02/01/2021
يا صباح الخيرات 😊
بم إننا مش عارفين نسافر بسبب الكورونا اللى مطولة معانا دى تعالوا بينا نسافر واحنا فى بيوتنا كل يوم بمعلومة جديدة أو ظاهرة وحدث ممكن نشوفه كلنا واحنا محافظين على صحتنا وصحة اللى بنحبهم.
إيه بقى موضوع الأرض فى نقطة الحضيض؟
يلا بينا نحكى
كلنا عارفين إن الأرض شبه بيضاوية ومدارها شبه دائرى وعشان كدا فالمسافة بينها وبين الشمس بتتغير بنسبة 3 % على مدار السنة. وكل سنة تقريبا فى نفس اليوم بتكون فى أقرب نقطة ليها من الشمس واللى بتصادف السنة دى يوم 2 يناير.
من الناحية الفنية ده معناه إيه بقى؟
معناه إن الشمس هتظهر بشكل أكبر فى السماء من أى وقت تانى، لكن من الناحية العملية الاختلاف يكاد يلاحظ عشان كدا مش كتير من الناس بيتابع يوم زى دا كل سنة.
تمام أنا استفدت إيه لما عرفت المعلومة دى؟
تعالى نكمل المعلومة الأول وأنت هاتعرف بنفسك.
الفصول الأربعة بتحصل بسبب ميل المحور الجغرافى للأرض بزاوية 23.5 درجة عن محورها المغناطيسى ولما الأرض تكون قريبة من الشمس زى دلوقتى فهى بتتحرك أسرع فى مدارها وبتوصل لسرعة 30.3 كيلو متر/الثانية تقريبًا.
دا معناه إنها بتتحرك أسرع بكيلو متر فى الثانية من الوقت الذى بتكون فيه أبعد من الشمس فى أوائل شهر يوليو فيحصل إنه يبقى فصل الشتاء فى نصف الكرة الشمالى اللى مصر فيه بيكون أقصر فصول السنة على عكس فصل الصيف اللى بيكون أطول فصول السنة بالنسبة لنا ودا هانشرحه بتفصيل أكبر لما نتكلم عن ظاهرة (الأوج الشمسى).
وعشان مصر دولة سياحية صحراوية فبيكون دايمًا فصل الشتاء فيها هو الأفضل مناخياً للسياحة الصحراوية لكن للأسف بيكون لمدة قصيرة سنويًا على عكس الموسم الصيفى فى سياحة الشواطئ اللى بيكون ليه وقت أطول طول السنة.
عشان كدا برامجنا السياحية بتختلف من فصل للتانى حسب المناخ اللى بيتغير تباعًا على مدار السنة، لأننا دايمًا معتمدين على العلم فى كل تفاصيل رحلاتنا وجولاتنا معاكم ودا اللى بيميزنا كأول شركة سياحة جغرافية فى مصر.
حافظوا على صحتكم لحد ما نرجع نتقابل تانى ونلف مصر شبر شبر مع بعض من جديد وخليكم فى البيت.
