28/12/2024
Cumprir 25 anos non ten un mérito especial, só é cuestión de tempo, pero conseguir chegar aos 25 anos como Cooperativa de Educación Ambiental é un pouco máis complicado, especialmente neste país.
Conseguir que en 25 anos non se nos caese ningún dos valores, principios, compromiso nin o comportamento ético co que nacemos hai 25 anos naquela pequena aula de natureza no medio do monte quizais si teña certo mérito. Dende o principio apostamos pola colaboración en lugar da competitividade, por ser competentes antes que competitivos, por non ter unha dobre moral e por crer, como seguimos crendo, que a educación ambiental é un dos oficios máis decentes aos que alguén se pode dedicar.
Polo camiño de tentar salvar o que nos salva fixemos moitas aliadas nesta viaxe, outras empresas e persoas compañeiras e, con todo, amigas. Estes 25 anos son tamén os de todas as persoas e entidades que confiaron no noso traballo.
Poderiamos mirar atrás lembrando todo o conseguido, pero os retos están diante.
Grazas, bicos e apertas.
