيزود الموتى، قفلوا المسارح الخشبية ومنعوا الموسيقى والرقص تماماً في المدينة، ونقلوا المرضى لمزار ديني مخصص للقديس "فيتوس" (St. Vitus)، وهناك لبسوهم جزم حمرا ورشوا عليهم مية مقدسة، ومع الوقت والهدوء بدأت الهستيريا تهدى والناس تفوق تدريجياً في شهر سبتمبر يعنى مع اعتدال الجو
أكيد دلوقتي انت بتقول " استنى بس يا عم علي.. رقص ايه اللي بالأيام و مجاعة ايه اللي تخلي الواحد يرقص؟.. و حتى لو واحد رقص إزاي ٤٠٠ شخص يقلدوه ؟ و ايه وثائق العصور الوسطى دي؟"
أنا معاك اهو يا صديقي و هامشي معاك نقطة نقطة عشان افهمك اللي حصل و تفسيره ايه
وثائق العصور الوسطى دي هي السجلات والحوليات التاريخية اللي اتكتبت في أوروبا من القرن الخامس لحد القرن السادس عشر.
طب مين اللي عمل الوثائق دي أصلاً؟
الرهبان اللي في الأديرة عشان الأديرة كانت هي الملاذ الوحيد للتعليم وقتها. الرهبان كانوا بيقضوا أعمارهم في نسخ الكتب وتسجيل الأحداث اليومية في حلويات او الـ Chronicles
و مع تطور المدن في أواخر العصور الوسطى (زي ستراسبورغ)، ظهر موظفون حكومة شغلهم تسجيل قرارات المجلس، المحاكمات، والضرائب.
و كمان كان فيه مؤرخو البلاط الملكي و دول كان شغلهم الشاغل تدوين أنساب الملوك، معاركهم، والمعاهدات اللي بيبرموها.
إيه أغرب الحاجات المتسجلة فيها تاني ؟
عندك محاكمات الحيوانات مثلاً يعني من أغرب القضايا الموثقة رسمياً؛ كان ممكن خنزير، أو سيل من الفئران، أو حتى ديك، يتحاكموا في محكمة علنية بوجود قاضي ومحامي دفاع! لو خنزير مثلاً تسبب في إيذاء طفل، كان بيتقبض عليه، ويتسجن، ويتحكم عليه بالإعدام شنقاً في ميدان عام.
محاكمات السحرة والهرطقة والظواهر السماوية والكوارث و تدوين دقيق لموجات "الطاعون الأسود" والمجاعات، بجانب رصد ظهور المذنبات أو كسوف الشمس، واللي كانوا بيعتبروها رسائل إلهية أو إنذار بنهاية العالم.
لأن العلم ما كانش متطور، هتلاقي في نفس الصفحة اللي فيها أسعار القمح والمواشي، تدوين لشهادة شخص بيحلف إنه شاف كائن خرافي في الغابة أو معجزة حصلت في القرية!
الوثائق دي هي اللي فتحت لنا الشباك على العقول اللي عاشت في الفترة دي، وفهمتنا إزاي كانوا بيتعاملوا مع الخوف، المرض، والجهل.
نيجي للحالة رقم 1 و اللي البداية و الأنتشار كانت عندها.. الست اللي نزلت رقصت لوحدها
فراو تروفي" ، فضلت ترقص أيام و في خلال 4 أيام انضم لها حوالي 34 شخص، وفي خلال شهر وصل العدد لأكتر من 400 شخص في الشوارع زي ماقولتلك قبل كدة
المعلومات الموثقة عن حياة فراو تروفي (Frau Troffea) قليلة جداً ، لأن المؤرخين والرهبان وقتها ما اهتموش يكتبوا عنها غير لما بدأت الكارثة،
كلمة "فراو" بالألماني يعني "سيدة" أو "مدام"، و"تروفي" ده كان لقب جوزها. كانت ست بيت بسيطة جداً بتنتمي لطبقة الفقراء والفلاحين المطحونين حرفياً في ستراسبورغ، وما كانش ليها أي نفوذ أو شهرة.
لما نزلت الشارع وبدأت ترقص فجأة في منتصف يوليو 1518، جوزها اتخض جداً وحاول يمنعها ويرجعها البيت بالقوة كذا مرة، لكنها كانت غايبة عن الوعي ومستمرة في الحركة بشكل هستيري وكأنها مش سامعاه أو مش شايفاه.
هل ماتت؟
على عكس ناس كتير فاكرة إنها ماتت، فراو تروفي نجت ومامتتش أثناء الرقص! بعد عدة أيام من الحركة المتواصلة ونزيف قدميها، السلطات أخدوها ونقلوها على عربية لمزار القديس "فيتوس" في بلدة قريبة اسمها (زابرن). وهناك بعد الطقوس الدينية وإلباسها الحذاء الأحمر، دمااها٥ هديت وتوقفت عن الرقص ورجعت لوعيها وتصرفاتها الطبيعية.
