Amhara Culture Tourism & Sport Bureau

24/10/2026

# # # 🕌 ጥቅምት 15 ወደ በጌታው ሸህዬ እክበር!

# # # 🌙 የጌታው ሸህዬ መውሊድ በዓል — የእምነት፣ የታሪክና የባህል መገናኛ!

ደገር አባ ጌትዬ እየጠራን ነው! ወደ ደገር እንጓዝ፤ የወሎን መንፈሳዊና ባህላዊ ቅርስ እንተዋወቅ!

በደቡብ ወሎ ዞን፣ ከላላ ወረዳ፣ ደገር ቀበሌ የሚገኘው ደገር አባ ጌትዬ የሃይማኖት ትውፊትን፣ የአካባቢ ታሪክንና የወሎን ባህላዊ ማንነት የሚያገናኝ ልዩ መዳረሻ ነው። በጥቅምት 15 ቀን 2019 ዓ.ም. የሚከበረው የጌታው ሸህዬ መውሊድ በዓልም ምዕመናንንና ጎብኚዎችን በአንድ ላይ የሚያሰባስብ ዓመታዊ መንፈሳዊ ኩነት ነው።

# # # 📍 ደገር አባ ጌትዬ የት ይገኛል?

* ክልል፦ አማራ

* ዞን፦ ደቡብ ወሎ

* ወረዳ፦ ከላላ

* ቀበሌ፦ ደገር

*ከደሴ ከተማ 164 ኪ.ሜ እና ከከላላ ወረዳ ከተማ፦ ወደ ደቡብ ምሥራቅ አቅጣጫ 26.6 ኪሎ ሜትር ያህል።

🗺️ [ደገር መስጊድን በGoogle Maps ይፈልጉ](https://www.google.com/maps/search/?api=1&query=Deger+Mosque+Kelala+South+Wollo+Ethiopia&utm_source=chatgpt.com)

# # # 📜 የታሪክና የመንፈሳዊ እሴት መገኛ

በአካባቢው ትውፊት መሠረት፣ ደገር አባ ጌትዬ በ1860 ዓ.ም. በሸህ ሸሪፍ ኢብራሂም የተመሠረተ ታሪካዊ ስፍራ ነው። ከስፍራው ጋር የተያያዙ ትውፊቶች ከእስልምና ትምህርት፣ ከመንፈሳዊ ሕይወት፣ ከሽምግልናና ከእርቅ ባህል ጋር ይያያዛሉ። የመሥራቹ መቃብርም በስፍራው ይገኛል።

በአካባቢው የሚነገረው የጌታው ሸህዬ አንካሴ ትውፊትም ከአመፀኞች መመለስና ከተጣሉ ሰዎች እርቅ ጋር የተያያዘ ባህላዊ እምነትን ያንጸባርቃል። እነዚህ ትውፊቶች ደገር የሃይማኖት መዳረሻ ብቻ ሳይሆን የቃል ታሪክና የማኅበራዊ እሴቶች መገኛ መሆኑን ያሳያሉ።

# # # 🌳 ተፈጥሮ፣ ባህልና የአካባቢ ኑሮ

ደገር በተፈጥሯዊ ገጽታው፣ በአገር በቀል ዛፎቹና በባህላዊ የገጠር አኗኗሩ ለጎብኚዎች የአካባቢውን ኑሮና ባህል ለመረዳት ዕድል ይሰጣል። በተለይም የመውሊድ በዓሉ የሃይማኖት ተሳትፎን ከባህላዊ ማንነትና ከማኅበራዊ ትስስር ጋር የሚያገናኝ አስፈላጊ ኩነት ነው።

# # # 🎶 የወሎ ባህላዊ ቃል

> በመኪናው መንገድ በወለሊማው፤ መቼም ሁሌ አይቀርም ቀየሁን ያየው፤ ቦረናው ሸህዬ አያል ነው ቂሷሁ!

