دەستەی گەشتوگوزار::Kurdistan Tourism

21/10/2026

وۆرکشۆپی ئامادەکردنی پلانی گەشتوگوزار بۆ ساڵی ٢٠٢٧ بە کۆتا هات

ڕۆژی چوارشەممە، ٢١ی تشرینی یەکەمی ٢٠٢٦، دووەم رۆژی وۆرکشۆپی ئامادەکردنی پلانی گەشتوگوزار بۆ ساڵی ٢٠٢٧، بە ئامادەبوونی بەڕێوەبەرانی گشتیی گەشتوگوزار لە پارێزگا و ئیدارە سەربەخۆکان و راوێژکاری وەزارەتی شارەوانی و گەشتوگوزار، بەڕێوەچوو.

ئامانج لەم وۆرکشۆپە داڕشتنی پلانی گەشتوگوزارە بۆ ساڵی داهاتوو. دوای ئەوەی لە ڕۆژی یەکەمدا بەشێک لە تەوەرەکان بە وردی تاوتوێ کراون، لە ڕۆژی دووەمدا چەند تەوەرێکی تر بەپێی بەرنامەی کاری وۆرکشۆپەکە گفتوگۆیان لەبارەوە کرا، لەوانە؛

“ڕێکخستن و پەرەپێدانی توانا مرۆییەکان و پەروەردەی گەشتیاری و زیادکردنی هەلی کار، باشترکردنی کوالێتی خزمەتگوزاری گەشتیاری، کارکردن بەپێی ستانداردە جیهانییەکان لە بواری بەڕێوەبردنی جۆریدا، ڕێکخستن و پەرەپێدانی کردارەکانی پۆلێنکردن و پشکنینی بنکە و کۆمپانیا گەشتیارییەکان.”

رۆژی یەکەمی وۆرکشۆپ:

https://www.facebook.com/share/p/19hzeszJNd/?mibextid=wwXIfr

20/10/2026

وۆرکشۆپی ئامادەکردنی پلانی گەشتوگوزار بۆ ساڵی ٢٠٢٧ بەڕێوە دەچێت

رۆژی سێشەممە، ٢٠ی تشرینی یەکەمی ٢٠٢٦، بە سەرپەرشتی ژوان صابر، سەرۆکی دەستەی گەشتوگوزار و بە ئامادەبوونی ڕاوێژکار و بەڕێوەبەرانی گشتیی وەزارەتی شارەوانی و گەشتوگوزار، بەڕێوەبەرانی گشتیی گەشتوگوزار لە پارێزگا و ئیدارە سەربەخۆکان، بەڕێوەبەرانی دیوانی دەستە و بەڕێوەبەرایەتییە گشتییەکان، وۆرکشۆپی ئامادەکردنی پلانی گەشتوگوزار بۆ ساڵی ٢٠٢٧ دەستی پێکرد کە بۆ ماوەی دوو ڕۆژ بەردەوام دەبێت.

لە سەرەتای وۆرکشۆپەکەدا، سەرۆکی دەستەی گەشتوگوزار وتارێکی پێشکەش کرد و تیایدا جەختی لەسەر گرنگیی یەکخستنی هەوڵەکان بۆ پەرەپێدانی کەرتی گەشتوگوزار کردەوە و ڕایگەیاند: “گەشتوگوزار تەنها کەرتێکی خزمەتگوزاریی ئاسایی نییە، بەڵکو بزوێنەرێکی سەرەکیی ئابووری، ڕەنگدانەوەی ناسنامەی کەلتووری، و دەرفەتێکی زێڕینە بۆ ناساندنی سروشت، مێژوو و شارستانیەتی دەوڵەمەندی کوردستان بە جیهان. هەنگاونان بۆ گەیشتن بە لوتکەی سەرکەوتن لەم کەرتە گرنگەدا، بەبێ بوونی پلانێکی زانستی، تۆکمە و هەمەلایەن مەحاڵە.”

