17/11/2025
نقول تانى يا جماعة عشان الناس اللى بتتلخبط وكانوا غايبين فى حصة الجغرافيا فى أولى اعدادى
مصر فيها واحات كتير, كلها بتتركز فى الصحرا الغربية فقط.
1- الفيوم وكلنا عارفينها ودى أقرب واحة للقاهرة ( تقريباً 100كم )
2- الواحات البحرية ودى مجموعة من الواحات وهى الأقرب للقاهرة ( 200 كم ), عبارة عن مجموعة من الواحات الصغيرة ( الباويطى - الحارة - العجوز - منديشة - القصر - الحيز ...... ), يُقال أنها سُميت بالبحرية لأنها الأقرب للقاهرة والنيل أو الأقرب للبحر المتوسط وفيها الصحرا السودا وجبل الأنجليز ودى تتبع محافظة الجيزة.
3- واحة سيوة, ودى أنأى الواحات المصرية وأبعدها فى عمق الصحراء الغربية وبالقرب من بحر الرمال الأعظم وحدود ليبيا ومعظمكم عارفينها وتبعد حوالى 800 كم عن القاهرة)
4- واحات الوادى الجديد (الفرافرة والواحات الداخلة والواحات الخارجة) وكلهم مع بعض بيمثلوا محافظة الوادى الجديد ( الداخلة - الخارجة - الفرافرة - باريس ).
* الفرافرة وتتبعها الصحرا البيضا إدارياً وكهف الجارة.
* الواحات الداخلة عبارة عن مجموعة من الواحات الصغيرة زى ( تنيدة - الدهوس - القصر - القلمون - بلاط - أسمنت - الشيخ مفتاح - الراشدة - بدخلو ) يُقال أنها سُميت بالاسم ده لأنها داخل الصحراء وبعيدة عن وادى النيل ( عكس الواحات الخارجة )
* الواحات الخارجة ودى مجموعة من الواحات زى ( الخارجة - ناصر - جورماشين - بولاق - بورسعيد - فلسطين - المكس ) يُقال أنها سُميت بالاسم ده لأنها خارجة ناحية وادى النيل والعمران فى الصعيد.
اللى يهمنا هنا حاجتين :
1- مصطلح الواحات يُطلق على الواحات البحرية وليس الداخلة والخارجة وباريس عشان الناس متتلخبطش.
2- الواحات الداخلة والخارجة والفرافرة وباريس يُطلق عليهم واحات الوادى الجديد.
يعنى لما تقولى عاوز أحجز فى رحلة الواحات يبقا أنت تقصد رحلة الواحات البحرية والصحرا البيضا والسودا .... التانية اسمها رحلة الوادى الجديد
