15/03/2018
يالى ناوى تصيف فى مطروح اتعرف عليها قبل ماتروح
البلد جميله وهوها يرد الروح.......
للناس اللي ناويه تقضي اسبوع😍😍في مطروح👏
- الطريق من القاهره الي مطروح بيخد حوالي 4 ل 5 ساعات 🚌🚌 .
- وانتا مسافر خلي في جيبك جنيهات فكه علشان دخول الحمام في الاستراحه ب 2 جنيه .
- الشقق في مطروح اسعارها مرتفعه شويه و خاصه في شهر اغسطس , متوسط اسعار الشقق علي البحر من 500 الي 900 في اليوم , صف تاني 400 متوسط , بعد كده من 200 الي 400 جنيه في الليله
.
- افضل منطقة للسكن المصيفي في مطروح منطقة العوام . يليها الفيروز وباب البحر
- اشهر شواطئ مطروح الليدو و روميل و مطروح العام و النخيل و الابيض و عجيبه 🏖
.
- الشواطئ الكويسه للاطفال روميل و النخيل المياه مفيش فيها امواج ولا دومات
.
- الشواطئ العامه زي الليدو و مطروح العام و روميل مش هقول وحشه
.
- شاطئ الابيض ( بلو بيتش ) افضل شاطئ في مطروح بس مشكلته بعده عن البلد .
- لازم تروح عجيبه لازم عجيبه ما هو انتا هتروح عجيبه يعني هتروح عجيبه
- الاماكن الي ممكن تخطف رجلك ليها الابيض و عجيبه و الغرام و كليوبترا وباجوش وميناء حشيش واللجونه
.
- في سيرك في مطروح , بتاع جمال الحلو , هتلاقيه جنب جيلاتي عزه عند فندق المشير احمد بدوي اخر الكورنيش , التذكره ب 40 جنيه , حلو للاطفال مش قد كده للكبار ولو روحته مره متروحش تاني مش هيبقي ليه طعم ولا لون ولا رائحه .
جيلاتي عزه الي عند الكورنيش حلو في واحد تاني عند شارع الاسكندريه مش حلو الاسعار 7 و 10 و 15 , جرب المانجو حلو و بلاش الشوكولاته طعمه مدي علي كاكاو و هتلاقي عندهم فانيليا و ليمون و شوكولاته و مانجو و فراوله , في عندهم رز باللبن و ام علي بس لو معاك عدد كبر دماغك هتلبس جامد علي ايه .
- في جلاتي مكه في شارع الاسكندرية جميل ورخيص
_معاك اطفال ؟ مطروح هتبقي حلوه اوي ليهم لان طول ما انتا ماشي علي الكورنيش هتلاقي ملاهي , الملاهي حلوه , دخلهم الملاهي هينبسطوا و هتنبسط معاهم 🎡🎠 .
- اكبر ملاهي هتلاقيها جنب جيلاتي عزه في اخر الكورنيش فيها العاب كتير و كبيره ممكن تلعب معاهم انتا كمان يا شقي
.
- في سينما في مطروح , سينما السلام الصيفي , خلي حد فيكم يتبرع و يروح قبليكم بساعتين تلاته اربعه يحجز ليكم التذاكر و يحجز ليكم الكراسي علشان لو جيت علي ميعاد البدء مش هتلاقي مكان تقعد فيه , السينما ب 15 جنيه صاله و 20 جنيه بلكون , السينما صيفي مفتوحه بس حلوه مشكلتها زي ما قولت في الزحمه
...... .
- مينفعش تبقي في مطروح بلد اللب و متجبش لب ابيض من عند النصر الي في علم الروم , بس خد بالك علشان هتلاقي عشرين محمصه باسم النصر , فاسأل علي محمصه النصر المسيحيه هتلاقي عليها امم حتي لو الوقت الساعه 4 الفجر ( انه حقا لب فاجر ) .
- اعمل حسابك في ميزانيه مخصصه للكراسي و الشمسيات يا زعيم , الثلاثه كراسي و شمسيه ب 70 جندي و ممكن يعمل معاك واجب و يخليهم 4 كراسي و طرابيزه بنفس السعر ومتحاولش تفاصل علشان هتلاقي نفسك بقيت صف 3 علي البحر
.
_ عاوز اسماك هتلاقي عاوز مشاوي هتلاقي عاوز كنتاكى هتلاقي
عاوز تأكل سمك عليك و علي ( اسماك مجدي ) مكانه في شارع متفرع من شارع الاسكندريه ناس علي وضعها السمك بتاعهم علي وضعه البلطي شديد مشكلتهم التأخير و الزحمه يعني هات معاك كرسي و اعمل حسابك في 3-4 ساعات هتقعد تستني السمك يتعمل بس هتأكل سمك تحلف بيه طول حياتك و بلاش تجيب من عندهم شوربة سي فود غاليه و طعمها وحش و كلها اخطبوط متقطع 😞 .
وعندك برضه اسماك ابو العربي و حمو التمساح قدام بعض سمكهم حلو بس يتأكل في المطعم
عاوز تأكل مشاوي عندك كمنه و عبده كفته و فتحي و رشا , لا دول مش ولاد خالتي دول بتوع مشويات , مشوياتهم حلوه و خاصه عبده كفته و لو حبيت تأكل هناك كمان احلي و القعده في الشارع مع الجو الحلو ليه مذاق تاني .
متريش ؟ شكلك متريش , عليك و علي كوكو العربي اكل بدوي بقي من الاخر , حلاوتك يا مندي و انتا معدي , وقعده عرب علي الارض كده و انزلي بالصواني و الطواجن بس تقل جيبك علشان كوكو بيزعل جامد
عاوز حلو ؟ في حلو يا حبيبي , عندك هريسة احمد حسنين بيعمل هريسه بالبندق اصلي و قدامه الدمياطي هات منه بلح الشام حلو و خطير
- مطروح الصبح حاجه و بليل حاجه تانيه خالص ♥ , و انزل بليل استمتع بجمال مطروح و هواء مطروح و عليل مطروح , روح الكورنيش , الكورنيش حلو
اضرب ترمس , كل دره , اقعد علي السور الي عند البحر علشان الكرسي علي البحر ب 10 جنيه بليل ( ياعم مش هنقعد )
اركب بيتش باجي تجربة حلوة و ممتعه النصف ساعه ب 50 جنيه معلش مش هتركبه كل يوم , سهل مش قصه , ايدك اليمين بنزين ايدك الشمال فرامل زييييييييط يا معلم .
العجل حلو برضه ابقي ركب الاولاد عجل و اقعد اتفرج عليهم متبقاش بخيل متركبش لوحدك
الكافيهات حلوه في مطروح و كتير و القعده حلوه في الهواء الطلق و هتلاقي الكافيه الي علي قد الايد و الكافيه الي ممكن يخد ايدك رهن علي ما تجيب الباقي و ترجع كله بالحب
.
- بتحب البلاي ستيشن ؟ 😍 في مطروح هتلاقي بلاي ستيشن و قعدات عرب من الاخر حاجه قمه المتعه و علي وضعها
.
- متنساش تجيب زيتون , الزيتون جميل بتاعهم و الكيلو من 10ل 25 هاتلك شويه روحهم معاك . ومتنساش التين البرشومى من على الطريق وانت مروح طعمه زى السكر 😍 . وكمان العنب الاسمر ملوش حل 🍇 .. اخيرآ اتمنا لكم مصيف سعيد
منقول
