¿Qué es el sitio web?

https://www.facebook.com/110610197414725/

MeiGaliza Turismo, Ortigueira (2026)

08/04/2021

• Cando paseamos por Ortigueira é imposible non fixarse no gaiteiro xigante, unha escultura que nos lembra á cultura celta, que nos lembra o maior evento do ano en Ortigueira, o festival! 🎶

O festival de Ortigueira, unha cita obrigada para os amantes do folk e da música celta; un dos eventos musicais máis multitudinarios de toda España. 🎟

Un festival que mantén o seu carácter folclórico e o seu espírito de liberdade dende o 1978, ano no que naceu o que era daquela o festival artesanal, da man da Escola de Gaitas de Ortigueira.

Un festival que foi medrando e incluímdo medidas e servizos para facer máis agradable a experiencia aos seus asistentes, medidas coma autobuses de balde, aparcadoiros vixiados, duchas, aseos e puntos de información. ℹ️

O Festival de Ortigueira é música, música celta que une a todos os pobos celtas nun mesmo lugarl e que reúne tamén ós amantes da música folk. Para iso o Festival conta con dous escenarios: O escenario Estrella Galicia, no que as grandes estrelas do folk interpretan a súa música para o deleite dos espectadores, e o escenario Runas, no que descubrimos novos grupos e cantantes que quen sabe! Poden chegar a ser grandes estrelas! 🎤🥁

Pero os escenarios non son os únicos atractivos do festival, cómo non, temos que ter o desfile de gaiteiros dos pobos celtas, ademáis de espectáculos teatrais e de marionetas, exposicións, e a feria de artesanía, situada no paseo marítimo.

E claro, non pode ser todo festa durante catro días, algo hai que durmir… e onde? Pois no piñeiral de Mourouzos! Hai un sitio mellor para colocar a túa tenda que debaixo da sombra dos piñeiros e con vistas á praia? 🏕

O Festival de Ortigueira, un festival con forza que foi declarado Festa de Interese Turístico Nacional en 2003, e que só dous anos despois recibiu o título de Festa de Interese Turístico Internacional! Dous títulos máis que merecidos, porque quen non sentiu a maxia do festival cunha Estrella Galicia na man, e pechando os ollos para desfrutar máis da música? Quen non foi pasear nunha tarde asollada á feira de artesanía? ☀️

Ti non a sentiche? Pois non te perdas a próxima edición! 🤞🏽🎶

📸 algunas fotografías pertenecen a

29/01/2021

• Unha visita obrigatoria se vas a Ortigueira, non! Perdón! Se andas polo noroeste de Galiza, son os Cantís de Loiba.
Que nunca oíches falar dos Cantís de Loiba!? Non mo creo! Quén non oíu falar do “Best bank of the world”? O banco do miradoiro de Coitelo é coñecido dende xa fai anos coma “O mellor banco do mundo”, non porque o banco sexa especial, senón porque ten unha das mellores vistas do mundo. Ademáis dunha historia do máis peculiar, que deixamos na última foto deste post, e tamén na carpeta destacada de “Ortigueira” 😉

O banco de Loiba ganou a súa actual popularidade no 2015, cando unha foto desta paisaxe ganou o concurso “Earth and Sky Photo Contest on Dark Skies Importance”, un concurso de renome internacional que busca as mellores fotos nocturnas do mundo. 🌌

Pero os cantís de Loiba son moito máis ca o banco, son quilómetros de cantís e praias impresionantes!

Dende o mirador de Pena Furada, situado enriba da praia de Sarridal, pódese ver unhas panorámicas das numerosas praias salvaxes que compoñen a costa de Loiba, unhas praias de difícil acceso coñecidas pola súa riqueza en algas vermellas, en especial a Praia do Carro, que debe o seu nome aos carros que baixaban a recoller as famosas algas. As “algueiras” eran as encargadas de recollelas, un traballo duro, realizado entre o mes de xuño e o de outubro, só uns 5 días ao mes, os días de baixamar. Cada unha desas mulleres podía recoller entre 150 e 200 kg ao día!!! 😱

Pero o miradoiro recibe o seu nome da pena situada na auga, preto da praia de Sarridal. A Pena Furada fai inconfundible a paisaxe da praia! Esta Pena ten dúas perforacións que asemellan a uns pórticos. Ver as ondas bater contra a pena e meterse polos seus pórticos é un espectáculo digno de ver.
😍

Os cantís de Loiba, sen dúbida un lugar onde o mar todo o cura! 🌊

•

20/01/2021

• Ortigueira 📍

Ortigueira é terra de contrastes, terra de mar, terra de montaña, fogar do Mundo Celta, terra de historia, fogar do “best bank of the world”.

