13/12/2025
Aðgengi er ekki nýjung, heldur sjálfsagður réttur
Í ljósi nýlegrar fréttar um aðgengi að hópferðabílum viljum við hjá Hópferðabílum Skagafjarðar benda á eitt mikilvægt atriði.
Við höfum í nærri 20 ár boðið upp á hópferðabíla með lyftubúnaði fyrir hjólastóla og sinnt fólki með skerta hreyfigetu af fagmennsku og metnaði.
Við höfum ítrekað boðið í akstur og áætlanir einmitt til að vekja athygli á þörfinni fyrir slíka bíla, en því miður hafa þeir aðilar sem rekið hafa þessar áætlanir hingað til sýnt þessu litinn áhuga. Aðgengi hefur of oft verið sett til hliðar.
Því fögnum við sannarlega þeirri þróun sem nú virðist vera að eiga sér stað. Samkeppni er af hinu góða, sérstaklega þegar hún snýst um að tryggja öllu fólki jafnt aðgengi að samgöngum og þjónustu. Við óskum samkeppnisaðilum innilega til hamingju með að stíga þetta mikilvæga skref til framfara.
En við viljum jafnframt minna á. Við bjóðum ekki aðeins upp á aðgengi við bjóðum 20 ára reynslu, þekkingu og traustan rekstur í akstri hópferðabíla með lyftubúnaði.
Aðgengi er ekki tímabundin nýjung. Það er ábyrgð. Og hún hefur verið okkar leiðarljós í nærri 2 áratugi.
Ný rafmagnsrúta Icelandia, sem rekur Flugrútuna milli Reykjavíkur og Keflavíkurflugvallar, og sú fyrsta með fullu hjólastólaaðgengi var kynnt á viðburði sem var haldinn á BSÍ í dag.
