07/09/2026
تعالى أخدك في جولة بالنهار في باريس
هي من أكتر جولاتي المفضلة في باريس..تبدأ من الحي اللاتيني و تنتهي في كافيه Café Saint Honoré 🇫🇷❤️
───
رغم إني بحب كل أحياء باريس، وكل منطقة فيها ليها طابعها الخاص، إلا إن دي تفضل جولتي المفضلة في المدينة.
السبب بسيط... أنا عشت هنا و درست هنا في السربون في الحي الخامس ، ومشيت في الشوارع دي مئات المرات. كل ركن فيها مرتبط بذكرى، وكل شارع فيه تاريخ عمره مئات السنين. بالنسبة لي، الحي اللاتيني (Quartier Latin) مش مجرد مكان سياحي... ده مكان ليه مكانة خاصة جدا في قلبي، وكل مرة أمشي فيه بحس بنفس الإحساس كأني أول مرة أشوفه.
📍 الدائرة الخامسة (5ème arrondissement)
Rue des Fossés Saint-Jacques
هنبدأ جولتنا من الشارع الهادئ الجميل ده... ومن أجمل الحاجات فيه إنه قريب جدا من البيت اللي كانت عايشة فيه إيميلي في مسلسل Emily in Paris، والمفاجأة كانت لي إنه كمان قريب جدا من بيتي. 😊
الشارع نفسه من أقدم شوارع باريس، وكل حجر فيه يحكي جزء من تاريخ المدينة في العصور الوسطى. أول ما تبدأ تمشي هنا هتحس إن باريس بتهدى فجأة، وإن الزمن رجع كام قرن لورا.
➡️ أمشي على طول حوالي 4 أو 5 دقائق، ولما توصل نهاية الشارع هتكسر شمال، وبعدها تكمل دقيقة واحدة لحد ما تلاقي...
───
🏛️ Place du Panthéon
قدامك هيظهر مبنى Panthéon الضخم، واحد من أهم رموز فرنسا. المبنى كان في الأصل كنيسة، وبعدها تحول لضريح بيضم عظماء فرنسا، زي فيكتور هوجو، إميل زولا، جان جاك روسو، وفولتير، وماري كوري.
الوقوف في الميدان ده بيخليك تحس بعظمة التاريخ حواليك من كل اتجاه.وتقف في Rue Valette عند مبنى البانثيون..
➡️ من البانثيون، انزل في الشارع اللي قدام المبنى مباشرة، و أمشي حوالي دقيقتين بس.
----
La Sorbonne
وصلنا لجامعة La Sorbonne، واحدة من أقدم جامعات أوروبا، تأسست سنة 1257 ، متخيل ؟؟ 🥺 ومنها خرج علماء وفلاسفة وأدباء أثروا العالم كله.
هنا هتحس بطاقة الشباب في كل مكان... طلبة، مكتبات، كافيهات صغيرة، ونقاشات علمية في الشوارع.
➡️ كمل على نفس الشارع وانزل بهدوء حوالي 5 دقائق ناحية الجنوب.
---
🌳 Jardin du Luxembourg
هتدخل واحدة من أجمل حدائق باريس كلها.
مكان مثالي لو عايز ترتاح شوية، أو تقرأ كتاب، أو تتفرج على الناس وهي مستمتعة بالشمس. الكراسي الخضراء الشهيرة والبحيرة الصغيرة والمراكب الخشبية بيدوا للمكان إحساس صعب يتوصف. و لازم تلفها كلها و تشوف من عندها الأشجار و الحدائق اللي جواها و تشوف من عندها برج إيفيل في منظر رائع
➡️ اخرج من نفس البوابة اللي دخلت منها وارجع في اتجاه السوربون حوالي 6 دقائق، وبعدها كسر يمين في شارع Rue Galande.
---
🥞 Odette
وصلنا لـ Odette...
واحد من أشهر الأماكن في باريس لتذوق Choux à la crème، الحلوى الفرنسية الخفيفة المحشية بالكريمة.
أنصح تطلب واحدة مع إسبرسو صغير... استراحة بسيطة لكنها من أحلى لحظات الجولة.
➡️ من Odette، أمشي دقيقة واحدة فقط.