O municipio máis grande e poblado da comarca de Ortegal, un municipio no que podemos ver praias, montes, muíños, castros, acantilados, piñeirais, tradición celta, rúas e rúas nas que pasear... e incluso un porquiño! 🐽

Pero claro, como lle imos pedir menos a un concello con nada máis e nada menos que 22 parroquias! 😱

Cando nos din Ortigueira a todos nos ven á cabeza o son das gaitas 🎼, pensamos no Festival do mundo celta, e claro, non é para menos, xa que é o maior festival celta da Galiza!

Pero Ortigueira agocha moito moito máis ca unha festividade… quilómetros de praias, praias naturais, algunhas rodeadas de piñeirais, outras a curtos metros do pobo, quilómetros de costa, de acantilados onde baten de forma brusca as ondas do océano atlántico.

Montes, río, fermosas fervenzas...

Muiños e castros cheos de historia, unhas rúas con encanto…

Ortigueira é isto e moito máis... estades listos para descubrilo con nós? 🤩

•

16/01/2021

Meigaleg@s! 📢🗯

As máscaras que sorteamos en decembro gustaronvos moito... polo que decidimos poñelas á venda! 🤩

Encarga a túa por mensaxe directa ou no correo electrónico [email protected] ✉️

PVP 10€ + gastos de envío 1’5€

09/12/2020

No Instagram de MeiGaliza Turismo estamos de sorteo por ser xa máis de 600 Meigaleg@s! 🥰

Aínda non nos segues no Instagram? Queres participar? Pois entra en .turismo e descubre cómo facelo 😜

06/12/2020

• PAN DE NEDA 🍞

A que ule Neda? A pan, a pan recén enfornado... Pero non un pan calquera, ule a Pan de Neda! 🥖
E por que é importante o pan de Neda? Pois porque o dí a historia, e se non o sabes só tes que probar un anaquiño! (de pan, non te comas a historia jajaja)

Neda tivo sempre unhas condicións perfectas para que o seu pan fora tan excepcional.
O gran protagonista é o río Belelle, xa que grazas á forza das súas augas fixéronse muiños ó longo do seu paso pola vila. Algúns deles eran muíños de trigo, trigo que se convertía en fariña, a fariña que se usaba para o pan, e é mais, a propia auga do río Belelle tamén se usaba (e aínda se usa) para facer o pan. 💧

O pan que se cocía e se coce nuns fornos de leña, con leña de castiñeiro. 🌳
Os primeiros datos que encontramos do pan de Neda datan do século XV, onde se di que co pan de Neda os señores de Andrade agasallaban aos seus invitados máis ilustres.

Felipe II no 1588 escolleu Neda para instalar as Casas Reais de Biscoitos e Galletas, ademáis dos fornos de provisión de pan para a armada. Estos motivos, ademáis de moitos outros, fixeron que Neda fora considerada a capital do trigo ata comezos do século XIX! 😧

Hoxe en día o pan de Neda segue sendo un dos máis famosos de Galiza, e poderás atopar puntos de venta en case todo o territorio. O Pan de Neda ten ademáis rexistro de Marca de Calidade! ✅

Grazas ao pan Neda ten tamén unha festa de Interese turístico de Galiza, unha festa que celebraría este 2020 a súa 32 edición. Celébrase o primeiro domingo de setembro, e na festa ponse en valor o pan de Neda. Nela todos os panadeiros de neda poñen os seus postos para vender o pan dende a mañá ata a noite, e cando se acabe o pan a festa estará amenizada por música tradicional, un xantar popular a prezo razoable, talleres de pan, e máis concertos ata a noite! 🎼