ይህ ባህላዊ አገላለጽ የአካባቢውን የቃል ቅርስና የጌታው ሸህዬን ስም በትውልድ መካከል የሚያስተላልፍ ባህላዊ ትውስታ ነው።

# # # 🌙 መውሊድ — የእምነትና የአንድነት መገናኛ

የጌታው ሸህዬ መውሊድ በዓል ምዕመናን በአንድ ላይ ተሰብስበው መንፈሳዊ እሴቶቻቸውን የሚያንጸባርቁበት፣ የማኅበረሰብ ትስስራቸውን የሚያጠናክሩበትና ባህላዊ ትውፊታቸውን ለትውልድ የሚያስተላልፉበት ልዩ አጋጣሚ ነው።

የዚህ ዓይነት መንፈሳዊ ኩነቶችን ማስተዋወቅ የደቡብ ወሎን የሃይማኖት ቱሪዝም ለማሳደግ፣ የቅርስ ግንዛቤን ለማስፋትና የአካባቢውን ባህላዊ ሀብት ለጎብኚዎች ለማስተዋወቅ ያግዛል።

# # # 📣 ደገር እየጠራን ነው!

የሃይማኖት ቱሪስቶች፣ ምዕመናን፣ የባህል ቅርስ ወዳጆች፣ ተመራማሪዎችና የወሎ ታሪክ አፍቃሪዎች!

ወደ ደገር አባ ጌትዬ ይጓዙ፤ የጌታው ሸህዬን ታሪክና ትውፊት ይተዋወቁ፤ የወሎን መንፈሳዊ ቅርስ ይወቁ፤ የደቡብ ወሎን ልዩ የቱሪዝም ሀብት ይጎብኙ!

ደገር አባ ጌትዬ — የእምነት ጉዞ፣ የታሪክ ትውስታ፣ የባህል ቅርስ!

🌙 ጥቅምት 15 — በደገር እንገናኝ!

24/10/2026

በቅኝ ያልተገዛችሁ ኢትዮጵያ!
በጋና ተመሣሣይ ጎንደር ተብሎ የሚጠራ ስም አለ!

ኢትዮጵያ በአፍሪካ የፀረ-ቅኝ ግዛት ትግል ተምሳሌት እና በቅኝ ግዛት ያልተገዛች ሀገር ስትሆን፣ ጋና ደግሞ...

23/10/2026

በአፍሪካ የሰላም እና ጸጥታ ጉዳዮች ላይ የሚያተኩረው የጣና ፎረም በባህር ዳር ከተማ መካሄድ ጀመረ

​በየዓመቱ በአህጉራዊ የሰላም፣ ጸጥታ እና ልማት ጉዳዮች ላይ የሚመክረው የጣና ፎረም በዛሬው ዕለት በባህር ዳር ከተማ መካሄድ ጀምሯል።

​በፎረሙ የፓናል ውይይት መክፈቻ ላይ ተገኝተው ንግግር ያደረጉት የብሔራዊ መረጃና ደኅንነት አገልግሎት ዋና ዳይሬክተር አምባሳደር ሬድዋን ሁሴን፤ በቀይ ባህር እና በቀጣናው የሚታዩ የጂኦፖለቲካዊ ለውጦችና የጸጥታ ስጋቶች አህጉራዊ እና ዓለም አቀፋዊ ትብብርን የሚጠይቁ መሆናቸውን ገልጸዋል።

​አምባሳደር ሬድዋን አያይዘውም የቀይ ባህር ደህንነት እና መረጋጋት በጥቂት የባህር ዳርቻ ሀገራት ብቻ የሚወሰን አለመሆኑን ጠቁመው፤ የቀጣናውን ሰላምና መረጋጋት ለማረጋገጥ የአካባቢው ሀገራት ከዲፕሎማቲክ አጋሮቻቸው ጋር በጋራና በትብብር መስራት እንደሚገባቸው አጽንኦት ሰጥተዋል።

​ኢትዮጵያ በክልሉ የባህር በር የሌላት ሀገር ብትሆንም፤ የባህር ትራንስፖርቷ እና የንግድ እንቅስቃሴዋ ሙሉ በሙሉ በቀይ ባህር መስመሮች ላይ የተመሰረተ በመሆኑ፣ የባህር ንግድ መስመሯን እና የመርከቦቿን ደህንነት መጠበቅ ወሳኝ ሃላፊነቷ እንደሆነ አብራርተዋል።

​ሀገሪቱ ፈጣን ኢኮኖሚያዊ እድገቷን ለማፋጠን እና ቀጣናዊ ውህደትን ለማጠናከር በቁርጠኝነት እንደምትሰራ የጠቆሙት ዋና ዳይሬክተሩ፤ የሚታዩትን ተለዋዋጭ የጂኦፖለቲካዊ ተግዳሮቶች ለመወጣት ሁለገብ አቀራረብ እና አዳዲስ የምክረ-ሐሳብ አቅጣጫዎች እንደሚያስፈልጉ አስገንዝበዋል።

