19/08/2026
Wizz Air-ი სარაევოდან ევროპის სამ ახალ მიმართულებას ამატებს
დაბალბიუჯეტური ავიაკომპანია Wizz Air-ი მიმდინარე წლის ზამთრის სეზონზე სარაევოს საერთაშორისო აეროპორტიდან (SJJ) სამ ახალ მიმართულებას გახსნის ბერლინის, პრაღისა და ბრატისლავას მიმართულებით. აღნიშნული გაფართოება იმ ფონზე მიმდინარეობს, როდესაც Ryanair-ი ბოსნიის დედაქალაქში ზამთრის ოპერირებას დროებით აჩერებს და სრულმასშტაბიან დაბრუნებას 2027 წლის ზაფხულის სეზონიდან გეგმავს.
ახალი რეისების შესახებ განცხადება სარაევოს აეროპორტის გენერალური დირექტორის მოვალეობის შემსრულებელმა დინო სელიმოვიჩმა სამოქალაქო ავიაციის აღდგენის 30 წლისთავისადმი მიძღვნილ ღონისძიებაზე გააკეთა. ბერლინისა და ბრატისლავას მიმართულებით პირველი რეისები 2026 წლის 3 დეკემბერს შესრულდება, ხოლო პრაღის მიმართულებით - 18 დეკემბრიდან. ზამთრის განრიგით ფრენები კვირაში ორჯერ განხორციელდება, ხოლო 2027 წლის მარტის ბოლოდან, საზაფხულო სანავიგაციო სეზონის დაწყებასთან ერთად, სიხშირე კვირაში სამ რეისამდე გაიზარდება.
სამივე მიმართულებაზე Wizz Air-ი 239-ადგილიან Airbus A220/A321neo ტიპის საჰაერო ხომალდებს გამოიყენებს. ავიაკომპანია სარაევოში თვითმფრინავების ბაზირებას არ გეგმავს: პრაღის რეისებს სკოპიეში ბაზირებული ხომალდი შეასრულებს, ხოლო ბერლინისა და ბრატისლავას ფრენებს — სლოვაკეთის დედაქალაქში განთავსებული ხომალდი. ახალი მარშრუტები Wizz Air-ის კვირეულ ფრენებს სარაევოდან 11-მდე გაზრდის, რაც უკვე არსებულ რომისა (ფიუმიჩინო) და ლონდონის (ლუტონი) რეისებს დაემატება.
ეს სიახლე ავსებს იმ ვაკუუმს, რომელიც Ryanair-ის მიერ 2026-2027 წლების ზამთრის სეზონზე (25 ოქტომბრიდან 27 მარტამდე) სარაევოში ფრენების შეჩერებით შეიქმნა. ირლანდიური ავიაკომპანია 2027 წლის მარტის ბოლოდან რეკორდული საზაფხულო პროგრამით დაბრუნებას ვარაუდობს, რაც დაახლოებით 420 000 - 425 000 მგზავრთა ადგილს მოიცავს.
ეს ნაბიჯი წარმოადგენს Wizz Air-ის ყველაზე დიდ გაფართოებას სარაევოში 2022 წლის ოქტომბრის შემდეგ, როდესაც კომპანიამ ადგილობრივი ბაზა დახურა. მიმდინარე წელს Wizz Air-ი ბოსნია-ჰერცეგოვინაში N1 გადამყვანი გახდა და ბაზა ტუზლაშიც აღადგინა.