E nestes tempos tan complicados recomendámosvos non agardar á festa para probar o pan de Neda, todo un pracer para as vosas papilas gustativas!
E ti? Xa probaches o pan de Neda? 😋

18/11/2020

• Meigaleg@, pecha os ollos, e imaxina Neda…

Ule ese rico olor a pan recén enfornado, escoita a auga caendo brava pola fervenza do Belelle, e baixando polo río, cruzando a vila... mira aos cativos, e non tan cativos, paseando e xogando polo paseo marítimo, e camiña, percorrendo o camiño de Santiago. 🥾

Situada ao fondo leste da ría de Ferrol, Neda ofrécenos dende o seu milladoiro de Ancos unhas vistas espectaculares á ría… onde se nos ven sempre á cabeza unha escena na que diríamos “Velo fillo? Algún día, todo isto será teu” 🦁... unha sensación de reinado e de paz nos produce este lugar.

Dende o milladoiro, cuns prismáticos poderíamos facer unha visita de Neda, pero non hai nada como ver as cousas de cerca… respirar o aire puro da natureza paseando pola veira do río Belelle, un río que comeza o seu traxecto por Neda na súa parte máis salvaxe, para logo atravesar toda a vila ate desembocar na ría. 🌊

Unha vila tamén atravesada polo camiño de Santiago, que recorre na súa primeira etapa as rúas do casco antigo, onde desfrutar da arquitectura e, como non, parar nalgunha das numerosas panaderías, a comprar pan de Neda… podemosche asegurar que non te poderás resistir ao seu olor… o pan non chegará enteiro á casa. 😉

Unha vila na que aprender da cultura castrexa, cos seus dous claros exemplos, o castro o do monte Marraxón e o castro de Ancos.

Unha vila que nos ofrece un largo paseo pola beira da ría, no que poder disfrutar das vistas, dos patos na auga e de numerosas especies de aves, e da tranquilidade que se respira.

Neda… unha vila para todos os sentidos. ✨

02/11/2020

• Moeche non esquece todo o vivido no medievo, esa loita incansabel dos irmandiños contra os señores porque xa naqueles tempos, sabían que esa xustiza non era xusta.
Por iso cada ano, o penúltimo fin de semana de agosto, celébrase o Festival Irmandiño. Un festival que surxe da necesidade de reivindicar a cultura e a historia do pobo de Moeche e o pobo galego, un festival de música folk, que conta sempre co apoio dos mellores músicos galegos e foráneos do xénero. Un festival organizado pola asociación A.C. Festival Irmandiño.

Un evento para todos os públicos, que conta cunha repichoca o venres, cun asalto infantil para que os máis pequenos poidan tamén sentirse irmandiños, unha competición de xogos tradicionais, concertos de música en vivo, e o gran asalto ó castelo, introducido polo pregón o sábado, e unha sesión vermouth (en Galiza que nunca falte) ó pe do castelo o domingo. 🏰

Un festival que conta xa con 41 edicións e na que participaron artistas e grupos de renome como Milladoiro e Susana Seivane. Tamén coa máis que coñecida Sés, que sempre enche o campo do festival, Huntza, os vascos que chegaron e namoraron aos irmandiños, e Tanxungueiras, que xa son da familia irmandiña. 🎶

A noite máis especial é a do sábado cos concertos, pero sobre todo co pregón e co asalto. O pregón é a columna vertebral do festival, a reivindicación cultural e social que se necesitaba no medievo e que segue necesitándose agora, por iso existe o Asalto Irmandiño, pola loita día a día, polos abusos que o pobo sofre, e non podía atopar mellor forma de reinvidicalo que coa recreación do que foron as revoltas, os irmandiños armados de fachos 🔥, que camiñan dende o campo do festival ata o castelo. Unha vez alí simulase a loita e o derrumbamento do castelo coa victoria irmandiña.

E para os máis irmandiños, 3 días de festival saben a pouco, por iso a A.C. Festival Irmandiño organiza eventos ó longo do ano coma o Xantar Irmandiño, unha comida ó pé do castelo na que intentan recrear na medida do posibel o entorno medievo. O 1° xantar celebrouse en 2019, pero sabemos que cando isto mellore haberá máis e poderedes desfrutar desta magnífica experiencia.