​በተጨማሪም በፎረሙ የሚደረጉ የባለሙያዎች እና የመሪዎች ውይይቶች ወደ ተጨባጭ የፖሊሲ እና የተግባር እርምጃዎች የሚተረጎሙ ፍሬያማ መፍትሔዎችን እንደሚያመነጩ ያላቸውን እምነት ገልጸው፤ ኢትዮጵያ ለቀጣናው ሰላምና መረጋጋት ያላትን ጽኑ ቁርጠኝነት አረጋግጠዋል።

​በሌላ በኩል የአፍሪካ ኅብረት የምስራቅ አፍሪካ ዳይሬክተር እና የአፍሪካ ኅብረት ተወካይ ዶክተር ፓውል-ሲሞን ሃንዲ፤ በምስራቅ አፍሪካና በሱዳን ጉዳዮች ላይ የሚሰሩ ዓለም አቀፍና አህጉራዊ የሰላም ልዩ መልዕክተኞች ለሁለተኛ ጊዜ የሚያካሂዱት የምክክር መድረክ በመጀመሩ የተሰማቸውን ደስታ ገልጸዋል።

​የአፍሪካ ቀንድ ክልል በጸጥታና በኢኮኖሚ እድገት በወሳኝ መስቀለኛ መንገድ ላይ እንደሚገኝ ያመለከቱት ዶክተር ፓውል-ሲሞን፤ የሱዳንን ወቅታዊ ሁኔታ እና የልዩ ተወካዮቹን ጥረት በማንሳት የፓናል ውይይቱን በይፋ አስጀምረዋል
Communications

23/10/2026

የአፍሪካ ከፍተኛ መሪዎች በጣና ፎረም ላይ ለመሳተፍ ባሕርዳር ከተማ እየገቡ ነው።

በሚኒስትር ማዕረግ የናሚቢያ የፕላን ሚኒስቴር ኮሚሽን ዳይሬክተር ጄኔራል ከይሪ ሙቤንዴን ጨምሮ የአፍሪካ ከፍተኛ መሪዎች፣ የውጭ ጉዳይ ሚኒስትሮች፣ የቀድሞ ታዋቂ የአፍሪካ ሰዎች፣ ዲፕሎማቶች እና ጥናት እና ምርምር ላይ የሚሳተፉ ምሁራን ከዛሬ ጥቅምት 13/2019 ዓ.ም ጀምሮ እስከ ጥቅምት 15/2019 ዓ.ም በባሕርዳር ከተማ የሚካሄደውን የጣና ፎረም ለመታደም ነው ባሕርዳር የገቡት።

የፎረሙ ተሳታፊ እንግዶች ባሕር ዳር ደጅአዝማች በላይ ዘለቀ ዓለም አቀፍ የአውሮፕላን ማረፊያ ሲደርሱ የአማራ ክልል ምክትል ርእሰ መሥተዳድር አብዱ ሁሴን (ዶ.ር)፣ የባሕር ዳር ከተማ አሥተዳደር ተቀዳሚ ምክትል ከንቲባ ጎሹ እንዳላማው እና ሌሎች የሥራ ኀላፊዎች አቀባበል አድርገውላቸዋል።

ፎረሙ ላለፉት 11 ዓመታት የተካሄደ ሲኾን ዘንድሮም ለ12ኛ ጊዜ በአፍሪካ ሰላም እና ደኅንነት ጉዳዮች ላይ እንደሚመክር ይጠበቃል።

22/10/2026

ኪነ-ጥበብ ለአገር እድገት ትልቅ አበርክቶ በመኖሩ ዘርፉን ወደ ላቀ ደረጃ ለማሳደግ በትኩረት መስራት እንደሚገባ ተገለፀ፡፡

በደብረታቦር ከተማ አስተዳደር ባህል ቱሪዝምና ስፖርት መምሪያ ስር ለከተማ አስተዳደሩ እና ለደቡብ ጎንደር ዞን እየሰራ የሚገኘው ጉና የባህል ሙዚቃና ትያትር ቡድን እንቅስቃሴ ላይ የሚመለከታቸው አካላት በተገኙበት ውይይት ተደርጓል፡፡

