03/03/2024
بعد ماشوفت فيديو عم ربيع بائع البرتقال ورد الراجل الفلس_طيني اللي وصلت له مشاعر التضامن وحس بامتنان.. وشوفت بعدها بوست شبيه لحد مصور علبة جبنة وصلت من مصر مكتوب عليها اهداء..
حبيت أقول حاجة-بصفتي مصرية- اتمنى توصل لأهل غ_ز_ة..
احنا معظمنا عم ربيع، يمكن ده مش واصل لكم، ودي حاجة ماكانتش واصلة لي انا شخصيا عشان عايشة برة مصر، بس لمستها جدا في آخر اجازة ليا هناك..
كلنا قلبنا معاكم، وموجوعين على اللي بيحصل، وبنتألم لفقدكم أي عزيز عليكم، وقلبنا بيتعصر على بكاء أمهاتكم وأطفالكم، مافيش قاعدة من القعدات في مصر بتخلو من الكلام على الوضع عندكم وعن إيه اللي ممكن نعمله، مافيش يوم بيعدي غير لما بنتبادل أخباركم و بندعيلكم، المقاطعة في مصر بقت قضية أخلاقية، المحلات والتجار بيجتهدوا يجيبوا منتجات محلية، الأطفال مع أهاليهم قبل مايشتروا طلباتهم المفضلة بيسألوهم دي مقاطعة ولا لأ، شهداؤكم وأهاليهم والصحفيين والدكاترة بقوا أبطالنا، أعرف ناس راحت عمرات مخصوص عشان تدعيلكم، وناس كتير حزنها على الوضع مأثر على حياتها ومكملين عشان المفروض يكملوا..
يمكن احنا مش عارفين نوصل احساسنا ولا اجتهادنا في اننا نعملكم حاجة زي عم ربيع.. بس يعلم الله ان قلبنا وتفكيرنا معاكم و ان عدم قدرتنا على تغيير الوضع هو عجز وليس تقصير..
ربنا يحفظكم ويثبتكم وينصركم
