¿Qué es el sitio web?

De cabo a rabo

Casa
España
Allariz
De cabo a rabo

"...terra, agora, se possível, mais amada, porque em milhares de quilómetros e rostos foi vista". José Saramago
(1)

Camiñar non deixa de ser unha descuberta interior e exterior, un sentirse libre, un coidarse, un deter o tempo, porque todo acontece máis lentamente mentras camiñamos. Un coñecer a historia dun lugar e as memorias das súas xentes e valorar así o que somos e de onde vimos.

03/09/2026

Vía Nova ou Vía XVIII. De Bracara Augusta a Asturica Augusta.
Tramo entre Portela de Homem e A Portaxe.

Nesta etapa duns 17 quilómetros escasos de lonxitude entraremos en terras galegas, mudando as paisaxes do Peneda-Gerês polas do Xurés. No noso camiño atoparemos restos desta antiga vía coma a Mutatio de As Mouruás, numerosos miliarios e a Mansio romana de Aquis Ogeresibus. Tamén un valioso patrimonio etnográfico nas aldeas de Vilameá, Pazos, Ribas de Araúxo e A Portaxe, alén do que nos ofrece a vila de Lobios. Eiras de canastros, capelas e igrexas, cruceiros, petos de ánimas e casas reflexo da arquitectura tradicional galega son tan só unha parte do mesmo.

Durante o noso percorrido desfrutaremos de xoias naturais coma a Corga da Fecha, as augas do río Caldo e fermosas panorámicas da serra co encoro de Lindoso ao fondo. Os camiños son bos e están en perfectas condicións. No que respecta á sinalización, direivos que hai marcados dous roteiros paralelos entre sí na primeira parte deste traxecto que acompañan a Vía XVIII: o Camiño da Geira e dos Arrieiros e o Camiño Natural da Vía Nova. Recoméndovos seguir o primeiro até que se unen, pois do contrario non veredes a Mutatio. De todos xeitos déixovos o meu track no Wikiloc (no perfil de “De Cabo a Rabo”) co trazado que considero máis idóneo para ver todos os puntos de interese e cun pequeno desvío duns metros para desfrutar do muíño do Crego e da Corga da Fecha. Encantaravos! 😍

02/09/2026

Edificacións de terróns na Limia. Galicia.

Aínda me lembro cando fun dar por completa casualidade cunha destas singulares construcións na aldea da Lavandeira. Casas, pendellos, peches, cortes e outros anexos de carácter agrícola eran feitos con bloques de terra mesturada con xuncos ou herbas que se deixaban secar ao sol. Esta foi unha solución intelixente e sostible nun territorio sen abundancia de pedra coma era o contorno da antiga Lagoa de Antela, chegando a formar parte así da arquitectura tradicional da Alta Limia.

Podedes ver aínda a día de hoxe exemplos das mesmas nas aldeas da Lavandeira (dúas) Zadagós (unha), Cardeita (catro) e O Castro (dúas), todas elas no concello de Sandiás. E como curiosidade, direivos que Zadagós ten, alén de terróns, unha capela con mooooita historia. Pertencente ao século XVII foi construída por Pedro Pérez, veciño da aldea. O tío deste, que era o cura de Piñeira, deixou ordeada no seu testamento unha misa semanal a perpetuidade que debía celebrarse nesta capela. Para mantela no tempo vinculou a esta fundación varios bens, entre eles 20 ducados en metálico e seis fanegas de pan anuais que pasaron a mans dos herdeiros do fundador. E ollo, que en 1729 debido a súa popularidade, o bispo viuse na obriga de limitar a asistencia á misa até quedar reducida aos familiares do cura para evitar que os demais veciños deixaran de acudir á igrexa parroquial.

Como vedes, tódolos recunchos teñen a súa historia e as súas anécdotas! Espero que vos gusten!

01/09/2026

Ruta do Camiño dos Mortos. Monção. Portugal.

Hoxe achégovos este roteiro circular, de 14 quilómetros escasos de lonxitude, cun nome bastante común. E é que os tempos non sempre foron os que son agora. Décadas atrás os medios eran precarios e, ás veces, trasladar aos defuntos até a igrexa parroquial era un traballo complicado e laborioso. Por este camiño eran transportados os finados en carros de bois, tardando incluso horas en chegar ao seu destino. Aínda é posible apreciar no chan as marcas que deixaron as rodas dos carros ao seu paso.