በውይይቱ ላይ የመምሪያው የባህል እሴት ኢንዱስትሪ ልማት ቡድን መሪ አቶ ታደሰ ቢያድጌ የባህል ቡድኑ በ2018 በጀት ዓመት እና በተያዘው በጀት ዓመት 1ኛ ሩብ ዓመት ላይ የሰራቸውን ስራዎች አስመልክተው ሪፖርት አቅርበዋል፡፡ በባለፈው በጀት ዓመት በርካታ ስራዎች መስራታቸውን ገልፀው በባህል ፌስቲቫል ላይ ተሳትፎ መደረጉን፣ አገራዊ ምርጫው የተሳካ እንዲሆን መሰራቱን፣ የደብረታቦርን በደብረታቦር እና የቅዱስ መርቆሪዮስ በዓላት በደማቅ ሁኔታ እንዲከበሩ መደረጉን፣ የተለያዩ በዓላት በድምቀት እንዲከበሩ መደረጋቸውን እና ሌሎችም ስራዎች እንደተሰሩ አንስተዋል፡፡

ቡድን መሪው በተያዘው በጀት ዓመት ዘርፈ ብዙ ስራዎችን ለመስራት እንደታቀደም ጠቁመው የስነ-ጹህፍ ምሽት ማካሄድ፣ በክልላዊ የባህል ፌስቲቫል ላይ መሳተፍ፣ በመጤ ባህልና ጎጅ ልማዳዊ ድርጊት ቅነሳ ላይ መስራት፣ ክብረ በዓላት እና ፌስቲቫሎች በደማቅ ሁኔታ እንዲከበሩ ማድረግ፣ ትውልድ ግንባታ ላይ መስራት፣ ተተኪዎችን ማፍራትና አባላትን ማጠናከር፣ ለቡድኑ አባላት ስልጠና መስጠት እና ሌሎችም ስራዎች እንደሚሰሩ አመላክተዋል፡፡

በ1ኛው ሩብ ዓመት የተሰሩትን ስራዎችም ያነሱ ሲሆን ደብረታቦርን በደብረታቦር በጥሩ ሁኔታ ማክበር መቻሉን፣ በክረምቱ በጎ ፈቃድ አገልግሎት ላይ የነቃ ተሳትፎ መደረጉን፣ ደብረታቦር ዩኒቨርሲቲና ሌሎችም ኮሌጆች ተማሪዎቻቸውን ሲያስመርቁ ማድመቅ መቻሉን እና ሌሎችም ስራዎች እንደተሰሩ ጠቅሰው በቀጣይ ስራዎችን በተሻለ መንገድ ለማከናዎን ጠንክሮ መስራት እንደሚገባ አስገንዝበዋል፡፡

የባህል ቡድኑ አባላትም በሰጡት ሀሳብ በቡድናቸው አማካኝነት የተለያዩ ስራዎችን እየሰሩ መሆናቸውን እና አጠናክረው እንደሚቀጥሉ ገልፀው በመካከላቸው ያለው መስተጋብር መልካም በመሆኑ ስራቸውን በአግባቡ መስራት እንዳስቻላቸው ተናግረዋል፡፡ ከተማ አስተዳደሩ በተለያየ መንገድ እያደረገላቸው ያለው እገዛና ድጋፍ ጥሩ በመሆኑ ምስጋና አቅርበው ገቢያቸውን ለማሳደግ የምሽት ስራ የሚሰሩበት ሁኔታ እንዲመቻችላቸው እና ጥቅማ ጥቅማቸው ከሌሎቹ አቻ ከተሞች ጋር እኩል እንዲሆን አንስተዋል፡፡

የጉና የባህል ሙዚቃና ትያትር ቡድን አስተባባሪ አቶ ቴዎድሮስ ካሳሁን እንደተናገሩት ቡድናቸው በደብረታቦር ከተማ አስተዳደር እና በደቡብ ጎንደር ዞን በርካታ ስራዎችን እየሰራ መሆኑን ጠቁመው የአካባቢውን ባህል የማስተዋወቅ፣ ህዝቡን ለልማትና ለሌሎችም ስራዎች የማነሳሳት፣ አንድነትና አብሮነትን የማሳደግ ስራዎችን እየሰራ እንደሚገኝ ገልፀው በቀጣይ ስራዎችን ከእስካሁኑ በበለጠ መንገድ ለመስራት ቡድኑ እንዲጠናከር ሁላችንም በባለቤትነት መስራት አለብን ብለዋል፡፡

