29/09/2020
لو عايز تسافر سيوه و تتبسط صح لازم تعمل الكلام ده.. قواعد سيوه العشرين للروقان 😍
بما ان الجو حلو كده فأنا هقولكم النهارده عن قواعد سيوه للروقان
و الانبساط أزاى ..
تقدر تسافر مع مجموعه و ده هيوفر عليك حاجات كتير او تركب اتوبيس غرب الدلتا رايح جي ب 360 ج و هناك كل حاجه تعملها ليها حسابها بس المتوسط اللي هتصرفه لو اتبسطت و صرفت حلو يعني ممكن 2000 ج ل 3 ايام كاملين.
1. أنسى كل وسائل التكنولوجيا " حتى السيلفى :D " ومع اليوم التانى و انت هناك بالفعل هتنسى الموبيل هو Battery low ولا لأ .
2 . لما تسافر سيوه لازم تاكل كريب بلح بالشكولاته من مطعم عبده
3. هناك فى مطعم فوق جبل شالى اسمه " البابنشال " الأسم ده باللغه الأمزيغيه ومعناه باب الدخول , المطعم ده على سطح و جزء من جبل شالي - و أحلى أكله ممكن تاكلها هناك ( فراخ مطبوخه بالزيتون و ملوخيه بطريقه عجيبه وهميه ) و صحيح متنسوش تشوفوا الشروق يوم من فوق الجبل .
4. الأمازيغ " أهل سيوه " هم مصريين زينا زيهم - أتعرف على ثقافتهم و أتعلم لغتهم .
5. لازم تتغدى يوم فى جنينه حد من أهالى البلد
6.أنا كل مره بسافر سيوه بعمل حاجه جديدة لأن سيوه فيها حاجات كتيييييييييير تقدر تعملها .. و خصوصا مكان البيات فى الصحراء :D عشان اشوف الشروق كل مره بشكل مختلف .
7.لازم تبات فى الصحرا و تعمل سفارى و تقضى اليوم بطريقه بسيطه
8.فى سيوه فى نوعين من الكامبات ( الكامب الجاهز بكل حاجه زى أ عثمان و فتحى و الماظه وغيرهم .... تقدر تقدر تسهر و تبات هناك او تبات في كامب انت تجهزه بنفسك فى وسط بحر الرمال الأعظم فى وسط الصحرا من غير حتى صوت الدبانه أنت و النجوم و بس .
9. نيجي بقى لنشاط لازم تعمله - أركبوا عجل و أتحركوا بيه هناك تخيل كده و انت بتتحرك بالعجل يمينك نخل و شمالك بحيره فى شارع صغير و روحوا شوفوا الغروب على بحيره فطناس - اعظم غروب ممكن تشوفه فى حياتك فعلا ( تداخل اشعه الشمس مع خطوط الميه فى البحيره و الدفا اللى بيتسرسب لجسم و انت بتشرب ميلك شيك البلح ) جنه .
10. نيجي بقى على جزيره طغاغين - الجنه الصغيره اللى جوا سيوه - أكواخ و شموع فى جزيره وسط بحيره فى سيوه - شبهه المالديف بس على مصري :D .. روحوا و قضوا ليله هناك او أسهروا على شط البحيره بليل و اتفرجوا على النجوم و القمر .
11. زوروا فندق أدرير أميلال - فندق جعفر - الفندق المصنف بيئيا من احسن الفنادق العالميه - أقل ليله فيه ب 400 ج استرليني أقل حاجه :D - لو حابب تقعد في منتجع رايق و اسعاره حلوه روحوا منتجع سيوه شالي انا بتبسط هناك جدا و في عين ميه سخنه و حمام سباحه، روقان .
12. كل عيون الميه اللى هناك حتى المالحه أنزلوها و أتعالجوا طبيعى ! من أكبر الأماكن فى مصر اللى فيها طرق علاج طبيعى و حمامات الرمل .. أستمتعوا بالطبيعه .
13. لازم تزور منتجع تازيري و تاكل اكل مغربي من الشيف هناك و تقضي اليوم مع أحلى فيو هتشوفه في يومك
14. لازم تعدي علي عثمان و تاكل من ايديه احلي فراخ/بط/لحم مردم في الكون و مكرونه مبقبقه 😍
15. اشتروا زيتون و بلح و كل المتتجات اللي هناك لانها فعلا حلوه جدا جدا من عند مصطفي شالي.
16. لازم تعدوا علي بازار سيوه خصوصا البنات و شوفوا المنتجات اليدويه حلوه ازاي و رخيصه جدا عن اللي في القاهره و احلي و مميزه جدا.
17. لما تروحوا عين كيلوباترا لازم تجربوا مشروب جديد من عند جوبا كل مره بشرب حاجه جديده و بحب جدا المانجا بالريحان ❤️
18. لو قعدتوا مده هناك طويله هتتبسطوا اوي و هتتعرفوا علي الناس أكتر و اكتر.. و هتفصلوا عن العالم القميئ اللي احنا عايشينه و سيوه في الويك اند حاجه و في وسط الاسبوع حاجه تانيه خالص 😍 كأنك واحد من اهل البلد فعلا.
19. زوروا معبد امون و جبل الموتي و ادخلوا الجزء الاثري اللي هناك لسه مليان الوان.. اطلعوا جبل الدكرور و شوفوا الشروق.
20. لازم تنزلوا البحيرات المالحه بس حاسبوا عينيكم لانها بتحرق جدا 😅 و خدوا ملح صخري من هناك و شوفوا سبحان الله قد ايه في جمال في مصر بالشكل ده.
من أهم الحاجات اللى عايزه اقولهالكن استمتعوا بس استمتعوا صح ! متسافروش و تكونوا زوار فى المكان - لأ - تعايشوا معاه :) وقتنا و عمرنا له قيمه .. قدروها صح .
سيوه لسه فيها كتيييييييييييييييييير لازم تعملوه هناك و تعرفوه - اتعرفوا على بلدنا أكتر.