هەروەها، سەرۆکی دەستەی گەشتوگوزار ئاماژەی بەوە کرد کە ئەمساڵ، جیاواز لە ساڵانی ڕابردوو، بە بەشداری و ئامادەبوونی ڕاستەوخۆی سەرجەم بەڕێوەبەرایەتییە گشتییەکان، گفتوگۆ لەسەر ئامانج و ستراتیژەکان دەکرێت و سوود لە سەرنج و بۆچوونی یەکتر دەبینرێت بۆ پێشخستنی کارەکان.

دواتر بەڕێوەبەری پلاندانان لە دەستەی گەشتوگوزار وردەکارییەکانی وۆرکشۆپەکەی ڕوونکردەوە کە ٧ تەوەری سەرەکی تاوتوێ دەکرێن، لەوانە؛ پەرەپێدانی ژێرخان و هەمەجۆرکردنی چالاکییە گەشتیارییەکان، ڕێکخستنەوەی یاسا و ڕێنماییەکان، پەرەپێدانی بواری کارگێڕی، پەرەپێدانی توانا مرۆییەکان، پەیڕەوکردنی ستانداردە جیهانییەکان لە بواری بەڕێوەبردنی جۆری، بەبازاڕکردن و راگەیاندن و پاراستنی ژینگە.

شایەنی باسە لە رۆژی یەکەمی وۆرکشۆپەکە چەند تەوەرێک بە وردی گفتوگۆیان لەبارەیەوە کرا و بەشداربووان را و سەرنجی خۆیان خستەڕوو. بڕیارە لە رۆژی دووەمیشدا چەند تەوەرێکی تر تاوتوێ بکرێن.

14/10/2026

دەستەی گەشتوگوزار کار بۆ پەیڕەوکردنی نوێترین سیستەمی بەڕێوەبردنی جۆری دەکات

رۆژی سێشەممە، ١٣ی تشرینی یەکەمی ٢٠٢٦، لە چوارچێوەی هەوڵە بەردەوامەکان بۆ بەرزکردنەوەی ئاستی کارگێڕیی، بە ئامادەبوونی ژوان صابر، سەرۆکی دەستەی گەشتوگوزار و بەشداری بەڕێوەبەران و سەرۆک بەشەکانی دیوانی دەستە، سیمینارێکی تایبەت لە ژێر ناونیشانی (سیستەمەکانی بەڕێوەبردنی جۆری و وەشانی نوێی ئایزۆی ISO 9001:2026) بەڕێوەچوو.

لە میانی سیمینارەکەدا، بەڕێوەبەری دڵنیایی جۆری بە وردی تیشکی خستە سەر سیستەمەکانی بەڕێوەبردنی جۆری، بنەما، پێویستی و پێوەرەکانی تايبەت بە ستانداردی (ئایزۆی ٩٠٠١: ٢٠٢٦) و ئه‌و نوێكارییانه‌ی كراون له‌ سیسته‌مه‌كه‌دا.

لای خۆیەوە، سەرۆکی دەستەی گەشتوگوزار بە بایەخەوە ئاماژەی بە گرنگیی پەیڕەوکردنی سیستەمی ئایزۆ کرد بۆ رێکخستن و جێبەجێکردنی ئەرکەکان و خزمه‌تگوزارییه‌ گه‌شتیارییه‌كان بەپێی ستانداردە جیهانییەکان. هاوکات تەواوی بەڕێوەبەران و سەرۆک بەشەکانی دەستەی ڕاسپارد کە وەک یەک تیمی ڕێکخراو کار بکەن لە پێناو سەرخستنی تەواوی قۆناغەکان و بەدەستهێنانی بڕوانامەی ئایزۆ بۆ پێشخستنی سێکتەری گەشتوگوزار.

