18/06/2024
التجربة الماليزية في الحج الأكثر تنظيما وإتقانا في العالم حقيقي تجربة مشرفة جدا ونموذج يحتذى بيه ✅ ..
لماذا يا صديقي ؟ تعالا احكيلك 📚..
🔵 ماليزيا عندهم مؤسسة وطنية مركزية كبيرة جدا اسمها تابونج حاجي .. اه هيّا اسمها كدا .. وهيّا دي المسؤلة عن تنظيم كل صغيرة وكبيرة في الحج 🏢
🔵 الطفل الماليزي اول ما بيتولد والده ووالدته بيفتحوله حساب ادخار في التابونج حاجي دا بمبلغ اهبل لا يتجاوز الـ ١٠ دولار .. وبيقعدوا يحوشوله كل شوية لغاية ما المبلغ يوصل لـ ٥٠٠ دولار ( بما يعادل ٢٥ الف جم تقريبا) وساعتها انتا كمواطن ماليزي مصرحلك تسجل في بعثات الحج .. لا وكمان الحكومة بتحددلك السنة اللي هاتطلع فيها للحج👌 !!
🔵 ومش بس كدا .. دي كمان بتعملك برامج ادخارية مميزة عشان تساعدك تحوش بسرعة عشان لما سنة الحج بتاعتك تيجي تكون تكلفة حجك متغطية وماتحسش باي أعباء إضافية كمواطن .. طب لو ماعرفتش تجمع المبلغ ؟! .. ولا يهمك يا بيه .. اطلع وهانظبطلك الدنيا وشوية عليك وشوية علينا 😅
🔵 التحضير للحج في ماليزيا مش موسمي زي معظم الدول .. اطلاقًا مطلقا .. من بداية محرم والاستعدادات الجديدة بتبدأ من دورات وتدريبات وكورسات لمدة ساعتين اسبوعياً .. مع وجود امتحانات واختبارات كمان على مدار ٩ شهور تقريباً 👍 ..
🔵 مع بداية شهر شوال بتبتدي التدريبات الفعلية على المناسك في المساجد .. وفي نص ذو القعدة بيعملوا حاجة رائعة و كرييتيڤ جداً 👏 ..
🔵 بيحطوا مجسمات و mock ups للكعبة والصفا والمروة و مكان شبيه للوقوف بعرفة و أماكن لرمي جمرات العقبة .. حجر إسماعيل ومقام إبراهيم والحجر الأسود ..
🔵 دا كمان بيلبسوهم لبس الإحرام عشان يعلموهم اللبس يتلبس ازاي أثناء الطواف .. متخيل التنظيم والتفاصيل واصله لأيه 😳 ؟!
🔵 انتا بتتكلم في محاكاة واقعية بنسبة تصل لـ ٩٠ ٪ من الواقع عشان لما الحجاج الماليزيين يروحوا هناك مايحسوش باي نوع من أنواع الهرج والمرج ✊ ..
🔵 الناس فعلياً بتوصل مكة بيكونوا عارفين هما هايعملوا ايه فين وامتا .. قمة في التنظيم والجمال .. بصراحة ماشوفتش كدا ‼️
تعالى اوريك بقى ذكاء الحكومة الماليزية في معالجة القصة دي كلها 💡 ..
1️⃣ انتا كحكومة وطنية بنيت حبل انتماء قوي جدا بين المواطن وحكومته لأنك لعبت على دعمه في إكمال ركن أساسي من دينه .. ودي اثرها النفسي كبير جدا طبعا ☺️
2️⃣ تشجيع المواطن على الإعداد والادخار للحج منذ الولادة بيضمن ان المواطن يطلع الحج وهوا لسه بصحته وفي شبابه .. وبكدا هاتقلل بشكل كبير تكلفة الرعاية الصحية نظرا لقلة كبار السن 💊
3️⃣ توفير برامج تدريبية وتوعوية للحجاج قبل السفر بيساعدهم يكونوا مستعدين كويس لفريضة الحج .. وده بيضمن ان المناسك تتم بسلاسة وبدون اي مشاكل ..
4️⃣ النظام الرقابي الصارم والتقييم المستمر بعد كل موسم حج بيضمن تحسين مستمر للخدمات المقدمة للحجاج ، وده بيزيد من رضاهم وثقتهم في الحكومة 📉 ..
للأسف الواحد بيحزن وبتصيبه الغبطة لما بيلاقي بلد زي ماليزيا معدية مصر بسنوات ضوئية في حاجة زي دي .. مع ان الموضوع كله شوية تنظيم لا اكثر ولا اقل 🤏 ..
كلمة السر لعدم تكرار المأساة السنوية للحج المصري تنحصر في كلمتين .. الإخلاص والرقابه .. فهل من مجيب!
