11/08/2025
الهرم الاكبر
The Great Pyramid
الهرم الأكبر لخوفو: سرٌّ من أسرار الكون اللى حير العالم بالكامل،تخيّل معايا ملك شاب اسمه خوفو عمل معجزه معماريه حرفيا لنفسه، مش بتكلم عن بيت ولا حتى قصر. لا ده كان بيخطط لـمقبرة بحجم الحلم، بصيغة وإبعاد فلكيه متخيلهاش عقل و أن كل الكلام ده ناس توصله من آلاف السنين ،وبنى المعجزه المعماريه على أساس أنها تقاوم الموت والزمن، وتفضل واقفة لما العالم كله يقع،خوفو هو ابن الملك سنفرو، حكم مصر حوالي سنة 2589 قبل الميلاد، وكان بيكمل مشروع جبار بدأه أبوه الملك سنفرو.
اللي اتبنى في الجيزة مش مجرد هرم ده صرح ضخم طوله الأصلي كان 146.6 متر، يعني أطول مبنى في العالم لمدة 3800 سنة ولكن دلوقتي بقى طوله حوالي 138.8 متر بعد ما الغلاف الخارجي اتآكل ويقال إن الغلاف الخارجي كان عباره عن لون ابيض بيغطى كل اجزاء الهرم وكان كل ضلع من أضلاعه الأربعة كان حوالي 230 متر، وغطّى مساحة تعادل ملعبين ونص كورة قدم و اتبنى من أكتر من 2 مليون و300 ألف حجر مع طبعاً اختلاف الموازين بعضهم وزنه يوصل لـ15 طن وده مش كلام عشوائي، دي أرقام دقيقة ذُكرت في كتاب مارك لينر اللى هو اسمه أسرار البناء عند المصريين القدماء.
اه الهدف الأساسي من الهرم كان يكون مقبرة ملكية، لكن المصري القديم ماكانش بيشوف الموت نهاية لا دي بداية لمرحلة الحياة الابديه والخلود وعلشان كده لقو جواه 3 غرف واحدة سفلية محفورة في الصخر وتحت مستوى الأرض، التانية اللي اتعرفت بغرفة الملكة رغم إنها غالبًا ما كانتش ليها، والتالتة اللى هى غرفة الملك ولقو فيها تابوت جرانيت صلب كل ده مربوط بممرات غريبة وضيّقة ومتشابكة وبعضها كان متجه للنجوم القطبية، كأنها طريق بيعدّي روح الملك للسماء وده دليل على أن قد اى احنا كنا متقدمين فى علوم زى علوم الفلك.
فى بقا حاجه محيره العالم كله وبسببها طلعت تخاريف كتير لدرجة أن الناس دخلت الكائنات الفضائيه فى الموضوع بسبب استحالة الموضوع ولسه الحاجه دى محيره الناس لحد دلوقتي وهى أن إزاي المصريين شالوا أكتر من مليونين حجر؟ ورفعوهم فوق بعض أشهر النظريات بتقول إنهم بنوا ممرات منحدرة ضخمة من الطين أو الطوب، وفضلوا يرفعوا الأحجار عليها تدريجي وفيه كمان نظرية إنهم استخدموا سلالم ملتفّة حوالين الهرم، زي حلزونة ضخمة بيلفوا عليها بالحجارة و لكن المثير بجد، إن اللي كتبوا أسماءهم بالحبر على الحجارة في غرف التفريغ فوق غرفة الملك، ماكتبوش أسامي ملوك بل كتبوا فرق العمال زي أصدقاء خوفو أو اللي بيحبوا خوفو،والناس دي مكانوش عبيد دول كانوا حرفيين ومهندسين وفنيين عاشوا علشان يخلدوا اسم ملكهم واسمهم مع العظمه اللى عملوها.
ومن أكتر الحاجات اللي تخلّي الواحد يقف مذهول، إن الهرم متوجّه ناحية الشمال الحقيقي بدقة تخطّت بعض البنايات الحديثة فى العصر بتاعنا الحالى و إزاي استخدموا النجوم القطبية واللي اسمها في النصوص الإلهة التي لا تموت وحددوا الاتجاهات بالحبال والعصي وحاجه كده اسمها المزوله ،ويقال الهرم ماكانش مجرد مجموعة متراصة من الحجارة ده كان بوصلة سماوية ، وبيبين كده طريق للملك وهو بيصعد للنجوم وده كلام دكتور عبد الحليم نور الدين واللى ذكره فى كتابه موسوعة مصر القديمة فى الجزء الثالث منها.
وفى سنة 2017، فريق دولي استخدم تكنولوجيا اسمها الميونات الكونية وده نوع من الأشعة الكونية بتخترق الأجسام الكبيرة المفاجأة بقا هنا أنهم لقوا فراغ ضخم جوه الهرم، ماكانش معروف قبل كده و سمّوه الفراغ الكبير لحد دلوقتي محدش دخل جواه ولا يعرف هو إيه بالضبط فمش عارفين هل هو غرفة سرية؟ ولا ممر ملكي؟ ولا خدعة معمارية؟
زمان، الناس كانت فاكرة إن الهرم اتبنى بالسخرة لكن الاكتشافات الحديثة بتقول العكس اللى موجود ورا الهرم،و اتكشفت مدينة كاملة للعمال: فيها بيوت و أفران و مخابز ومقابر كمان يعني اللي بنوا الهرم كانوا بيتكرموا وبيتدفنوا قريب من أعظم ما عملوا لأنهم كانوا جزء من واحد من أعظم المشاريع أو أعظم المشاريع المعماريه على الاطلاق .
وبرغم مرور أكتر من 4500 سنة، الهرم فضل واقف فى مواجهة الزلازل والسرقات ومحاولات لهدمه و برغم كل ده وبعد ما كان مقبرة بقى رمز عالمي ملهم للفنانين والمهندسين و حتى مؤلفي روايات الخيال العلمي ،الناس من كل حتة بتيجي تتف*ج عليه وتتصور وتحاول تفهم إزاي اتعمل؟ وليه وهل كان بس مقبرة ولا حاجة أعمق من كده بكتير.
#محمدـشعبان
