18/01/2020
بوست طويل فيه كل حاجة عن معرض القاهرة الدولي للكتاب 2020:
قبل ما نبدأ خلينا نقول خبرين حلوين أوي: الخبر الأول إن سور الأزبكية راجع السنادي للمعرض بأكتر من 40 مكتبة وده شيء لو تعلمون عظيم
الخبر التاني إن أخيرًا بقى في تطبيق رسمي للمعرض هتحمله وتلاقي فيه كل حاجة خاصة بالمعرض وخريطة دور النشر وجدول الندوات واللقاءات. (لينك التطبيق في أول تعليق)
نيجي بقى للتفاصيل:
المعرض من السنة اللي فاتت وهو تجربة متميزة ومختلفة تمامًا بعد ما تم نقله لمكان أوسع ومنظم وفي باركينج للعربيات وأماكن دخول خاصة بذوي الاحتياجات الخاصة
هيبدأ إمتى؟
يوم الأربعاء 22 يناير، والدخول للزوار من يوم الخميس 23 يناير (أحيانًا بيفتحوه من أول يوم)، وهيستمر لحد 4 فبراير
فين المعرض؟
في مركز مصر للمعارض الدولية، محور المشير، التجمع الخامس.
خريطة المعرض هتلاقيها أول ما تدخل علطول وعلى الصفحة الرسمية وعلى التطبيق بتاعهم كمان.
أهم العروض والتخفيضات اللي تهمك داخل المعرض:
ابدء بالمرواح للأماكن دي قبل ما فلوسك تخلص D
المعهد القومي للترجمة: خصم حتى 50% للطلبة على جميع أعماله (متنساش كارنيه الكلية لو طالب)
الهيئة العامة للكتاب خصومات لحد 90%، وحقيقي المكان ده من وجهة نظري هو الأفضل داخل المعرض، هتلاقي فيه عروض وكتب متتعوضش
لو عندك أطفال يبقى سيب كل حاجة وروح لمؤسسة الكويت للتقدم العلمي صالة 2 جناح A2 من أجمل الحجات اللي موجودة في المعرض، عروض علمية مجانية للأطفال وكتب ملونة بسعر رخيص جدا وكتب مجانية، حقيقي متفوتهاش.
سور الأزبكية زي ما قولنا رجع السنادي وده طبعا غني عن التعريف، كتب إنجليزي وعربي وموسوعات كبيرة زي موسوعة مصر الفرعونية لسليم حسن بأسعار زهيدة
باقي الدور بيبقى ليهم خصومات وعروض معينة تتفاوت من كل دار للتانية
إيه أهمية المعرض ده؟
الميزة في معرض الكتاب إنه ملتقى عالمي لكل دور النشر والمؤلفين والأدباء من كل أنحاء العالم اللي مبيتجمعوش مع بعض غير في المعرض ده، والسنادي المعرض أوسع وأفضل تنظيمًا، كمان هتلاقي فيه تخفيضات كتيرة جدا على الكتب وندوات ثقافية مميزة وقاعة خاصة بالشعراء. وداخل المعرض بسهولة هتقدر توصل للكتب النادرة وأي رواية أو كتاب مش عارف توصلهم
ترشيحات سريعة جدًا: كتب: تاريخ الجبرتي، قصة الحضارة، مجموعة كتب تاريخ المقريزي (كانت ب 50 جنيه بس من سنتين)، موسوعة مصر الفرعونية (كانت ب200 جنيه تقريبًا)، الأخطاء اللغوية الشائعة في الأوساط الثقافية.
روايات: موبي ديك، الحاج مراد، كتيبة سوداء، السيدة دالواي، 1Q84
نصائح سريعة:
- روح أول الأيام لأن فيها أغلب الخصومات والتخقيضات والهدايا
- هات معاك شنطة وقلم ونوتة وخريطة المعرض ممكن تطبعها أو هتلاقيها بتتوزع هناك .
- حدد ميزانية تروح بيها لأن لو سبت نفسك فلوسك كلها هتخلص D
- متروحش بقايمة كتب معينة، استكشف الكتب هناك وهتلاقي حجات جديدة مختلفة تماما عن اللي أنت مجهزه
-لو أنت طالب متنساش تجيب الكارنيه معاك لأن في تخفيضات خاصة للطلبة من المعهد القومي للترجمة ومكتبات تانية كتير
- متشتريش من أول مرة، واقرأ فهرس الكتاب وموضوعاته
1- ده لينك التطبيق الخاص بالمعرض: https://bit.ly/360FmWG
2- ده اللوكيشن الخاص بالمعرض: https://bit.ly/3ahsoqI
رحلتك سعيدة مع Akira Tour 🤩❣️
