05/07/2016
البوست ده عن تكلفه السفر والاسباب الى بتخلى الناس متسافرش،
بس قبل ماكتب البوست ده، لازم نكون عارفين ان مقياس الغلو او الرخص بيختلف من شخص للتانى
يعنى واحد شايف ان 3000 جنيه فى السفر ولاحاجه وواحد تانى بالنسباله مبلغ كبير انه يصرفه على السفر.
بس انا هتكلم فى المعتقد اللى عند 99% من المصريين ان السفر غالى و انك لازم تكون مليونير عشان تسافر، ده غير اسباب تانيه بتمنع الناس من السفر زى الفيزا واجيب وقت منين و هسافر مع مين.
اى سفريه ف ايديك تخليها غاليه او رخيصه، تذكره الطياره هى اكتر حاجه بتحتاج فلوس، ف لو خططت صح بمعنى اختيارك لتوقيت السفر الصح هتلاقى اسعار طيران اقل.
خلاصه موضوع سعر التذكره ده، دور فين اقل سعر للتذكره و ظبط وقتك و اجازتك عليه، مش العكس يعنى مش تحدد مواعيد سفرك و بعدين تشوف التذكره بكام وتطلع زى متتطلع بقى.
و نصيحه ابعد عن شركات السياحه، صدقنى مش هيعمل اكتر من الى انت تقدر تعمله، وهتوفر فلوس كتير بيخدوها منك انت اولى بيها.
تانى حاجه مشكله الفيزا، اولا كده باسبورك المصرى بيدخلك دلوقتى ٥٢ بلد من غير فيزا او فيزا عند الوصول ! اه والله ٥٢ بلد!
ثانيا الى عايز يروح بلد محتاجه فيزا زى اوروبا، الموضوع عباره عن ورق، عملت الورق مضبوط و معندكش مشاكل، نسبه الرفض قليله.
ولو سافرتلك كام بلد من الى من غير فيزا هيبقى افضل من انك تقدم على اوروبا و باسبورك ابيض.
ثالثا بقى موضوع انك مش لاقى حد تسافر معاه و كل لم تظبط مع حد يغير رأيه ده وجع دماغ، جرب تسافر لوحدك و صدقنى مش هتبقى لوحدك، هتقابل ناس كتير برده مسافرين لوحدهم و ممكن تشاركهم رحلتهم و هم يشاركوك.
والسفر لوحدك هيطلع منك حاجات انت نفسك مكنتش تعرفها عن نفسك، و تحربه كويسه جدا و بتقويك، و هترجع بعد كدا مش عايز تسافر غير لوحدك اصلا.
كل نقطه اتكلمت عنها فى البوست ده هشرحها بتفاصيل اكتر فى البوستات الى جايه ان شاء الله.
#سافر