የደብረታቦር ከተማ አስተዳደር የመንግስት ኮሙኒኬሽን መምሪያ ሀላፊ አቶ ዮናስ ነጋ እንደገለጹት ኪነ-ጥበብ ለአገር እድገትና ለትውልድ ግንባታ ትልቅ አስተዋጽኦ የሚያበረክት በመሆኑ ዘርፉን ለማሳደግ በትኩረት ይዞ መስራት እንደሚገባ አንስተው ጉና የባህል ሙዚቃና ትያትር ቡድን ዘርፈ ብዙ ስራዎችን እየሰራ እንደሚገኝ እና አጠናክሮ ማስቀጠል እንደሚያስፈልግ አስገንዝበው ከተማ አስተዳደሩ ቡድኑን ለማጠናከር የሚችለውን ሁሉ እያደረገ ይገኛልም ብለዋል፡፡

የደብረታቦር ከተማ አስተዳደር ባህል ቱሪዝምና ስፖርት መምሪያ ሀላፊ አቶ አለበል ደመላሽ በበኩላቸው ጉና የባህል ሙዚቃና ትያትር ቡድን በርካታ ስራዎችን እየሰራ መሆኑን እና በቀጣይ ስራዎችን ባደገ ደረጃ ለመስራት ትኩረት ሰጥቶ መንቀሳቀስ እንደሚገባ አንስተው የባህል ቡድኑን ወደ ላቀ ደረጃ ለማድረስ ሁሉም አስተዋጽኦ ማበርከት እንዳለበት አስገንዝበው ሀብት ለማግኘት እና ተተኪዎችን ለማፍራት በትኩረት ይዘን መስራት አለብንም ብለዋል፡፡

ጉና የባህል ሙዚቃና ትያትር ቡድን በ2003 ዓ/ም የተመሰረተ ሲሆን በባለፉት 16 ዓመታት የኪነ-ጥበብ ስራዎችን እንደሰራም ተገልጿል፡፡

ደብረታቦር ኮሙኒኬሽን ጥቅምት 12 ቀን 2019 ዓ.ም

22/10/2026

ጉባኤው ትኩረቱን ሁለት ሐሳቦች ላይ አድርጓል። (ወልድያ ከተማ)

የወልድያ ከተማ አስተዳደር ስፖርት ምክር ቤት 23ኛ ጠቅላላ ጉባኤዉን የ2018 በጀት ዓመት ዕቅድ አፈጻጸም ሪፖርት እና የ2019 ዓመት ዕቅድ ትውውቅ ዛሬ ጥቅምት 12 ቀን 2019 ዓ.ም አካሒዷል። በውይይት ሁለት ጉዳዮች የትኩረት ማዕከል ሆነዋል።

ጉባኤው የዕቅድ አፈጻጸሙና ትውውቁን መሠረት በማድረግ ከስፖርቱ ዘርፍ ጋር የተገናኙ በርካታ ሐሳቦችን ሰንዝሯል።

አካባቢውን በመልካም ገጽታ ስምና ክብሩን ከፍ የሚያደርጉ እና ለስፖርቱ ኢንቨስትመንት አቅም የሚሆኑ ባለመክሊቶች ባለቤት ስለሆነች ወልድያ ከተማ እንደ ሜዳ ላይ ስፖርቱ ለቤት ውስጥ ስፖርቱም ትኩረት ቢሰጥ፤ በሁሉም የስፖርት ዘርፍ ተተኪ ለማፍራት ጥረት ቢደረግ፣ በፕላን ምድቡ መሠረት የስፖርት ማዘውተሪያ ቦታዎች ለታለመላቸው ዓላማ አገልግሎት ቢመቻቹ፤ የስፖርቱ ዘርፍ ሊያንቀሳቅስ የሚችል የበጀት አቅም ቢኖረው የሚሉና ሌሎች ተያያዥ ሐሳቦች ተንጸባርቀዋል።

ከስፖርት ምክር ቤት አባሉ በተጨማሪ በውይይቱ የተሳተፉት ከቀበሌ እስከ መምሪያ ድረስ ያሉ አጋርና ባለድርሻ አካላት በሚመለከታቸው ኃላፊነትና ተግባር ልክ እንደሚሰሩ ቃል ገብተው የገንዘብ ምንጭን የማጎልበትና የስፖርት ማዘውተሪያ ቦታዎችን ምቹ የማድረግ ቅድሚያ የሚሰጣቸው ተግባራት ስለመሆናቸው የምክር ቤት አባሉት ሐሳብ ተጋርተዋል።