بعد ما تعافت ورجعت لبيتها، اسمها اختفى تماماً من وثائق المدينة؛ ما حدش سجل تاريخ وفاتها ولا إيه اللي حصلها باقي حياتها، وكأن دورها في التاريخ انتهى بمجرد ما خفت.
زمان كانوا فاكرين ان فيه شيطان لبسهم بس ده من جهلهم مش أكتر.. مع ان ممكن فيه ناس فى عصرنا الحالي تصدق ان انهم ملبوسين عادي و ده اللي خلاني ادور اكتر على موضوع "الأحذية الحمراء" ده اللي استخدموه للعلاج
اكتشفت ان موضوع الأحذية الحمراء ده كان جزءاً من طقس ديني وعلاجي شعبي ارتبط بالقديس "فيتوس" (Saint Vitus)، وكان ليه عدة أسباب ورمزيات في عقليتهم وقتها
اللون الأحمر في الثقافة الدينية وقتها كان بيعتبر لون دم الشهداء (والقديس فيتوس كان من الشهداء).
وإلباسهم أحذية حمراء كان طقس إيماني لربطهم بالقديس وطلب شفاعته ورحمته عشان يرفع عنهم البلاء.
و كان فيه اعتقاد شعبي في العصور الوسطى إن اللون الأحمر (مع رسم علامة الصليب على الجزمة ورش ماء مقدس عليها) عنده قوة روحية بتقدر تطرد الشياطين والأرواح الشريرة اللي كانوا فاكرين إنها متملكة من أجساد المصابين.
ما تستغربش اوي كدة.. ادخل على صفحة وزارة الداخلية و هتلاقيها بتقبض على دجال بمعدل كل 3 أيام.. بيبيع الوهم للناس بغرض جلب الحبيب و لبس العيد و رد المطلقة
و خد عندك بقى.. الدجالين دول كسبوا دهب حرفياً من كتر الناس اللي راحتلهم طلباً للبركة و العلاج
بس يا علي انت بنفسك قولت ان حالتهم استقرت بعد الطقوس الدينية... صح؟
لو عايزين الصراحة.. مش الطقوس الدينية ولا الجزم الحمراء هي اللي ساعدتهم.. هم اتعالجوا بالأيحاء و الوهم
لما السلطات أخدت المصابين لمزار القديس وإجبرتهم يلبسوا الجزم الحمرا ويشاركوا في الطقس، ده شكل نوع من التنويم الإيحائي. العقل الباطن للمرضى -اللي كانوا أصلاً داخلين في حالة هستيريا ونوبة نفسية- اقتنع إن "اللعنة اتفكت بالطقس المبروك ده"، وده ساعد أدمغتهم تهدأ وتخرج من حالة الغيبوبة والرقص لا إرادياً.
طب من الأخر كدة... هو إيه اللي حصل للناس دي بجد ؟
و ايه تفسير الظاهرة دي ؟
العلماء والمؤرخين وأشهرهم المؤرخ جون والير اللي كتب كتاب كامل عن الواقعة خرجوا بتفسيرين أساسيين
أول تفسير هو الاضطراب النفسي الجماعي / الهستيريا الجماعية (Mass Psychogenic Illness)
ده التفسير الأقوى والأكثر قبولاً علمياً. سنة 1518، كانت منطقة الألزاس بتمر بظروف قاسية جداً.. مجاعة طاحنة، فقر شديد، بلأضافة للضرايب الكتير اللي كانت مفروضة عليهم و بتاخدها الكنيسة و اللي سبب زيادة فى الأسعار و ضيق للحال و كل الضرائب دي اللي اخدتها الكنيسة متسجلة فى وثائق العصور الوسطى ( اسم كل شخص و جنب اسمه مكتوب دفع كام) ده غير انتشار أمراض قاتلة زي الزهري والطاعون.
كل ده كان سبب التوتر النفسي والعصبي الرهيب ده، مع انتشار الخرافات الدينية وقتها كمان (كانوا بيعتقدوا إن القديس "فيتوس" عنده قدرة ينزل غضب أو لعنة تخلي الناس ترقص رقص هستيري)، قال يعني غضب عليهم بسبب الظلم و الفساد اللي عايشين فيه... بس القديس هايصب غضبه على الفلاحين ليه ؟ ما كان أولى يصب غضبه و لعنته على الظالمين
المهم ان كل العوامل دي أدت لدخول الناس في حالة تُعرف بـ Dissociative Trance - غيبوبة تفككية
إقرأ المعلومة الجاية دي اكتر من مره و حاول تربط الأحداث فى مخك...
" لما العقل البشري بيوصل لأقصى درجات الضغط العصبي، بيبدأ يقلد سلوك غريب منتشر حوليه بشكل لا إرادي كنوع من الانهيار العصبي الجماعي"
فهمت قصدي صح ؟
يعني لما بيحصل سلوك خاطيء فى المجتمع نتيجة الضغط العصبي بسبب الفقر و الجهل و الجوع و الحر... الناس الغير متعلمة او ماعندهاش وعي بتبدأ تنفذ نفس السلوك الخاطيء بشكل لا ارادي و ساعتها بتبدأ الكارثة.
