12/04/2026
ეს ამბავი ბევრმა არ იცის. შორეული 1999 წელი იდგა, როცა ჩვენი პატრიარქი, ილია მეორე ნიდერლანდებში მოვიწვიეთ სტუმრად. მაშინ ერთად ვეწვიეთ ტექსელის ძმათა სასაფლაოს, სადაც მეორე მსოფლიო ომის მიწურულს დაღუპული 513 ქართველი გმირი განისვენებს. უწმიდესმა აკურთხა საფლავები და პანაშვიდიც გადაუხადა. მემორიალზე საბჭოთა სიმბოლიკა იყო გამოსახული და საინფორმაციო დაფაზეც მიეთითებინათ, რომ ეს იყო რუსი ჯარისკაცების სასაფლაო... დაკარგული იყო აჯანყების დროს დაღუპული მეომრების ვინაობაც...
ვერ აღგიწერთ, რაღაცნაირად ძალიან შემრცხვა, უხერხულად ვიგრძენი თავი უწმიდესთან იმის გამო, რომ რუსებად მოხსენიებული ქართველი გმირების სასაფლაოს წინ ვიდექით და წითლად ამოტვიფრულ საბჭოთა ნამგალსა და უროს შევცქეროდით სევდიანად... ეს ადამიანები სამშობლოსთვის გმირულად დაიღუპნენ და ნუთუ იმას იმსახურებდნენ, რომ ისტორიას მათი სახელები დაევიწყებინა და ქართველები რუსებად წარმოეჩინა?! ბრაზი და ცრემლი ერთად მახრჩობდა… მაგრამ, აბა მე რა შემეძლო? ერთი სტუდენტი გოგონა ვიყავი უცხო ქვეყანაში, ერთდროულად რამდენიმე ადგილას ვმუშაობდი, რომ თავი გამეტანა და ჯერ კიდევ საკუთარი თავის დამკვიდრებისთვის ვიბრძოდი... მაგრამ კარგად მახსოვს, სწორედ მაშინ შევპირდი საკუთარ თავს, რომ, რადაც არ უნდა დაჯდომოდა, მოვიდოდა დრო, როცა პატრიარქის ლოცვა-კურთხევით აქ, ტექსელზე ქართველი გმირების ხსოვნისადმი მიძღვნილ მონუმენტს აღვმართავდი საქართველოს დროშასთან ერთად!
მას მერე ბევრი წელი გავიდა... დადგა 2025 წელი და ეს ოცნება საკუთარ თავს, პატრიარქსა და ჩემს ქვეყანას საბოლოოდ სწორედ შარშან, 9 აპრილს ავუხდინე. და ახლა ტექსელზე რომ ჩახვალთ, ნახავთ ულამაზეს მონუმენტს, რომელსაც საქართველოს დროშა და წარწერა ამშვენებს ჩვენი ჰიმნიდან: "დიდება თავისუფლებას! თავისუფლებას დიდება!" მის წინ კი მემორიალურ დაფასაც დაინახავთ, რომელსაც 513 ქართველი გმირის სახელი და გვარი ამშვენებს! ამ საოცარი მონუმენტის ავტორი მოქანდაკე დავით (დევი) ხმალაძეა და დიდი მადლობა მას ❤
ოცნებები ხდება, მეგობრებო! დიდება მათ ნათელ ხსოვნას! დიდება და გამარჯვება საქართველოს!🇬🇪🇬🇪🇬🇪