Irmandiños, lumeee!!!🔥

18/10/2020

• O Castelo de Moeche 🏰

Un impresionante castelo medieval do S. XIV. Un castelo de lendas? Non! Un castelo de historia. Unha historia que segue moi presente na memoria e corazón d@s modestin@s, e do resto de galeg@s: a historia dos Irmandiños. Un castelo cunha ubicación canto menos peculiar, un castelo construído no val de Moeche, tamén coñecido como “Fondo de Moeche”. Agora entendedes por qué é peculiar a ubicación?📍

Os castelos tenden a estar na parte máis alta das terras que teñen que vixiar e protexer, pero o de Moeche é diferente. Por qué? Pois porque máis que un castelo defensivo, construirse para estar preto dos habitantes do val, para controlar as súas colleitas, xa que o val era, e é, un lugar moi fértil e con moita produción agricola, da que os señores se beneficiaban. Pero a situación do castelo compensouse coa Torre de Vixiancia, chamada a Torre do Homenaxe, de 18m de altura, dende a que poder ver todo o val, e cun foxo defensivo que rodeaba todo o perímetro do castelo.

Unha fortaleza resurxida das súas cinzas. Na segunda Revolución Irmandiña (das que vos falaremos noutro “post”, xa que merecen o seu propio) o Castelo primitivo foi destruído polos Irmandiños. Ese primeiro castelo era moito máis pequeno ca o actual e, tras perder a batalla os Irmandiños (sentimos o spoiler 😉) o Sr. do castelo, García Rodríguez de Valcarcel, obrigounos a construír o actual castelo, increíblemente máis grande e mellor defendido ca o anterior, do cal non puidemos comprobar a súa resistencia xa que non volveu ser atacado, pero como xa sabedes o dito, mellor previr que curar.. e que cousa máis bonita nos deixou a prevención!

Un castelo en moi bo estado no que poderás transportarte á época dos señores, dos cabaleiros e das doncelas. No que descubrir un pouco máis dos nosos antepasados!
Ademáis, nel poderedes ver a exposición temporal que alberga, con artigos recuperados no castelo no momento da súa reforma.

E contaredes coa magnífica axuda do persoal da Oficina de Turismo do Concello!

Queremos darlle as grazas ó , e en especial a Ramón Carballeira pola increíble visita guiada! 👏🏽

Xa sabedes, visitade o Castelo de Moeche e viaxade ao Medievo!⚔

13/10/2020

• MOECHE 🏰

Moeche... terra de revoltas, terra de feiras, terra de cabalos, terra de gando, terra de xente traballadora, terra que namora.

Este pequeno municipio agocha moitos segredos. Un castelo medieval, cunha situación peculiar, e a memoria das Revoltas Irmandiñas, sempre presente entre os modestinos. Un patrimonio tanto cultural, coas igrexas, fontes, cruceiros, etc, e xeolóxico: a pedra de Moeche, e as minas creadas durante os traballos de cantaría que nos están descubrindo dende hai pouco. 🔎

Unha cultura de feiras, cun recinto ferial situado no centro do pobo, unhas feiras de renome en toda Galiza. 🐮🧀 Uns eventos deportivos, sociais e culturais. 🚙🏃🏽‍♀️🎬🎤🎨

Uns espazos verdes para desfrutar con toda a familia, o parque do Concello, a área recreativa Soutogrande, coa súa praia fluvial onde pasar unha boa tarde. 🌳🍃

Unha maravilla do rural, un pobo que se move, un pobo no que sentirte como na túa casa. 🏡

Estades list@s para descubrilo? 🤩

08/10/2020

• Serra da Capelada ⛰

A serra da Capelada, os acantilados máis altos da Europa continental.. quen nos diría que estarían na nosa terra! 🤩

Uns acantilados creados pola man de Deus, sí, sí, ledes ben, esa mesma man que axudou a Maradona no mundial do 86, esa mesma, foi a que creou os acantilados da Serra da Capelada… conta a lenda que Deus, ó acabar de facer o mundo, decidiu sentarse porque estaba canso, e apoiou a súa man no que hoxe é a nosa Galiza. Os seus dedos crearon unhas faias que se convertiron no que hoxe son os vales nos que desembocan cinco dos nosos ríos, formando así as rías galegas. A terra na que Xesús decidiu deixar a un dos seus apóstoles.

