Fossavatnsgangan er elsta skíðamót sem enn er við lýði á Íslandi, en gangan fór fyrst fram árið 1935. Lengst af var aðeins ein vegalengd á dagskrá Fossavatnsgöngunnar, u.þ.b. 20 km leið frá Vatnahnjúk í nágrenni Fossavatns yfir á Seljalandsdal. Árið 1987 bættist 10 km vegalengdin við og tveimur árum síðar var einnig farið að bjóða upp á 7 km leið sem var mjög létt og hentaði vel allri fjölskyldunn
i. Árið 2004 var svo enn bætt við vegalengdirnar þegar tekin var upp keppni í 50 km göngu. Í dag er boðið upp 50 km, 25 km, 25 km skaut, 12,5 km, 5 km og 1 km, þannig að allir ættu að finna eitthvað við sitt hæfi. Keppendur voru 7 talsins og var brautin mæld 18 km. Sigurvegari varð Magnús Kristjánsson úr Skátafélaginu Einherjum á tímanum 1 klst. og 50 mínútum, annar varð Sigurjón Halldórsson úr Herði á 1:53 klst. og þriðji Sig.Baldvinsson úr Einherjum á 1:54 klst.
Á fimmta og sjötta áratugnum féll Fossavatnsgangan 14 sinnum niður, en frá árinu 1955 hefur hún farið fram á hverju ári. Sigursælasti keppandi í sögu Fossavatnsgöngunnar er Kristján Rafn Guðmundsson frá Ísafirði, sem 12 sinnum kom fyrstur í mark á sjöunda og áttunda áratugnum. Sá sem oftast hefur tekið þátt er hins vegar Sigurður Jónsson (Búbbi prentari) en hann keppti í þriðju göngunni, árið 1938, og var með í flestum Fossavatnsgöngum eftir það, langt fram á níræðisaldur. Eftir að 50 km vegalengdin var tekin upp í Fossavatnsgöngunni hefur mótið vakið sífellt meiri athygli erlendis. Árið 2005 var gangan tekin inn á mótaskrá Alþjóða skíðasambandsins, FIS, og sama ár varð hún stofnaðili að norrænni mótaröð, FIS Nordic Ski Marathon Cup, sem nú hefur lagst af. Frá árinu 2015 hefur Fossavatnsgangan verið aðili að Worldloppet, stærstu mótaröð heims á sviði skíðagöngu fyrir almenning. Eftir að sú aðild gekk í gildi varð alger sprenging í fjölda þátttakenda.
Í hópi þeirra fjölmörgu skíðakappa sem ár hvert heimsækja Ísafjörð til að taka þátt í Fossavatnsgöngunni er magt heimsfrægt skíðafólk. Fyrstur í þeirri röð var Paul Gunnar Mikkelsplass frá Noregi, sem kom hingað á hátindi frægðar sinnar árið 1985. Síðastliðin ár hefur svo bæst mjög í þennan hóp og má þar nefna kempur á borð við Thomas Alsgaard, Hilde G. Pedersen, Suzanne Nyström, Oskar Svärd, Justyna Kowaclzyc, Petter Northug og Ivo Nyskanen - allt saman margfaldir verðlaunahafar af heimsmeistaramótum og Ólympíuleikum.