شایەنی باسە دەستەی گەشتوگوزار شانازی دەکات بەوەی یەکەمین دامەزراوەی حکومەتی هەرێمی کوردستان بووە کە (سیستەمی بەڕێوەبردنی جۆری) پەیڕەو کردووە؛ لە سۆنگەی بایەخدانی بەردەوامی بەم سیستەمە بە گرنگیەوە دەڕوانێتە ئەو پێشکەوتنانەی لەم بوارەدا ڕوودەدەن، بەتایبەت دوای ئەوەی لەلایەن ڕێکخراوی جیهانیی ئایزۆوە (ISO)، وەشانی نوێی ئایزۆی ٩٠٠١: ٢٠٢٦ دەرچووێنرا.

12/10/2026

سێیەمین وەرزی فێستیڤاڵی نێودەوڵەتی چێشتلێنان بەڕێوەدەچێت

دوای سەرکەووتنی وەرزی یەکەم و دووەمی فێستیڤاڵی نێودەوڵەتیی عێراق و هەرێمی کوردستان بۆ چێشتلێنان کە لە هەرێمی کوردستان بەڕێوەچوو، وەرزی سێیەمی ئەم فێستیڤاڵە جیهانییە لە شاری بەغدا دەستی بە کارەکانی کرد و کۆمەڵێک شێفی شارەزا و بەناوبانگ لە چەندین وڵاتی جیاوازەوە بەشدارن.

ئەم فێستیڤاڵە بە چاودێری وەزارەتی رۆشنبیری و گەشتوگوزاری عێراق و سەرپەرشتی هەردوو دەستەی گەشتوگوزاری هەرێمی کوردستان و عێراق و رێکخراوی ماڵی شێفەکانی کوردستان بۆ گەشەپێدان و بەڕێوەدەچێت و ماوەی سێ ڕۆژ بەردەوام دەبێت.

لەم خولەی فێستڤاڵەکەدا، کە رۆڵیکی گرنگ دەگێڕێت بۆ ئاڵوگۆڕی کەلتووری و هونەری چێشتلێنان، زیاتر لە ٢٠٠ شێف لە ١٨ وڵات بەشدارن . هاوکات ١٦ شێفی هەرێمی کوردستان بە جلوبەرگی کوردیی و ئاڵای کوردستانەوە بەشدارن و بە ئامادەکردن و پێشکەشکردنی جۆرەها خواردن و شیرینیی کوردی، کەلتووری دەوڵەمەندی هەرێمی کوردستان بە ئامادەبووان و بەشداربووانی نێودەوڵەتی دەناسێنن.

شایەنی باسە فێستیڤاڵەکە دەرفەتێکی ناوازەیە بۆ ناساندنی مێژووی پڕبایەخی خواردنە کلتووریەکان و پەرەپێدانی پەیوەندییە گەشتیارییەکان لەگەڵ وڵاتانی جیهاندا.

راگەیاندن و پەیوەندییەکان- دەستەی گەشتوگوزار

11/10/2026

پـــرســەنــامـــە...

برای بەڕێزم (عبدالوهاب احمد) فەرمانبەری خۆبەخش لە دەستەی گەشتوگوزار، بەناوی خۆم و سەرجەم فەرمانبەرانی دەستەی گەشتوگوزار، پرسە و سەرەخۆشی خۆمانت ئاڕاستە دەکەین بەهۆی کۆچی دوایی خوشکی بەڕێزتان.

بۆ ئەم کۆستە، هاوبەشی خەمتانین و سەرەخۆشی خۆمان ئاڕاستەی جەنابتان و خانەوادەکەتان دەکەین.

لە خودای دلۆڤان داواکارم ڕۆحی پاکی کۆچکردوو ئارام بێت و جێگای بەهەشت بێت، کۆتا ناخۆشیتان بێت و سەبووری خانەوادەکەتان بدات.

ٳنا للە‌ وٳنا ٳلیە‌ راجعون

ژوان صابر
سەرۆکی دەستەی گەشتوگوزار

06/10/2026