የወልድያ ከተማ አስተዳደር ባህል ቱሪዝምና ስፖርት መምሪያ ኃላፊ የተከበሩ ወ/ሪት ነጻነት አምበሳው በየደረጃው የሚገኙ የዘርፉን አደረጃጀቶች በማጠናከር ፤ የስፖርት መሠረተ ልማቶችን ከሚመለከተው አካል ጋር በመወያያት፣ የገንዘብ አቅምን ሕዝቡን በማሳተፍ መምሪያው ኃላፊነትና ተግባሩን እንደሚወጣ አስታውቀዋል።

በውይይት መድረኩ የተገኙት በአማራ ብልጽግና ፓርቲ የወልድያ ከተማ አስተዳደር ብልጽግና ፓርቲ ቅርንጫፍ ጽ/ቤት ኃላፊ የተከበሩ አቶ ተስፋዬ ገብሬ ወደ ኋላ እየተመለሰ ያለውን የከተማችንን ስፖርት ወደ ፊት ለማምጣት የስፖርት ምክር ቤቱ የስፖርቱን ጥያቄዎች ከማንሳት ጎን ለጎን ሕዝባዊ በማድረግ ተግባርና ኃላፊነቱን እንዲወጣ አሳስበው ፓርቲውም ተገቢው ድጋፍ እንደሚያደርግ ገልጸዋል።

የወልድያ ከተማ ተቀዳሚ ም/ከንቲባ የተከበሩ አቶ ታምራት ደምሴ ከተማ ማደግ መጠራት ያለበት በሁሉም ዘርፍና ጸጋ ነው እንጂ በአንድ ዘርፍ ብቻ አይደለም።

የክልላችን መንግሥት የስታዲየም እድሳቱን ትኩረት ያደረገው ወልድያ ከተማችንና አካባቢዋ የስፖርቱ ጸጋ እንዳላት በመረዳትና ለመጠቅም መሆኑን አውስተዋል።

ክቡር ከንቲባው አክለውም የስፖርት ማዘውተሪያ ቦታዎችን ሁሉንም በአንድ ጊዜ ምቹና ውብ ለማድረግ የገንዘብ አቅም ቢገድበንም መቅደም ያለበትን በማስቀደም ደረጃ በደረጃ እናለማለን ብለዋል።

ስፖርት አካልን ብቻ ሳይሆን አንድነትን የሚገነባ፤ ከሱስ የጸዳ በሥነ-ምግባር የታነጸ ትውልድ የሚገነባ ዘርፍ መሆኑን ያወሱት ከንቲባው፤ ዋናው ስፖርትን የሕዝቡ፥ የወጣቱ ማድረግ አለብን።

ከሀገር አቀፍ ተጫዋችነት ቡድን ደረጃ ደርሶ የነበረው የወልድያ ከተማችን ስፖርት ለምን ወደ ኋላ ተመለስ? የሚለውን ጥያቄ ትኩረት አድርገን በመሥራት መፍትሄ መፈለግ የጋራ ኃላፊነታችንና ስምሪት ይሁን፤ በማለት ለስፖርቱ ዘርፍ ወደ ነበረበት ከፍታው ለመመለስ የሕዝባዊ ተሳትፎን የጥሪ መልእክት አስተላልፈዋል።

በዕለቱ ከቀበሌ እስከ ክፍለ ከተማ ድረስ በ2018 ዓ.ም በጀት ዓመት በስፖርት ፕሮጀክቱ ዘርፍ ሙያዊ ኃላፊነታቸውን ላበረከቱ ግለሰቦች የሰርትፍኬት፤ የአፈጻጸም ብልጫ ላሳዪ ክፍለ ከተሞች ደግሞ የምስክር ወረቀትና የዋንጫ ሽልማት ተበርክቶላቸዋል።

ወልድያ ከተማ አስተዳደር ኮሚኒኬሽን

ጥቅምት 12 ቀን 2019 ዓ.ም

22/10/2026

የቱሪዝም አገልግሎት ሰጪ ተቋማት ሠራተኞች በመስተንግዶ አሰጣጥ ዙሪያ ሥልጠና ተሰጣቸው።

መስከረም 11/2019 ዓ.ም (ወልድያ ኮሙኒኬሽን)

የወልድያ ከተማ ባህል፣ ቱሪዝምና ስፖርት መምሪያ ከወልድያ ቴክኒክና ሙያ ኮሌጅ ጋር በመተባበር ለቱሪዝም አገልግሎት ሰጪ ተቋማት ሠራተኞች በአገልግሎት አሰጣጥና በደንበኞች አያያዝ ላይ ያተኮረ ስልጠና ሰጥቷል።