----
📚 Quartier Latin
و هنا تبقى في الحي اللاتيني Quartier Latin.
اسمه جه لأن الطلبة زمان كانوا بيتكلموا اللاتينية هنا.
لحد النهارده المنطقة مليانة مكتبات قديمة، مطاعم صغيرة، موسيقى في الشوارع، وفنانين بيرسموا أو بيعزفوا... وكل زاوية فيها روح مختلفة.
➡️ من هنا نمشي حوالي 10 دقائق ناحية شارع Mouffetard، مع شوية طلوع بسيط.
----
Rue Mouffetard
من أحب شوارع باريس بالنسبة لي.
شارع مليان حياة... مخابز، محلات جبنة، فاكهة، مطاعم فرنسية صغيرة، وأسواق موجودة من مئات السنين.
هنا هتحس إنك بتشوف باريس الحقيقية بعيد عن الزحمة.
➡️ بعد ما تخلص الجولة في الشارع، ارجع بنفس الطريق حوالي 10 دقائق لحد Saint-Michel.
---
📍 الدائرة السادسة (6ème arrondissement)
⛲ Saint-Michel
نافورة Saint-Michel من أشهر نقاط التجمع في باريس.
دائمًا هتلاقي موسيقى، شباب، سياح، ورسامي شوارع.
حتى لو معندكش هدف، المكان ده يخليك تقف شوية وتستمتع بالحياة وهي ماشية حواليك.
لو بتحب القهوة ممكن تاخد واحدة تانية عند
Le Départ Saint-Michel
➡️ من النافورة، اعبر الكوبري الصغير ناحية جزيرة
Île de la Cité
، و تمشي أقل من 5 دقائق تبقى في
---
📍 الدائرة الرابعة (4ème arrondissement)
⛪ Notre-Dame de Paris
وصلنا لواحدة من أعظم كاتدرائيات العالم.
كنيسة نوتر دام بدأت تتبني سنة 1163، وبقت رمز من أهم رموز باريس.
بعد الحريق الشهير سنة 2019 تم ترميمها وإعادة افتتاحها.
الدخول إلى الكاتدرائية نفسها مجاني بالكامل.
أما لو حبيت تطلع للأبراج أو تزور بعض المناطق الخاصة، فدي بتكون بتذكرة منفصلة، وسعرها حاليا حوالي 16 يورو للشخص البالغ (وقد يتغير مع الوقت).
➡️ بعد الزيارة، أمشي على ضفة نهر السين حوالي 8 دقائق في اتجاه الغرب و توصل
---
📍 الدائرة الأولى (1er arrondissement)
🌉 Quai de l'Horloge & Pont Neuf
وأنت ماشي على ضفة السين هتشوف واحد من أجمل المناظر في باريس.
توصل بعدها إلى Pont Neuf... أقدم كوبري موجود في باريس، رغم إن اسمه معناه "الكوبري الجديد".
من فوقه هتشوف النهر، والمراكب، وجزيرة المدينة، والمنظر وقت الغروب تحديدا من أجمل المشاهد في باريس.
➡️ عدي الكوبري، وكمل دقيقة أو دقيقتين فقط تبقى في
---
☕ Rue du Pont Neuf
هنا آخر خطوات الجولة...
لحد ما توصل إلى المكان اللي أحب أختم فيه أي يوم جميل في باريس.
❤️ Café Saint Honoré
اطلب قهوة، أو شوكولاتة ساخنة، أو حتى قطعة تارت فرنسية...
واقعد اتفرج على الناس وهي ماشية.
يمكن وقتها هتفهم ليه باريس مش مجرد مدينة...
باريس إحساس.
الجولة دي تاخد منك ساعة و نص من غير وقت القهوة بس لو بتصور ممكن تاخد ساعة كمان زيادة..
----
📌 الجولة الأولى هتلاقوا لينكها في أول تعليق لو فاتتكم.
📌 وكمان هتلاقوا لينك البوست الأساسي اللي بشرح فيه شكل مدينة باريس، وتقسيم الأحياء (Arrondissements)، ومعلومات مهمة جدا لأي حد بيزور باريس لأول مرة، .. 🇫🇷❤️
الصور من تصويري
