27/07/2016
منقول من جروب تجربة للإفادة
- مطروح مينفعش تروح و ترجع في نفس اليوم , مطروح لازم تخدها 7 ايام علي الاقل .
- الطريق من القاهره الي مطروح بيخد حوالي 6 ساعات .
- وانتا مسافر خلي في جيبك جنيهات فكه علشان دخول الحمام في الاستراحه ب 2 جنيه :D .
- نام , نمت ؟ نام تاني , علشان الطريق غلس فقضيه في النوم علشان متحسش بيه .
- مطروح درجه الحراره فيها اقل من القاهرة فبلاش تروح الا في عز الصيف لو روحت في 5 و 6 مش هتعرف تنزل البحر من السقعه .
- الشقق في مطروح اسعارها مرتفعه سيكا و خاصه في فصل 7 و 8 , متوسط اسعار الشقق علي البحر من 500 الي 900 في اليوم , صف تاني 400 متوسط , بعد كده من 200 الي 400 جنيه في الليله .
- افضل منطقة للسكن المصيفي في مطروح منطقة العوام .
- اشهر شواطئ مطروح الليدو و روميل و مطروح العام و النخيل و الابيض و عجيبه .
- الشواطئ الكويسه للاطفال روميل و النخيل المياه مفيش فيها امواج و واطيه .
- الشواطئ العامه زي الليدو و مطروح العام و روميل مش هقول وحشه بس هتلاقي فيها شوية زباله ومش صافيه اوي الي هيا .
- شاطئ الابيض ( بلو بيتش ) افضل شاطئ في مطروح بس مشكلته بعده عن البلد .
- لازم تروح عجيبه لازم عجيبه ما هو انتا هتروح عجيبه يعني هتروح عجيبه :D
- الاماكن الي ممكن تخطف رجلك ليها الابيض و عجيبه و الغرام و كليوبترا .
- في سيرك في مطروح زمبقولك كده , بتاع جمال الحلو , هتلاقيه جنب جيلاتي عزه عند فندق المشير احمد بدوي اخر الكورنيش , التذكره ب 40 جنيه , حلو للاطفال مش قد كده للكبار ولو روحته مره متروحش تاني مش هيبقي ليه طعم ولا لون ولا رائحه .
- عاوز تأكل ايس كريم ؟ هتلاقي نستله عامله عربيات في كل انحاء مطروح متجبش منهم , ايس كريم زي الي في السوبر ماركت تحت و بيسيح بسرعه و سعره غالي و طعمه وحش .
- جيلاتي عزه الي عند الكورنيش حلو في واحد تاني عند شارع الاسكندريه مش حلو الاسعار 7 و 10 و 15 , جرب المانجو حلو و بلاش الشوكولاته طعمه مدي علي كاكاو و هتلاقي عندهم فانيليا و ليمون و شوكولاته و مانجو و فراوله , في عندهم رز باللبن و ام علي بس لو معاك عدد كبر دماغك هتلبس جامد علي ايه .
- معاك اطفال ؟ مطروح هتبقي حلوه اوي ليهم لان طول ما انتا ماشي علي الكورنيش هتلاقي ملاهي , الملاهي حلوه , دخلهم الملاهي هينبسطوا و هتنبسط معاهم .
- اكبر ملاهي هتلاقيها جنب جيلاتي عزه في اخر الكورنيش فيها العاب كتير و كبيره ممكن تلعب معاهم انتا كمان يا شقي :D .
- في سينما في مطروح , لا حقيقي , هو كان في 3 بس صفصفوا علي واحده , سينما السلام الصيفي , خلي حد فيكم يتبرع و يروح قبليكم بساعتين تلاته اربعه يحجز ليكم التذاكر و يحجز ليكم الكراسي علشان لو جيت علي ميعاد البدء مش هتلاقي مكان تقعد فيه , السينما ب 15 جنيه صاله و 20 جنيه بلكون , السينما صيفي مفتوحه بس حلوه مشكلتها زي ما قولت في الزحمه بنت ...... .
- مينفعش تبقي في مطروح بلد اللب و متجبش لب ابيض من عند النصر الي في علم الروم , بس خد بالك علشان هتلاقي عشرمين محمصه باسم النصر , فاسأل علي محمصه النصر المسيحيه هتلاقي عليها امم حتي لو الوقت الساعه 4 الفجر ( انه حقا لب فاجر ) :D .
- اعمل حسابك في ميزانيه مخصصه للكراسي و الشمسيات يا زعيم , الثلاثه كراسي و شمسيه ب 40 جندي و ممكن يعمل معاك واجب و يخليهم 4 كراسي و طرابيزه بنفس السعر ومتحاولش تفاصل علشان هتلاقي نفسك بقيت صف 3 علي البحر .
- المم مطروح بلد المم و الاكل كله عاوز اسماك هتلاقي عاوز مشاوي هتلاقي عاوز تكاكي هتلاقي
عاوز تأكل سمك عليك و علي ( اسماك مجدي ) مكانه في شارع متفرع من شارع الاسكندريه ناس علي وضعها السمك بتاعهم علي وضعه البلطي شديد مشكلتهم التأخير و الزحمه يعني هات معاك كرسي و اعمل حسابك في 3-4 ساعات هتقعد تستني السمك يتعمل بس هتأكل سمك تحلف بيه طول حياتك و بلاش تجيب من عندهم شوربة سي فود غاليه و طعمها وحش و كلها اخطبوط متقطع :( .
