01/07/2017
వాస్తు పురుష జననం
వాస్తు పురుషుని జననం గురించి మొదట తెలుసుకుందాం.
పూర్వము బ్రహ్మాండమును సృష్టించునపుడు చాలా పెద్ద, అన్ని లోకములకు భయాన్ని కలుగచేయునట్టి ఒక భూతము పుట్టెను. ఆ భూతమును చూసిన ఇంద్రుడు మొదలగు దేవతలందరు చాలా భయపడి బ్రహ్మ దేవుని వద్దకు వెళ్లి తమ భయమును, బాధను ఇలా తెలియచేసిరి. ఓయీ బ్రహ్మదేవా సకల లోకములకు అధినాయకుడవైన ఓ ప్రభూ! మమ్మల్ని రక్షింపుము. సకల లోకములను భయము కలుగజేయు మరియు మింగివేయునట్టి ఒక భయంకరమైన భూతము పుట్టినది. దానిని చూచిన దేవతలందరును చాలా భయపడుతున్నారు. కావున ఓ బ్రహ్మదేవా నీవు మమ్మల్ని ఆ భూతము నుండి రక్షింపవలసిందిగా కోరుచున్నాము అని ప్రార్థింపగా, అది విన్న బ్రహ్మ దేవుడు ఓ దేవోత్తములారా మీరు భయపడకండి. దానితో మీకు ఎటువంటి భయము లేదు, అందరు కలసి ఆ భూతమును క్రింద పడవేయండి, అని చెప్పగా దేవతలందరు ధైర్యముతో దాని వద్దకు వెళ్లి, భూతమును పట్టి క్రింద పడవేసి అందరు దాని పైననే కూర్చుండిరి.
అప్పుడు బ్రహ్మదేవుడు ఆ భూతమునే వాస్తు పురుషునిగా సృష్టించెను. వాస్తు పురుషుడు భాద్రపద మాసము, బహుళ తృతీయ శనివారంనాడు పుట్టెను.
అలా వాస్తు పురుషుడు జన్మించిన కొంత కాలమునకు బ్రహ్మ దేవుని వద్దకు వచ్చి, ఓ బ్రహ్మ దేవా దేవతలందరు నన్ను అన్యాయముగా బాధించుచుండెదరు. కావున నా బాధ తీర్చుమని సవినయంబుగా ప్రార్థింపగా, అది విన్న బ్రహ్మదేవుడు అతనికి వరము ఇవ్వదలచి ఆ భూతముతో ఇలా పలికెను. ఓ వాస్తు పురుషుడా నిన్ను పూజింపని వాళ్ళు నీకు ఆహారము అగుదురని చెప్పెను. కావున నూతన గృహనిర్మాణ ప్రారంభ సమయమున, గృహ ప్రవేశమునను వాస్తుపురుషుని తప్పకుండ పూజించవలెను. అలా పూజ చేయని వారికి తాము చేయు పనులయందు అనేక ఆటంకములు కలుగుతాయి. అనేక ఇబ్బందులకు గురి కావలసివచ్చును.
కావున వాస్తు పురుష పూజ సకలమైన వారికినీ ఉత్తమోత్తము మరియు ఐశ్వర్యప్రదము .
