28/01/2020
نصيحه لكل مستخدمى المطارات احذر من الاتى
بشوف غلطات يوميا الناس بتقع فيها فمتغلطش غلطتهم :
- وانت مسافر من المطارات المصرية متحاولش تسافر بمبلغ اكتر من ٥٠٠٠ ج مصري و ما يعادل ١٠ الاف دولار باى عملة اخرى غير مصرية ولو حبوا يرزلو عليك وحتى لو قولت معرفش هيتعملك محضر وسفرك هيتلغي.
- لو انت مسافر عُمرة وبتخلص ورقك بنفسك مش عن طريق مكتب سياحة في إجراء جديد اتعمل اسمه بوابه العُمرة بيديك رقم باركود من غيره مش هتعرف تسافر واتأكد إن معاك ورق التطعيمات .
- اتأكد كويس من موقفك من التجنيد قبل ما تسافر .. التجنيد عمل موقع يعتبر أهم إنجاز بعد حرب ٧٣ بتخلص الموضوع بالتليفون بدون سفر وتعب زي الاول.
- بالنسبة للي في سن التجنيد وخد تأجيل أو إعفاء مؤقت لأسباب أسرية لازم يستخرجو إذن سفر وفي حالة انتهاء مدة التأجيل لازم يبقى معاك أصل شهادة الإعفاء وممكن تروح للجوازات تغير الجواز ويبقى مكتوب في الجواز غير مطلوب أسهل ما تجيب الشهادة كل سفرية.
- معظم شركات الطيران بتقفل الكاونتر بتاعها قبل السفر بساعه الا ربع فبلاش تيجي قبل ميعاد الرحله بحاجه بسيطه عشان متضمنش ظروف الطريق أو أي مشكله تظهرلك والرسمي الكاونتر بيفتح قبل معاد الرحله بـ ٣ ساعات.
- متديش تيبس لحد عمل نفسه بيساعدك وبيطلب بعينه قبل لسانه في ناس أولى كتير بصدقتك.
- لو هتساعد حد في الوزن بتاعه وتشيل حاجات بتاعته ف شنطتك برحتك بس لو هتعمل كده يبقى بعد الاكس راي مش قبل ما تدخل المطار قصاد عيني واحدة اخدت اكل من جارتها ولما وصلت المطار وبعد التفتيش اكتشفت ان جارتها خبيت مخدرات جوه بطه ومستقبل البنت ضاع .
- لو بتتزنق من كرسي الطياره اطلب من اللي موجود على الكاونتر يحجزلك كرسي جنب Exit Door.
- لو انتي حامل وعايزه تعرفى امتى مينفعش تسافري ، ده بيختلف حسب بروتوكول شركة الطيران بس لمصلحتك بلاش السفر في آخر شهرين عشان بيبقى خطر عليكي.
- لو بتفكر تعدي الهاند باج بدون ما توزنها وظبطت معاك أكتر من مرة .. ممكن المرة اللي بعدها تتاخد منك وانت على الـ Gate عشان مش متعلق عليها label.
- لو بتسافر على خطوط طيران منخفضه التكاليف بلاش تستغرب إنك مش عارف تجيب حقك منهم لما تقع في مشكله زي ضياع شنطتك أو إلغاء رحلتك لأن لو تعبت نفسك وقريت سياسة شركة الطيران اللي مسافر عليها هتفهم قصدى ايه كويس.
-وانت داخل علي الجمارك ومامور الجمرك يسألك معاك حاجه عليها جمارك متستغربش من السؤال وتقول يعني لو معايا هاقولك معايا...عشان الإجابة بتفرق عند مأمور الجمرك من حسن النية وسوءالنية فلازم تقول علي اللي معاك عشان ميتعملش معاك اجراءمش في صالحك...وقديصل لقضية تهريب جمركي
- بلاش برفانات وسبراي ومقصات وسوائل و ولاعات في الهاند باج عشان هيتاخدو منك في تفتيش السفر الدولي اما الباور بانك خليه في الهاند باج عادي ويستحسن ميكنش أكبر من ١٠ الاف أمبير .
و لو اتسمحلي ازود
١- لف شنطتك ببلاستك في المطار او خلي معاك رول اللف و لفها قبل ما تحطها علي السير ، عشان لو لفتها قبل ما تدخل المطار ، ممكن يطلب منك فتحها في التفتيش .
٢- الشنطة لو بسوستة ، بتفتح عادي حتي لو بقفل و حضرتك مش هتعرف انها اتفتحت . نصيحه لفها ببلاستك
٣- من حقك ١٠٠٠ ملي سوائل ، بشرط العبوة الواحدة لا تزيد عن ١٠٠ ملي و يتم وضعها في اكياس بلاستك ذاتية الغلق.
٤- الكتب، لابتوب، كاميرا، كرسي متحرك، عجله اطفال، طعام للرحلة .
كل دة خارج وزن الهاند باج.
٥- لو حضرتك كبير في السن او عندك مشكله في رجلك، بتطلب كرسي بعجل من الكونتر و بيوفره لحضرتك و بيوفر سيارة مخصوص بترفع حضرتك لحد باب الطيارة و كل دة مجاني.
٦- ما تحطش حاجة ذات قيمة في الشنطة الي هتتحط علي السير ، خلي الحاجات القيمة في الهاند باج.
٧- حاول تخلي معاك طقم لبس احتطياطي في الهاند باج عشان لو شنطتك ضاعت او ما وصلتش ، تلاقي حاجة تلبسها و ما تتسوحش.
٨-اتأكد من معاد الاقلاع و بوابة الخروج و تكون قدام بوابة الخروج مش اقل من ٤٥ دقيقة عشان ساعات بنطلع الطيارة بدري.
٩-لو ابنك معاه كورة ، حاول تفرغ الهوي منها عشان هتتاخد منك لو منفوخه و ابنك هيزن و يعيط عليها طول الرحله.
١٠- بلاش مسدسات لعبة ، مش هتطلع
١١-بلاش هوفر بورد ، مش هيطلع باي شكل
١٢- بلاش الطيارة الي بكاميرا ، مش هتطلع و احتمال انت كمان 😂
- من حقك ترجع تشتري حاجات من السوق الحرة مادام معداش على معاد وصولك ٤٨ ساعه أهم حاجه يكون معاك الباسبور وفي الجمارك هيبص على ختم الوصول.
يارب اكون عرفت أساعد ولو بمعلومات بسيطه