التفسير التاني كان تسمم فطر الأرجوت (Ergotism)
دي نظرية ثانية بتقول إن الناس أكلت عيش مصنوع من دقيق الشيلم (Rye) الملوث بـ فطر الأرجوت. الفطر ده بيفرز مواد كيميائية بتأثر على الدماغ وشبيهة جداً بمادة (L*D) المسببة للهلاوس والتشنجات العصبية.
بس العلماء بيستبعدوا النظرية دي.. لأن التسمم بالأرجوت بيسبب تقلص شديد في الأوعية الدموية وضعف في العضلات ووجع رهيب في الأطراف، فمن المستحيل علمياً إن شخص مصاب بالتسمم ده يقدر يرقص ويتحرك حركة عنيفة لعدة أيام متواصلة بدون ما يقع فوراً.
هل اتكررت الظاهرة دي قبل كدة ؟
قبل سنة 1518 سجل التاريخ حوادث رقص جماعي مشابهة في القرون الوسطى؛ زي حادثة في ألمانيا سنة 1237 لما مجموعة كبيرة من الأطفال مشيوا ورقصوا بين مدينتين، وحوادث ثانية في سنوات 1374 و1428 في سويسرا وهولندا وإيطاليا.
بس حادثة ستراسبورغ سنة 1518 هي أكبر وأواخر التفشيات الضخمة والموثقة رسمياً لما يُعرف بـ "طاعون الرقص".
بعد القرن الـ 17، ومع تحسن الظروف المعيشية وانتهاء المجاعات والتطور الفكري والمدني، اختفت الظاهرة دي تماماً ولم تُسجل بأشكالها المرعبة دي تاني في التاريخ الحديث.
يعني يا علي انت عايز تقول ان علمياً الضغط العصبي يقدر يخلي انسان يرقص غصب عنه لا إرادياً؟
أيوة بس مش رقص زي ما جه فى بالك ، علمياً وطبياً الضغط العصبي الرهيب يقدر يخلي المخ يترجم الوجع النفسي لـ حركات جسدية لا إرادية معقدة، بما فيها حركات شبه الرقص!
في الطب النفسي والأعصاب، الحالة دي معروفة باسم "الاضطراب العصبي الوظيفي" (Functional Neurological Disorder - FND)
كأنه ماس كهربائي في المخ (Short Circuit).. لما العقل بيتعرض لضغط نفسي أو صدمة فوق طاقة تحمله، مركز المشاعر في المخ (اللوزة الدماغية - Amygdala) بيبعت إشارات خوف وجزع عنيفة جداً.
الإشارات دي بتعطل منطقة التفكير والتحكم الإرادي (القشرة المخية الأمامية)، وبتفصلها عن الفص المسئول عن الحركة.
عشان ابسطهالك اكتر.. المخ لما بيفشل في معالجة الضغط العصبي بيبدأ يفرغ الطاقة دي فوراً في الجسد على شكل أعراض عصبية لا إرادية: زي الشلل الكاذب، التشنجات، أو حركات إيقاعية متكررة ومتواصلة بالرجلين والجذع بتشبه الرقص بالضبط.
ده غير انه ممكن يدخل فى حالة الانفصال (Dissociative Trance State).. الشخص ساعتها بيدخل في حالة شبه "التنويم المغناطيسي"، وده بيخلي الدماغ يشتغل بـ "الطيار الآلي". مراكز التوقف والفرامل في المخ بتكون معطلة، وعشان كده المصاب ما بيحسش بالتعب أو التمزق العضلي غير لما ينهار تماماً او لاقدر الله يموت.
سنة 1518 أهل القرية دي كانوا فلاحين مطحونين بجد.. ماشافوش يوم عدل في حياتهم بسبب الضرائب و المرض و الجوع و الحر
لما نشوف النهاردة و نعرف اللي حصل لقرية زي دي المفروض نتعلم زي ماهما كمان اتعلموا و حياتهم بقت احسن و معيشتهم بقت أفضل و الحالة دي ما اتكررتش تاني ابداً
لازم التعليم بتاعنا يكون أفضل من كدة عشان نقدر نبعد عن الدجل و نفهم ديننا صح... لازم كل صاحب عمل يتقي ربنا فى الناس اللي شغالين عنده و يديهم حقوقهم.. لازم نقلل خرسانه و كباري و نزود زرع و شجر بدل ما نقطعهم
و الا هتبدأ الكارثة و هانشوف مسوخ ماشيين فى الشارع و على السوشيال ميديا و دول بالفعل بدأوا ينتشروا و بشكل ملحوظ و هتلاقي الناس بتأيدهم كمان.
ياريت نلحق نفسنا قبل مانرقص، عشان ساعتها مش هايبقى فيه جزم حمراء تكفينا كلنا و تشفينا
شكراً لو كملت قراءة للأخر و يارب تكون قصة النهاردة عجبتكم
هتلاقي كل القصص اللي فاتت على الهاشتاج ده
او ده