في جنب مجدي واحد اسمه خالد مش حلو متجبش منه .
وعندك برضه اسماك ابو العربي و حمو التمساح قدام بعض سمكهم حلو بس يتأكل في المطعم
عاوز تأكل مشاوي عندك كمنه و عبده كفته و فتحي و رشا , لا دول مش ولاد خالتي دول بتوع مشويات , مشوياتهم حلوه و خاصه عبده كفته و لو حبيت تأكل هناك كمان احلي و القعده في الشارع مع الجو الحلو ليه مذاق تاني .
بلاش تأكل من الدمياطي حوادق كل من الدمياطي حلويات بس , زي الزفت في الحوادق و مناظر تقرف للاكل و اسعار غاليه علي الفاضي .
متريش ؟ شكلك متريش , عليك و علي كوكو العربي اكل بدوي بقي من الاخر , حلاوتك يا مندي و انتا معدي , وقعده عرب علي الارض كده و انزلي بالصواني و الطواجن بس تقل جيبك علشان كوكو بيزعل جامد
عاوز حلو ؟ في حلو يا حبيبي , عندك هريسة احمد حسنين بيعمل هريسه بالبندق اصلي و قدامه الدمياطي هات منه بلح الشام حلو و خطير
اسعار الاكل في مطروح غاليه نسبيا يعني الفرخه ب 60 و كيلو الكفته ب 140 و الكريب ب 25 و حاجه نيله يعني بس اهو مصيف كع يا معلم .
- مطروح الصبح حاجه و بليل حاجه تانيه خالص ♥ , اضرب الحته التمام و انزل بليل استمتع بجمال مطروح و هواء مطروح و عليل مطروح , روح الكورنيش , الكورنيش حلو
اضرب ترمس , كل دره , اقعد علي السور الي عند البحر علشان الكرسي علي البحر ب 10 جنيه بليل ( ياعمشهنقعد )
اركب بيتش باجي تجربة حلوة و ممتعه النصف ساعه ب 50 جنيه معلش مش هتركبه كل يوم , سهل مش قصه , ايدك اليمين بنزين ايدك الشمال فرامل زييييييييط يا معلم .
العجل حلو برضه ابقي ركب الاولاد عجل و اقعد اتفرج عليهم متبقاش بخيل متركبش لوحدك :D
الكافيهات حلوه في مطروح و كتير و القعده حلوه في الهواء الطلق و هتلاقي الكافيه الي علي قد الايد و الكافيه الي ممكن يخد ايدك رهن علي ما تجيب الباقي و ترجع كله بالحب .
- عين 20 جنيه كل يوم للمياه علي جنب كده اخلص ديه حاجه غصب :D , صاحب العماره هيقولك المياه صالحه للشرب بس فكك هتشتري برضه , وانتا راجع كده بليل تلفح قاروره مياه معدنيه علي دماغك و تطلع عاش يا وحش :D
- بتحب البلاي ستيشن ؟ في مطروح هتلاقي بلاي ستيشن و قعدات عرب من الاخر حاجه قمه المتعه و علي وضعها .
- متنساش تجيب زيتون , الزيتون جميل بتاعهم و الكيلو ب 6.5 جنيه هاتلك شويه روحهم معاك يمكن يغلي زي الدولار من عند سوق ليبيا كده .
- متنساش تبقي تتمشي في شارع الاسكندريه و تشتري شوية لبس و حاجات ملهاش لزمه بس اهو اسمها اشتريت حاجه من المصيف :) اه والاسعار اغلي مش ارخص ولا حاجه .
- مطروح مش بتنام 24 ساعه هتلاقي كله في الشارع و كله فاتح مادما انتا في الصيف انسي .
- فاكهتين مينفعش تبقي في مطروح و متعديش عليهم التين البرشومي و التين الشوكي عسل مخلوط بسكر حاجه كده الواحده بواحدتها و طعمها من الاخر , وبيقولوا البطيخ حلو بس مجربتوش .
- متحكهاش مع العرب كل واحد في هاله يا مهيي .
- مطروح اوضه و صاله يوم فالتاني هتكون عارف شوارع مطروح شارع شارع .
- التاكسيات في مطروح بيتسغلوا الصيف فحاول قبل ما تركب تقوله هتخد كام و ريح دماغك .
- مترميش حاجه في الشارع , المحافظه هناك نظيفة فبلاش تبوظ الي هما بيعملوه في باسكت ارمي فيه الزباله .
- ابقي اعمل ميزانيه علشان ( غزل البنات ) و ( البلالين ) ده لو عندك عيال لو مش عندك بوس ايدك شعر و دقن .
- لو رايح مطروح ومش علي حجز في شقة ومعاك اسرة , روح وديهم يقعدوا علي كافيه او علي شاطئ , وروح انتا بتاكسي شوف العماره الي تعجبك ادخل علي طول علي البواب اسأله علي شقه فاضيه بلا سمسار بلا بتاع وبعدين ابقي ارجع خدهم علي الشقة .
- لو ديه اول مره ليك في مطروح اعرف انك مش هتعرف تروح مصيف تاني علشان مطروح فعلا جنة الله في الارض ♥ .