A Serra da Capelada, unha terra salvaxe, onde mires para onde mires podeste atopar vacas 🐮, cabalos 🐴, cabras 🐐, conexos 🐇 e máis animais vivindo en liberdade. 🌱 Onde a herba sempre está verde, onde o vento ondea as pólas das árbores creando unha doce melodía, onde as vistas son… inmellorables. ✨

Uns milladoiros a cada cal máis impresionante ca o anterior, o milladoiro de Chao do monte, o milladoiro dos Carrís, o milladoiro de Teixidelo, co monumento a Leslie Howard... e, como non, a Garita de Herbeira, Vixía Herbeira, as vistas máis altas dende un acantilado na Europa Continental, 620m de caída baixo os nosos pés, a forza do vento creando as ondas no horizonte, un horizonte de mar que asemella non rematar nunca. 🌊

E unha sorpresa, agochada embaixo deste longo acantilado, a praia de Teixidelo, a praia de area negra, unha paisaxe única en Galiza. Un secreto que merece ser desvelado. 🤫

Unha terra única, chea de encanto por cada un dos seus rincóns, unha visita obrigada se andas pola zona, pero sempre recorda: quérea e respétaa como fai ela con nós! 🌿

06/10/2020

• Santo André de Teixido 💫

A parte natural de Cedeira da moito que falar e moitas excursións que facer, e decidimos seguir descubrindo esta zona con vós. A parte máis natural e salvaxe de Cedeira, a Serra da Capelada.

E claro, como non íamos falar do segundo lugar de peregrinaxe de Galiza, un sitio de relixión, de crenzas, de tradicións e de lendas. Un dos lugares máis encantados da nosa terra. 🧙🏼‍♀️

Un pobo que ides visitar todos, porque como ben di o dito “A Santo André de Teixido vai de morto o que non foi de vivo”!

E conta a lenda que se vas de morto, toca facelo coma alma en pena, ou reencarnado en lagarto, sapo, serpe, ou calquer tipo de insecto! 🐌 Así que.. cando ir xa o escolledes vós!

Nós aconsellamosvos ir de vivo, estamos seguras de que non vos vades arrepentir!

Os cantís da Capelada, onde Santo André chocou coa súa barca, a cal quedou petrificada no mar. 🌊 Conta a lenda que cando Santo André chegou a este lugar, queixouse do illado que estaba, polo que Deus e Xesús prometéronlle que todo o mundo o iría visitar algunha vez na súa vida… ou despois dela. Entón Santo André namorouse do lugar que leva o seu nome, e para agradecer as visitas, bendice a todo quen o vai visitar.

Un pequeno pobo, de non mais de 30 casas, no que a cor branca xunto coa pedra predomina na paisaxe urbanística... e só hai que virar a cabeza pra ver os prados, os montes, e o mar. E asomandonos pra ver o mar, veremos a famosa barca.

Unha terra chea de tradicións… como a herba de namorar; non te podes ir sen ela! 🌱 As figuriñas de pan, os sanandresiños, uns amuletos que che darán sorte. ☘️ A cova mística na que a xente entrega exvotos, velas e fotografías, para pedirlle un favor ó santo, ou para agradecerlle un xa concedido. ⛪️ A Fonte do Santo na que os peregrinos deben mollar os beixos coa auga de cada un dos tres canos da fonte… pero coidado! Da sorte, pero non é potable. E como non… as rosquillas de Santo André, un doce máis que típico do lugar. Quererás volver moi pronto a por máis! 😋

Santo André de Teixido, un lugar máxico creas ou non creas… os santos, as meigas, a maxia que desprende o lugar, encanta a calqueira. ✨

Vai de vivo a Santo André de Teixido!

MeiGaliza Turismo

08/04/2021

29/01/2021

20/01/2021

16/01/2021

09/12/2020

06/12/2020

18/11/2020

02/11/2020

18/10/2020

13/10/2020

08/10/2020

06/10/2020

Dirección

Página web

Notificaciones

Contacto La Empresa

Atajos

Compartir

Categoría