የመምሪያው ኃላፊ ወ/ሪት ነጻነት አምበሳው እንደገለጹት፣ ስልጠናው የቱሪዝም አገልግሎት ጥራትን በማሻሻል የቱሪስቶችን የቆይታ ጊዜ ለማራዘምና የመስተንግዶ ክህሎትን በማሳደግ ብቁ ባለሙያዎችን ለማፍራት ያለው ሚና ከፍተኛ መሆኑን አስረድተዋል።

ለስልጠናው መሳካት ትብብር ላደረጉት ለላል ሆቴልና ለወልድያ ቴክኒክና ሙያ ኮሌጅ፣ እንዲሁም ጥሪውን አክብረው ለተሳተፉት ሰልጣኞች ምስጋና ያቀረቡት የመምሪያ ኃላፊዋ ወ/ሪት ነፃነት ናቸው።

በወልድያ ቴክኒክና ሙያ ኮሌጅ የሆቴልና ቱሪዝም ዘርፍ አሰልጣኝ መምህር ደስዬ አያሌው በበኩላቸው ፣ከስልጠናው በኋላ ምዘና እንደሚካሄድና በቴክኒክና ሙያ በቂ ስልጠና ወስደው ምዘናውን ያላለፉ የአገልግሎት ሰጪ ባለሙያዎች ወደፊት በዘርፉ ለመቀጠል አዳጋች እንደሚሆን ጠቁመዋል።

በስልጠናውም የምግብና መጠጥ አገልግሎት አሰጣጥ፣ ውጤታማ የተግባቦት ክህሎት፣ ደንበኛ ተኮር አሠራርና የደንበኞችን እርካታ ማረጋገጥ ላይ በሰፊው ያብራሩት አሰልጣኝ መምህሩ ናቸው።

በተጨማሪም የንጽህናና ደህንነት መመሪያዎችን ማክበር፣ የደንበኞችን አስተያየት በአግባቡ መቀበል፣ ሙያዊ ሥነ ምግባርና የአስተናጋጅነት ሚና እንድሁም ሌሎች ተያያዥ ሀሳቦች የስልጠናው የትኩረት ነጥቦች ሆነው ቀርበዋል።

የስልጠናው ተሳታፊዎች በበኩላቸው፣ ስልጠናው በሥራቸው የተሻለ ውጤት እንዲያስመዘግቡና ጥራት ያለው አገልግሎት ለደንበኞች እንዲሰጡ የሚያስችል ግንዛቤ እንደፈጠረላቸው ገልጸዋል።
# Woldya Communucation

21/10/2026

የጣና ፎረም ለየት የሚያደርገው በሚካሄድበት ቦታ እና በሚከተለው የውይይት ሥርዓት ነው።

የጣና ፎረም የአፍሪካን ሰላም እና ጸጥታ ተግዳሮቶች ከርዕዮተ ዓለም ባለፈ ተግባራዊ መፍትሔዎችን ለማመላከት የሚያስችል መድረክ ኾኖ 11 ዓመታትን ዘልቋል። አፍሪካውያን የራሳቸውን ችግሮች በራሳቸው አቅም የሚፈቱበት መድረክም ኾኗል።

ታላላቅ የዓለም ዓቀፍ መድረኮችን በብቃት የማስተናገድ ልምድ ያካበተችው ኢትዮጵያም ጣና ፎረምን በባሕር ዳር እያስተናገደች ቀጥላለች። ይህም ኢትዮጵያ ለአፍሪካ ሰላም እና ደኅንነት የምታደርገውን የማይናወጥ ቁርጠኝነት የሚያረጋግጥ ነው።

የውጭ ጉዳይ ሚኒስቴር ቃል አቀባይ አምባሳደር ነቢያት ጌታቸው ጣና ፎረም የአፍሪካ ጉዳይን በአፍሪካውያን አንደበት እና በአፍሪካውያን መፍትሔ አመንጭነት የሚደረግ መድረክ ነው ብለዋል። በዚህም ከሌሎች ተመሳሳይ መድረኮች የተለየ አስተዋጽኦ አለው ነው ያሉት።

የተለየ የሚያደርገውም ምክክር በሚደረግበት ቦታ እና በምክክር ሥነ ሥርዓቱ ስለመኾኑም አብራርተዋል። መሪዎች፣ ዲፕሎማቶች፣ ምሁራን እና ባለሙያዎች ዘና እያሉ ሀሳባቸውን የሚያጋሩበት መድረክ መኾኑንም ጠቁመዋል።

