25/08/2026
O 25 de agosto de 1858 nace en pontevedra Perfecto Feijoo, farmacéutico, gaiteiro e musicólogo. Cun grupo de amigos funda en 1883 Aires d´a Terra o primeiro coro de Galiza. O coro utilizaba instrumentos tradicionais como a gaita, o pandeiro, as cornas, triángulos, pandeiretas ou as zanfonas que, xunto con documentos e fotografías, se custodian no Museo de Pontevedra. En 1904 gravou o primeiro disco de música galega e nel utiliza a zanfona. Vai ser a primeira gravación do mundo deste instrumento. Como escritor publicou La gaita gallega, un conxunto de artigos sobre este instrumento. A súa farmacia, instalada na Praza da Peregrina era un foco de actividade cultura e punto de reunión de numerosoas persoas que participaban nas súas famosas tertulias literarias e musicais. Por alí pasaban tanto políticos como persoas do mundo das artes e as letras: Eugenio Montero Ríos, Pablo Iglesias, Diego Pazos Espés y Práxedes Mateo Sagasta, Ramón María del Valle Inclán, Emilia Pardo Bazán, Miguel de Unamuno…
Cóntase tamén que en 1891 chegou a mans de Perfecto Feijoo un papagaio ao que lle puxo o nome de Ravachol. Viviu este na farmacia 22 anos e fíxose moi popular polos seus dicires: Don Perfeuto, xente na tenda, Aquí non se fia, Se collo a vara…, Vaite de aí, lambón… O enterro do Papagaio Ravachol conmemórase cada ano durante o entroido de Pontevedra.