O noso traxecto comeza con unha subida que se mantén aproximadamente ata a metade do percorrido. Non vou dicir que sexa doada pero sí que ten o mesmo de difícil que de fermosa. Ao longo de singulares sendeiros cheos de verde e sumerxidos en densas forestas acadaremos a aldea de Arado, a partir da cal predominarán as amplas vistas da contorna. Dende ahí dirixímonos a Bouças e pouco despois comezaremos o noso descenso, pronunciado e marcado pola variedade paisaxística, ata chegar ao punto final.

Todo o roteiro está perfectamente limpo e sinalizado, excepto un tramo central que carece de marcación. Déixovos coma sempre o meu track de ruta no Wikiloc, no perfil de “decaboarabo” e anímovos a que a fagades xa que, a pesar de non ser das máis doadas, sí é das máis bonitas.

31/08/2026

Congreso de Medicina Popular de Vilar de Perdizes. Portugal.

Coa súa orixe alá polo ano 1983, chega aos nosos días este congreso que acolleu nesta fin de semana a súa 40ª edición. Fundado por António Lourenço Fontes, máis coñecido coma o Padre Fontes, dá voz á medicina tradicional, a única que estaba ao alcance de todos durante moito tempo na maioría de fogares portugueses e galegos.

É así como, con especialistas e entusiastas de diversas áreas da medicina alternativa, se abordaron temas relacionados co emprego das plantas medicinais, terapias naturais ou técnicas de cura espiritual entre outros eventos. Este congreso constitúe unha cita ineludible coa cultura e para aqueles que non o saibades, foi o berce da famosa Sexta 13 de Montalegre, da que xa vos teño falado en ocasións anteriores.

E unha vez aló, non esquezades percorrer as súas rúas e subir até o baloiço das bruxas, dende o que desfrutaredes dunha ampla panorámica de toda a contorna. É realmente impresionante! Aquí vos quedan unhas fotiños á espera de que vos gusten!

28/08/2026

Ahí vos deixo unha suxerencia para esta fin de semana! 🤩

27/08/2026

Vía Nova ou Vía XVIII. De Bracara Augusta a Asturica Augusta.
Tramo entre Santa Comba e Ponte Liñares. Galicia.

Esta etapa, duns 20 quilómetros de lonxitude, presume de valiosas xoias entre as que destacan especialmente pola súa singularidade a igrexa de Santa Comba ou dentro do patrimonio etnográfico as pozas de aire de Vilela. Igrexas, capelas, cruceiros, eiras de canastros de madeira, antigos lavadoiros, fornos comunitarios e unha curiosa ponte son tan só algúns dos elementos que nos ofrecen as aldeas de Santa Comba, Quintela, Lobosandaus, Vilela, Xordos, Nigueiroá, Garabelos, As Campinas e Barrio. Un desvío opcional ofrécenos a posibilidade de visitar As Termas e o campamento romano Aquis Querquennis. E os que me seguides habitualmente xa sabedes o que vos vou dicir… visita obrigatoria!!!

No que ten a ver coas paisaxes, a variedade é a protagonista. Densas forestas autóctonas, bosques de piñeiros e tramos descubertos que nos permiten deleitarnos con amplas panorámicas coma a do encoro das Conchas, farán que o camiño resulte do máis entretido. Excepto un pequeno tramo ao pasar a zona de Güín na que imos dicir que as silvas son demasiado sociables, o resto do percorrido está limpo e bastante ben sinalizado. Así e todo déixovos coma sempre o meu track de ruta no Wikiloc. Polo resto conta con pequenas subidas e baixadas que non revisten grande dificultade.

Ahí vos quedan unhas fotiños para ver se vos animades! 🤗

Dirección

Allariz

Página web

http://decaboarabo.org/

Notificaciones

Sé el primero en enterarse y déjanos enviarle un correo electrónico cuando De cabo a rabo publique noticias y promociones. Su dirección de correo electrónico no se utilizará para ningún otro fin, y puede darse de baja en cualquier momento.

¿Quieres que tu empresa sea el Agencia De Viajes mas cotizado en Allariz?