ቃል አቀባዩ እንዳብራሩት የጣና ፎረም መድረክ "የዛፍ ስር ውይይት" የሚል የውይይት ዘይቤን የሚከተል ነው። ይህም በአፍሪካ የሚገኙ የማኅበረሰብ ክፍሎች በየአካባቢያቸው የሚነሱ ግጭቶችን ለመፍታት በዛፍ ጥላ ስር ተሠባሥበው የሚመክሩበትን ባሕል የሚያመላክት ነው ብለዋል።

በእንደዚህ ዓይነት ውይይቶች የሚገኙ ሀሳቦች በተለያዩ የሰላም እና ጸጥታ ጉባኤዎች ላይ በመደበኛ ሰነዶች ውስጥ የሚካተቱ ናቸው ነው ያሉት። ለአፍሪካ ዘላቂ ሰላምን ለማረጋገጥ የሚያስችሉ ከአፍሪካውያን የመነጩ ሀሳቦች ከፎረሙ መድረኮች እንደሚገኝም አመላክተዋል።

እየተዝናኑ ለመወያየት ተመራጭ የኾነችው የባሕር ዳር ከተማ ዘንድሮም 12ኛውን የጣና ፎረም በልዩ የእንግዳ ተቀባይነት መንፈስ ልትቀበል ዝግጅቷን አጠናቅቃለች።
#አሚኮ

21/10/2026

#ልማትን ለማሳለጥ በፍጥነት፣ በፈጠራና በጥራት ተሠርቷል — ዘሪሁን ፍቅሩ (ዶ.ር)

የአማራ ክልል የከተማ ልማት ዘርፍ ተቋማት የ2019 በጀት ዓመት የመጀመሪያ ሩብ ዓመት የዕቅድ አፈጻጸማቸውን ገምግመው የቀጣይ ሥራ አቅጣጫን ተወያይተዋል።

በምክትል ርዕሰ መሥተዳድር ማዕረግ የከተማ ልማት ዘርፍ አስተባባሪ ዘሪሁን ፍቅሩ (ዶ.ር)፣ በሥራ ዘርፎች ላይ ትኩረት በማድረግ፣ ጥልቅ የልማት ዕይታን ያካተተ ዕቅድ በማዘጋጀት ውጤቶችን ማስመዝገብ መቻሉን ገልጸዋል።

የሕዝብን የልማት ጥያቄዎች ለመመለስ፣ የኑሮ ውድነትን ለመቅረፍና ለወጣቶች የሥራ ዕድል ለመፍጠር ተቋማት በፍጥነት፣ በፈጠራና በጥራት መሥራትና አዳዲስ ቴክኖሎጂዎችን መጠቀም እንደሚገባም አሳስበዋል። በቀጣይም የአፈጻጸም ክፍተቶችን በመለየት ለሕዝብ ተጨባጭ ለውጥ ለማምጣት በትኩረት እንደሚሠራ ገልጸዋል።

በሩብ ዓመቱ የክረምት ኮሪደር ልማት፣ የቱሪዝም ኢንቨስትመንት ማበረታታት፣ ተኪ ምርት የሚያመርቱ ኢንዱስትሪዎችን መደገፍና ከተሞችን ለነዋሪዎች ምቹ ለማድረግ አረንጓዴ ፓርኮችን መገንባት ከተከናወኑ ሥራዎች መካከል ተጠቅሰዋል።

በክረምት በጎ ፈቃድ አገልግሎት የአቅመ ደካሞችን ቤት የማደስና የመሥራት ሥራዎች፣ የገበያ ማዕከላትን የማስፋት፣ የእንስሳት ተዋጽኦ ምርትን የማሳደግና ገበያን የማረጋጋት ተግባራት መከናወናቸው ተገልጿል።

የቴክኖሎጂ አጠቃቀምን ከማስፋት በተጨማሪ የሀገር ውስጥና የውጭ ጎብኚዎች የክልሉን የተለያዩ የቱሪዝም መዳረሻዎች መጎብኘታቸው ተመልክቷል።

21/10/2026

የከተማ ኢኮኖሚ ልማት ክላስተር የሩብ አመት ግምገማ በባህርዳር ከተማ ተጀምሯል!

በክላስተሩ አስተባባሪ ክቡር ዶ/ር ዘሪሁን ፍቅሩ በሚመራው በዚህ ግምገማ የክላስተሩ ተቋማት ሪፖርት ቀርቦ ግምገማ እየተደረገ ይገኛል።