02/06/2025
როგორ აირჩიეს ვაჟა-ფშაველა ლაშარის თავხევისბერად
"მოხდა მოულოდნელი ამბავი: ლაშარის ჯვრის თავხევისბერმა, ღრმად მოხუცმა კაცმა, რომელსაც დიდი საზოგადოებრივი წონა და გავლენა ჰქონდა, შეაჟღარუნა ლაშარის საბრძოლო დროშა და წარმოსთქვა ლოცვა. დასასრულ, შეღაღადა მეუფეს, თითქოს ცოდვებს ინანიებსო და განაცხადა: ხალხო, ჯამაათო, დრო აირია, ხალხს, მამულს, განძსა და დროშას პატრონი სჭირდება. დავუძლურდი, სიცოცხლეს ცოცხალი ადამიანი ალამაზებს. ნახევარ საუკუნეზე მეტი ვემსახურე ლაშარსა და ქვეყანასო. აქ თავხევისბერმა აპრიალებული კელაპტარი მაღლა ასწია, თავსზემოთ წრე შემოხაზა, ლაშარის დროშას შეახო და წამოიძახა: —ამიერიდან თავხევისბერობა - სათემო საბჭოს თავმჯდომარეობა - ღირსეულ ქართველს, ლუკა რაზიკაშვილს დაეკისრაო. ერთხანს სიჩუმე ჩამოვარდა. შემდეგ კი ამიინო - დაიგუგუნა ხალხმა და თავკაცის შეგონებას მუხლზე დაჩოქებით უპასუხა.
ვაჟა-ფშაველა ამას არ მოელოდა, მართალია იგი დიდი გავლენით სარგებლობდა ლაშარშიც, მაგრამ თუ "საბჭეო სკამზე" დაჯდებოდა, იმას კი არასოდეს არ მოიფიქრებდა. ვაჟა ერთხანს გაოგნებული იდგა და ღრმად ჩაფიქრებულიყო.
— გისმინოს წმინდა ლაშარის ჯვარმა, კვლავ გუგუნებდა ლაშარის ხეობა.
შეიქმნა ჩოჩქოლი, გადაძახ-გადმოძახება. ვაჟა გონს მაშინ მოვიდა, როცა გარს შემოეხვია თორმეტი თემის ხევისბერი და "საბჭეო სკამზე" ასვლა შესთავაზა. ვაჟამ უკან დაიხია, იცოდა, რომ ამას თავისი წესი ჰქონდა. თუმცა მას ხელმხარი განათლული ჰქონდა, მაგრამ ხევისბერობას კი არასოდეს აპირებდა.
სახარბაკედან ცხრა სამსხვერპლო, რვა ვერძი და ერთი კურატი გამოიყვანეს. თავხევისბერი, მომავალი ბელადი, განსაკუთრებულად ადიდეს, დაამწყალობეს ჩოხოსანი რაინდი. ლაშარის "საბჭეო სკამზე" დასვეს და სათემო საბჭოს თავმჯდომარედ აირჩიეს.
მგოსანმა საზოგადოების პატივისცემა თავისი კაცურ-კაცური საქციელით დაიმსახურა."
✍️ ხვთისო ბუკუკიშვილის მოგონებებიდან.
ფოტოზე: 1911 წლის ლაშარობა და სალოცავში შეკრებილი ფშავლები.
ფოტოს ცენტრში, ჩოხაში ჩაცმული გახლავთ ვაჟა-ფშაველა.
#არაგველი #ვაჟაფშაველა #ფშავი #ხმელგორი
