22/10/2016
മീശപ്പുലിമലയിൽ മഞ്ഞു പെയ്യുന്നത് കണ്ടിട്ടുണ്ടോ????
മീശപ്പുലിമലയിൽ മഞ്ഞു പെയ്യുന്നത് കാണാൻ കൊളുക്കുമല വഴി പോയാൽ കാണുന്നത് മഞ്ഞു ആകില്ല, ജയിൽ ആയിരിക്കാം. കൊളുക്കുമല വഴിയുള്ള മീശപ്പുലിമല ട്രെക്കിങ് പൂർണമായും നിരോധിച്ചുകൊണ്ട് ദേവികുളം സബ് കളക്ടർ ഡോക്ടർ ശ്രീറാം വെങ്കട്ടരാമൻ IAS ന്റെ ഉത്തരവ് ഇറങ്ങി.
അതീവ പരിസ്ഥിതി പ്രാധന്യമുള്ള മേഖലയാണ് 2640 മീറ്റർ ഉയരമുള്ള മീശപ്പുലിമല. സഞ്ചാരികളുടെ അനിയത്രിതമായ കടന്നുകയറ്റം മൂലം പരിസ്ഥിതി ലോലവും വരയാടുകളുടെ ആവാസവ്യവസ്ഥയുമായ മീശപ്പുലിമലയിൽ ഉണ്ടായിരിക്കുന്ന ആഘാതം ചെറുതൊന്നുമല്ല. ഇവിടെയാണ് നമ്മൾ സഞ്ചാരികൾ പരിസ്ഥിതിയുടെ നിലനിൽപ്പിനായുള്ള ഉത്തരവാദിത്തം പ്രകടിപ്പിക്കേണ്ടത്. കൊളുക്കുമല വഴി ചെന്നെത്തുന്ന നൂറുകണക്കിന് സഞ്ചാരികളെ താങ്ങാൻ ഉള്ള ശേഷിയൊന്നും മീശപ്പുലിമലക്കില്ല. കൂടാതെ കേരള ഫോറസ്റ് ആക്ട് 1961 സെക്ഷന് 27 e (iv) പ്രകാരം റിസേര്വ് ഫോറെസ്റ്റില് അതിക്രമിച്ചു കടക്കുന്നത് ഒരു വര്ഷം മുതല് അഞ്ചു വര്ഷം വരെ തടവും 1000 രൂപ മുതല് 5000 രൂപ വരെ പിഴയും ലഭിക്കാവുന്ന കുറ്റമാണ്. കൂടാതെ നാശനഷ്ടങ്ങള് വരുത്തിയതായി തെളിഞ്ഞാല് അതിനും പിഴയൊടുക്കേണ്ടി വരും.
മുന്നാറിലെയും പരിസരപ്രദേശങ്ങളിലെയും നൂറുകണക്കിന് ജീപ്പ് ഡ്രൈവറുമാരുടെ ഉപജീവനമാർഗം കൂടിയാണ് കൊളുക്കുമലയിലേക്കുള്ള ഈ വിനോദ സഞ്ചാരം. ഇവിടെയാണ് ദേവികുളം സബ് കളക്ടറുടെ ഉത്തരവിന്റെ പ്രസക്തി. പ്രാദേശിക രാഷ്ട്രീയ നേതാക്കളുടേയും , ജനപ്രതിനിധികളുടേയും , KFDC , വനം വകുപ്പ് DTPC ഉദ്യോഗസ്ഥരുടെയും തോട്ടം ഉടമകൾ , വിനോദ സഞ്ചാര മേഖലയെ ആശ്രയിച്ചു തൊഴിൽ കണ്ടെത്തിയ സൂര്യനെല്ലി ചിന്നക്കനാൽ മേഖലയിലെ ടാക്സി ഉടമകൾ എന്നിവരെയെല്ലാം ക്ഷണിച്ചിരുത്തി അവരുടെ അഭിപ്രായങ്ങൾ ക്ഷമയോടെ കേട്ട് തീരുമാനമെടുത്ത ദേവികുളം സബ് കളക്ടർ ശ്രീ ശ്രീറാം വെങ്കിട്ടരാമൻ IAS , മീശപ്പുലിമല എന്ന് നമ്മൾ വിളിക്കുന്ന കരിങ്കുളം മലനിരകളുടെ സംരക്ഷണം എന്നെന്നേക്കുമായി ഉറപ്പാക്കിയിരിക്കുന്നു.
മീശപുലിമല ട്രെക്കിങ്ങിനു നിയമപരമായ ഒരേ ഒരു മാർഗം KFDC ആണ്. ബേസ് ക്യാമ്പിൽ ടെന്റിൽ ഉള്ള താമസത്തിനു 2 പേർക്ക് 3500 രൂപ ആണ് ഈടാക്കുന്നത്. ഇതിനു സമീപമുള്ള സ്കൈ കോട്ടജിൽ 2 പേർക്ക് 7000 രൂപയും. ബേസ് ക്യാമ്പിൽ നിന്നും 6-7 കിലോമീറ്റർ അകലെ റോഡോ വാലിയിൽ സ്ഥിതി ചെയ്യുന്ന റോഡോ മാൻഷനിലും 2 പേർക്ക് 7000 രൂപ ആണ്. റോഡോ മാൻഷനിൽ ഒന്നും സ്കൈ കോട്ടജിൽ രണ്ടും എക്സ്ട്രാ പേഴ്സൺസ് അനുവദനീയമാണ്, ഒരാൾക്ക് 1000 രൂപ വീതം ആണ് നിരക്ക്. നല്ല കിടിലൻ ശാപ്പാടും താമസവും ട്രെക്കിങ്ങും ഗൈഡും ക്യാമ്പ് ഫയറും ഒക്കെ അടക്കമാണിത്. സ്കൈ കോട്ടേജിലെയും റോഡോ മാന്ഷനിലെയും ബുക്കിങ്ങിനു മൂന്നാർ KFDC ഓഫീസിൽ നിന്നും ജീപ്പിൽ pickup & drop സൗകര്യം ഉണ്ട്. ബേസ് ക്യാമ്പിലെ ടെന്റ് ആണ് ഏറ്റവും ചെലവ് കുറഞ്ഞ മാർഗം. ബുക്കിങ്ങിനും കൂടുതൽ വിവരങ്ങൾക്കും http://www.kfdcecotourism.com/ സന്ദർശിക്കുക. ഫോൺ: 04865 230332
മീശപ്പുലിമലയുടെ സംരക്ഷണത്തിനായുള്ള ഈ പദ്ധതി വിഭാവനം ചെയ്ത കേരളത്തിന്റെ യുവ IAS ഓഫീസർ ഡോക്ടർ ശ്രീറാം വെങ്കട്ടരാമന് സഞ്ചാരി ഗ്രൂപ്പിന്റെ അഭിനന്ദനങ്ങൾ. ഈ ഉത്തരവ് നാളെ ചരിത്രമായേക്കാം. മൂന്നാറിന്റെ സംരക്ഷണത്തിനായി കൂടുതൽ പദ്ധതികൾ വിഭാവനം ചെയ്യാൻ അദ്ദഹത്തിനു കഴിയട്ടെ എന്ന് പ്രത്യാശിക്കുന്നു.
Make your heavenly trip to Kerala in your best of health while you are on earth. Kerala tourism and its success are a much talked topics among creative travelers and tourists. They backpack together with spices of the soil, some realized dreams and memories. Kerala tourism accommodates wishes and de...
